«Սեպտեմբերից Հայաստանում կմեկնարկի «Պնեւմակոկային պատվաստումների ներդրման ծրագիրը»,–երեկ լրագրողների հետ հանդիպման ժամանակ ասաց ՀՀ առողջապահության նախարարության իմունականխարգելման ազգային ծրագրի ղեկավար Գայանե Սահակյանը՝ հավելելով, որ պնեւմակոկային պատվաստումը կատարվում է մինչեւ 1 տարեկան երեխաների շրջանում։

Միջմկանային պատվաստման եղանակով կպատվաստվեն մինչեւ 1 տարեկան երեխաները, մասնավորապես՝ հուլիսի 15—ից հետո ծնված երեխաները։ Առաջին դեղաչափը կներարկվի 1.5 ամսական հասակում, երկրորդը՝ 3, երրորդը՝ 4.5 ամսականում։

«Տարիքային այս սահմանն ընտրվել է՝ ելնելով այն հանգամանքից, որ մինչեւ վեց ամսական հասակը երեխայի մոտ թոքաբորբը, մենինգիտները կարող են զարգանալ, նույնիսկ ժամանակի ճիշտ հակաբիոտիկների կիրառումը կարող է դրական բուժման արդյունք չունենալ, քանի որ այդ հիվանդությունները կարող են հանգեցնել արյան վարակումների, ինչն էլ իր հերթին՝ մահվան»,–ասաց Գ. Սահակյանը։
Նրա խոսքերով՝ ԱՆ—ը որդեգրել է նոր պատվաստանյութերի ներդրման քաղաքականությունը՝ նպաստելով նոր հիվանդությունների, մասնավորապես՝ մենինգիտների, թոքաբորբերի եւ դիարեաների համալիր վերահսկման գործընթացին։

«Ինչպես այս, այնպես էլ մյուս պատվաստումներն առաջին հերթին նպաստում են մեր երկրում երեխաների իմունիտետի ամրապնդմանը, ինչպես նաեւ մանկական մահացության կրճատմանը»,–ասաց նա։
Անդրադառնալով հակացուցումներին՝ Գ. Սահակյանը նշեց, որ հնարավոր չէ նախապես պարզել, թե տվյալ երեխայի մոտ քանի դեղաչափ պատվաստումից կարող է առաջանալ ալերգիկ ռեակցիա։ Իսկ ծնողներին հորդորեց, որպեսզի երեխային չպատվաստվելու խորհուրդները ընդունելու դեպքում հաշվի առնեն նաեւ այդ խորհրդի գիտական հիմնավորվածությունը։

«Պետք է հիշել, որ պատվաստվելը ոչ միայն տվյալ անձի համար է կարեւոր, այլեւ շրջակա միջավայրի, քանի որ եթե տվյալ տարիքային խմբի 90 տոկոսը պատվաստվում է, ապա հիվանդության հարուցիչը շրջանառվելու հնարավորություն այլեւս չունի»,–ընդգծեց նա։

Նա հիշեցրեց, որ նույնիսկ 2010—2013թթ. հարեւան երկրներում գրանցված կարմրուկի եւ կարմրախտի խոշոր բռնկումը մեր հանրապետության բնակչության համար լուրջ սպառնալիք չէր։ Այդ ընթացքում գրանցվեց կարմրուկի ընդամենը 11 եւ կարմրախտի 4 դեպք, որոնք բոլորն էլ բերովի էին եւ համաճարակաբանորեն կապված էին Վրաստանում կարմրուկի բռնկման հետ։