Դեղերի նկարագրություն
Մարտի 8—ից ապրիլի 7—ը՝ կանանց առողջության ամիս
ՀՀ առողջապահության նախարար Դերենիկ Դումանյանին զեկուցվեց, որ իր հանձնարարության համաձայն, շաբաթ եւ կիրակի օրերին Երեւանի պոլիկլինիկաներում սահմանվել են հերթապահություններ՝ ընդգրկելով մանկաբույժների։ Հերթապահությունների կազմակերպման նպատակն այն է, որ սուր շնչառական հիվանդությունների դեպքում մարդիկ հնարավորություն ունենան օգտվելու առողջության առաջնային պահպանման ծառայություններից, եւ անհարկի չծանրաբեռնվեն հիվանդանոցներն ու շտապ օգնության ծառայությունը։ Նաեւ զեկուցվեց, որ հանրապետությունում սուր շնչառական հիվանդությունների ծանր դեպքեր չկան։ Նախարարը հանձնարարեց շարունակել ինչպես ամենօրյա մշտադիտարկումը, այնպես էլ պոլիկլինիկաների հերթապահությունները։
Խորհրդակցության ժամանակ Դերենիկ Դումանյանին ներկայացվեց իր հանձնարարությամբ շտապ օգնության ծառայությունում մանկաբուժական բրիգադներ ձեւավորելու նպատակով կատարված ուսումնասիրությունները, արվեցին առաջարկներ։ «Այդ բրիգադների ձեւավորումով էականորեն կբարելավվի երեխաների բժշկական օգնության որակը։
Մանկաբուժական հատուկ բրիգադները ոչ միայն հեշտությամբ կկողմնորոշվեն, այլեւ կանչ տվող ընտանիքը կօգտվի մանկաբույժի խորհրդատվությունից»,–ասաց նախարարը՝ հանձնարարելով հստակ մեխանիզներ մշակել եւ կոնկրետ առաջարկություններ ներկայացնել Երեւանում շտապ օգնության մակաբուժական բրիգադներ ձեւավորելու նպատակով։
Դերենիկ Դումանյանը նշեց, որ մարտի 8—ից ապրիլի 7—ը հայտարարվելու է կանանց առողջության պահպանման միամսյակ, որի շրջանակներում Երեւանում եւ մարզերում կանանց կտրամադրվեն անվճար մի շարք հետազոտություններ, անհրաժեշտության դեպքում՝ կիրականացվեն անվճար վիրահատություններ։
Խորհրդակցության ժամանակ հստակեցվեցին պետության կողմից երաշխավորված անվճար հիվանդանոցային բժշկական օգնություն եւ սպասարկում իրականացնող բժշկական կազմակերպություններում նախարարության ներկայացուցիչների կողմից մշտադիտարկումը շարունակելու կազմակերպական հարցերը։
Նախարարի նախաձեռնությամբ եւ հանձնարարությամբ անցած տարվա նոյեմբերից իրականացված մշտադիտարկման արդյունքները ցույց տվեցին, որ դրանք նպաստում են բժշկական օգնության որակի բարձրացմանը։
Քննարկվեցին նաեւ այլ հարցեր։
