Արդեն ավանդական է դարձել կանանց տոնի առիթով մեկ ամսվա ընթացքում (մարտի 8–ից ապրիլի 7–ը) առողջական խնդիրներ ունեցող կանանց անվճար բուժզննման եւ բուժման ակցիա անցկացնելը մայրաքաղաքի առողջապահական հիմնարկներում։

Այս տարի Երեւանում ակցիան կազմակերպվել է Երեւանի քաղաքապետարանի եւ առողջապահության նախարարության համատեղ ուժերով (մինչ այդ ակցիան կազմակերպել է քաղաքապետարանը)։ Երեկ հրավիրված մամուլի ասուլիսում Երեւանի քաղաքապետարանի առողջապահության վարչության պետ Կամսար Բաբինյանը ներկայացրեց ակցիայի անցկացման մեխանիզմը։ Նախ՝ ակցիան լինելու է բավական ընդգրկուն։ Առողջական խնդիր ունեցող քաղաքացին դիմում է իր հաշվառված ամբուլատոր պոլիկլինիկական հաստատություն, որտեղ կկատարվի առաջնային բուժզննում։ Եթե բժիշկը գտնում է, որ տվյալ քաղաքացին ունի երկրորդ փուլ ուղեգրվելու կարիք, ուղեգրում է ստացիոնար հետազոտության։ Այստեղ հիվանդը կանցնի խորը մասնագիտացված հետազոտություն եւ հարկ եղած դեպքում կվիրահատվի։

Բացառությամբ «թանկարժեք եւ դժվարամատչելի» հետազոտությունների (հորմոնային հետազոտություն, սրտի վիրահատություն, յամմեռ–հետազոտություն), մնացած հետազոտությունները եւ վիրահատությունները կատարվելու են անվճար։ Դժվարամատչելի հետազոտություն է համարվում նաեւ համակարգչային տոմոգրաֆիան, սակայն, քանի որ քաղաքապետարանը վերջին տարում ձեռք է բերել իր սեփականը, այս սարքով զննումը նույնպես կատարվելու է անվճար (խոսքը երեւանաբնակ կանանց մասին է)։

Ակցիային մասնակցելու են Երեւանում գործող ինչպես պետական, այնպես էլ մասնավոր սեփականության կարգավիճակ ունեցող բուժհաստատությունները։ «Երեւան քաղաքի բոլոր հիվանդանոցները մասնակցելու են ակցիային։ Անկախ սեփականության ձեւից, բոլոր բուժհաստատություններն ընդգրկված են այս ակցիայի շրջանակում»,–ասաց բանախոսը։
Քաղաքացիները պոլիկլինիկաներ կարող են դիմել մարտի 10–ից (երկուշաբթի) սկսած։

Ի՞նչ ընդունելություն ունի նմանատիպ ակցիան, երեւանցիներն ինչպե՞ս են գնահատում այն։ Կամսար Բաբինյանի տեղեկացմամբ, 2013 թ. քաղաքապետարանն այսօրինակ երկու ակցիա է կազմակերպել՝ «Ձեզ համար, կանայք» եւ «Երեւանյան ամառ»։ Այս երկու նախաձեռնությունների շրջանակում դիմել է մոտ 9800 քաղաքացի, որից շուրջ 470–ը ենթարկվել է անվճար վիրահատության (աչքի վիրահատություններ եւ կանացի վիրահատություններ)։ Կատարվել են նաեւ սիրտ–անոթային, աչքի հիվանդությունների հետ կապված բազմաթիվ հետազոտություններ։ Սա նշանակում է, որ ակցիան արդարացված է եւ օգտակար։
Առողջապահության վարչության պետը նշեց, որ ցանկացած բուժզննում եւ վիրահատություն կատարվում է ըստ տվյալ քաղաքացու առողջական վիճակի՝ նեղ մասնագիտական եզրակացության հիման վրա եւ կրում է անհատական բնույթ։ Այն էլ ասաց, որ չեն լինելու էսթետիկ եւ կոսմետիկ բնույթի միջամտություններ, խոսքը միայն առողջական միջամտության մասին է։

Հարցին, թե՝ մայրաքաղաքի բոլոր պոլիկլինիկաներն արդյոք ունե՞ն համապատասխան սարքավորումներ, որ իրականացնեն բուժզննում, առողջապահության վարչության պետը հետեւյալ կերպ պատասխանեց. «Նախնական ախտորոշումը կատարվում է պոլիկլինիկայում։ Եթե պետք լինի նեղ մասնագիտական կամ ավելի խորացված հետազոտություն, հիվանդը (քաղաքացին) կուղեգրվի ստացիոնար, որտեղ կենթարկվի ավելի մանրակրկիտ հետազոտման»։

Ի դեպ, կանանց առողջապահական միամսյակն անցկացվում է ոչ միայն մայրաքաղաքում, այլեւ ամբողջ հանրապետությունում։

Պետրոս ՍԱՐՈՒԽԱՆՅԱՆ