Հետպատվաստումային բարդությունները կնվազեն։ Բանն այն է, որ զինծառայողների պատվաստումները 2014թ. ամառային զորակոչից կենտրոնական հավաքակայանի փոխարեն իրականացվելու են զինապարտների ամբուլատոր—պոլիկլինիկական բժշկական կազմակերպություններում՝ զորակոչման օրվանից 2—3 ամիս առաջ։ Դրանից հետո նորակոչիկը հնարավորություն կունենա լինելու տանը։
ՀՀ առողջապահության նախարարի տեղակալ Վահան Պողոսյանը երեկ հրավիրված ասուլիսի ժամանակ ասաց, որ պատվաստումներն իրականացնելու են վերջնական բուժզննությունից առաջ, որպեսզի նորակոչիկներն իրենց տներում այդ պատվաստումները ստանան եւ նոր զորակոչվեն բանակ։ «Նախկին կարգով պատվաստումներն արվել են վերջին փուլում, ինչից որոշակի բարդություններ եղել են, բայց լուրջ խնդիրներ չեն եղել»,–նշեց նա։

Փոխնախարարի տեղեկացմամբ՝ նոր կարգը կիրականացնեն ամառային զորակոչի ընթացքում։ Դրա համար համապատասխան կարգը կա, որոշումներն ընդունված են։
Նա նաեւ ընդգծեց, որ, բնականաբար, կարող են լինել անձինք, ովքեր հրաժարվեն այդ պատվաստումներից, բայց դա հիմք չի լինի ծառայությունից հրաժարվելու համար։

Պողոսյանը վստահեցնում է, որ այդ ամենն արվում է նրա համար, որպեսզի նորակոչիկներն առողջ վիճակում զորակոչվեն բանակ։ Միաժամանակ հավաստիացնում է, որ նոր որոշումը պայմանավորված չէ ձմեռային զորակոչի ընթացքում պատվաստումներից առաջացած բարդությունների աճով. «Սրա վերաբերյալ քննարկումները եղել են ձմեռային զորակոչից առաջ»։

Նախազորակոչային ու զորակոչային տարիքի անձանց առողջական վիճակի գնահատումը, բժշկական օգնության ու սպասարկման կազմակերպումը հանրապետության 44 տարածքային զինկոմիսարիատներում իրականացնում են բժշկական հանձնաժողովներում ընդգրկված 352 բժիշկ եւ 44 բուժքույր։

«2013 թվականին ընդգրկվել են նաեւ սրտաբաններ»,–տեղեկացրեց Պողոսյանը՝ բանակում ձմեռային զորակոչի ժամանակ արձանագրված թոքաբորբի դեպքերի վերաբերյալ ընդգծելով, որ ներկա պահին իրավիճակը հանգիստ է։

«Նախկինում կենտրոնական հավաքակայանում զորակոչիկները ստանում էին 6 պատվաստումներ, մենք այդ ցանկը վերանայել ենք ու որոշ չափով կրճատել, քանի որ դրանցից մեկ պատվաստումը՝ դիֆտերիայի եւ փայտացման դեմ արվողը, 15—16 տարեկանում մեր երեխաներն արդեն ստանում են եւ իմունիտետը պահպանվում է մոտ 10 տարի ու նորից անելն անիմաստ է»,–նշեց հիվանդությունների կանխարգելման ազգային կենտրոնի տնօրենի տեղակալ Գայանե Սահակյանը։

Վերջինս նաեւ տեղեկացրեց, որ հիմա զինակոչիկներին պատվաստելու են պնեւմակոկային եւ մենինգակոկային հիվանդությունների, հեպատիտ Ա—ի, տուլարեմիայի, կարմրուկի, կարմրախտի, խոզուկի դեմ։ Իսկ 2018 թվականից հետո կարմրուկի, կարմրախտի, խոզուկի դեմ արվող պատվաստումը կհանվի, քանի որ այդ տարվանից բանակ են զորակոչվելու այն տղաները, ովքեր այդ պատվաստումը 2002թ. որոշումից հետո պարտադիր ստացել են դեռ փոքր տարիքում։

Թամարա ՄՈՒՐԱԴՅԱՆ