Օգոստոսի 25-ից ուժի մեջ են «Հայաստանի Հանրապետությունում կիրառվող դեղատոմսային ձեւաթղթերը հաստատելու մասին» ՀՀ կառավարության 2001 թ. օգոստոսի 14-ի որոշման մեջ կատարված փոփոխությունները:

«Փաստինֆո»-ի փոխանցմամբ, ըստ այդմ, վերացվում է դեղատոմսային ձեւաթղթում բժշկի կողմից փաստաթուղթը կնիքով վավերացնելու, ինչպես նաեւ բժշկական կազմակերպության կնիքով հաստատելու պահանջը: Այսուհետ դեղատոմսը, այդ թվում նաեւ զեղչով դեղատոմսը, ուժի մեջ է այն դուրս գրող բժշկի ստորագրության առկայության դեպքում, եւ բժշկի անձնական ու բժշկական կազմակերպության կնիքների, դրոշմակնիքի առկայությունն այլեւս անհրաժեշտ պայման չի դիտվի: Ընդ որում` սա վերաբերում է ինչպես սովորական, այնպես էլ թմրադեղերի եւ հոգեմետ դեղերի համար նախատեսված դեղատոմսային ձեւաթղթերին:

Կնիքի պարտադիր պահանջի վերացումը պայմանավորված է «Դեղերի մասին» օրենքում ընթացիկ տարվա մարտի 19-ին կատարված փոփոխությամբ` կնիքների օրենսդրական պահանջի վերացմամբ: Մինչ այդ առկա օրենսդրության համաձայն՝ մի շարք փաստաթղթեր լրացնելիս կամ կազմելիս բժիշկը պարտավոր էր դրանք հաստատել կազմակերպության կնիքով, իսկ որոշ դեպքերում կնիքով վավերացնելը թողնված էր բժշկի հայեցողությանը:

Կառավարության հիմնավորմամբ, բժշկի կողմից կնիքի ձեռք բերումը ոչ միայն դանդաղեցնում է համապատասխան ծառայության մատուցումը, այլեւ կնիքի օգտագործումը, ինչպես ցույց է տվել փորձը, հավելյալ երաշխիք չի ստեղծում, որ փաստաթղթերը չեն կեղծվի: