Կա տարածված կարծիք, որ մայրական կաթը շատ կարևոր է երեխայի իմունային զարգացման համար, այն պաշտպանում է ինֆեկցիաներից, պարունակում է վիտամիններ և հորմոններ: Բացի այս, շատ է խոսվում այն մասին, որ մայրական կաթը ազդում է նաև երեխայի ուղեղի զարգացման վրա և որքան երկար է երեխան կրծքով սնուցվում, այնքան նա, այսպես ասած, խելացի է: Մինչդեռ գիտնականների վերջին հետազոտությունները ցույց են տվել, որ կրծքով սնուցման կարևորությունն ու նշանակությունը փոքր-ինչ չափազանցվել են:

«Զդոռովյե.ռու» կայքի հաղորդմամբ, հետազոտության համար ուսումնասիրվել են 1800 երկվորյակ նորածիններ. մի երեխային մայրը կերակրել է կրծքով, մյուսին արհեստական կերով: Զույգ ունենալու դեպքում մայրը երբեմն չի կարողանում լիարժեք կերակրել երկուսին, քանի որ կաթը չի բավականացնում: Երեխաները հետազոտվել են մի շարք չափանիշներին համապատասխան` քաշը, ակտիվությունը, հետագայում ուսման հաջողությունները և այլն:

Արդյունքները ցույց են տվել, որ այնպիսի բարդ չափանիշներ, ինչպիսիք են քաշը մեծ տարիքում կամ մաթեմատիկական ունակությունները որևէ կերպ պայմանավորված չեն եղել` մայրը նրան կրծքով է կերակրել, թե արհեստական կերով:

Գիտնականների հետազոտությունը մեջբերելով աղբյուրը նշում է, որ վերջիններս ընդունում են, որ կրծքով սնուցումը, այդուհանդերձ, իր առավելություններն ունի արհեստական կերերի համեմատ, բայց որպեսզի երեխայի և մոր առողջությունը հեռանկարում բարելավվի, անհրաժեշտ է կենտրոնանալ այն գործոնների վրա, որոնք իսկապես ազդում են տարիների ընթացքում զարգացման վրա:
Աղբյուր` Panorama.am