Վերջին շաբաթների ընթացքում Առողջապահության համաշխարհային կազմակերպության եվրոպական տարածաշրջանի երկրներում գրիպի ակտիվությունը կտրուկ նվազել է։ Մի շարք երկրներում գրիպանման հիվանդություններով եւ սուր շնչառական վարակներով հիվանդացության ցուցանիշները եղել են հիվանդացության շեմից բավականին ցածր։ Այդ հիվանդությունների շարքում ցածր է եղել գրիպի վիրուսների հայտանբերումը։ Նվազել է նաեւ ծանր սուր շնչառական վարակներով հիվանդացությունը, սակայն նվազման ֆոնի վրա արձանագրվել է գրիպի լաբորատոր հետազոտությունների դրական արդյունքների աշխուժացում։

Առողջապահության համաշխարհային կազմակերպության տվյալներով՝ եվրոպական տարածաշրջանում ներկայումս շրջանառվում են գրիպի Ա տեսակի H1N1 պանդեմիկ եւ Ա H3N2 ենթատեսակները։ Ընթացիկ սեզոնում, նախորդ սեզոնի միեւնույն ժամանակահատվածի համեմատ, նկատելի նվազել է գրիպի Բ տեսակի հարուցիչների հայտնաբերումը։
Նմանատիպ իրավիճակ է դիտվում նաեւ տարածաշրջանի երկրներում՝ Ռուսաստանի Դաշնությունում, Վրաստանում, Ադրբեջանում, Թուրքիայում։

Հայաստանի Հանրապետությունում դիտվում է առաջնային բժշկական կազմակերպություններ սուր շնչառական վարակներով դիմելիության կտրուկ նվազում՝ համեմատած նախորդ տարվա միեւնույն ժամանակահատվածի հետ։ Երեւանի մանկական պոլիկլինիկաներում որոշակիորեն նվազել է 0—2 տարեկան երեխաների դիմելիությունը։
Ներկայումս ծանր սուր շնչառական վարակների եւ թոքաբորբերի բարդացած կլինիկական ընթացքով հիվանդներ չկան, հոսպիտալացված հիվանդները միջին ծանրության են, որոնք ստանում են համապատասխան բուժում։

Համաձայն իրականացված լաբորատոր հետազոտությունների արդյունքների, հանրապետությունում, հատկապես մանկական հասակի քանակակազմում, դեռեւս շրջանառվում են շնչառական այլ վարակների վիրուսները՝ ադենովիրուսներ, ռեսպիրատոր սինտիցիալ վիրուսներ, մետապնեւմովիրուսներ։

Նախորդ տարվա նույն ժամանակահատվածի համեմատ նվազել են սուր շնչառական վարակներով եւ թոքաբորբերով պայմանավորված շտապբուժօգնության կանչերը։

Ելնելով վերը նշվածից եւ գրիպի ու դրա բարդություններից խուսափելու նպատակով՝ ՀՀ առողջապահության նախարարությունը կրկին հիշեցնում է.

–խուսափե՛ք հիվանդների հետ շփումից,
–եթե հիվանդ եք, ապա մնացե՛ք տանը,
–եթե հիվանդ եք, հրավիրեք տեղամասային մանկաբույժին, թերապեւտին կամ ընտանեկան բժշկին, մի՛ զբաղվեք ինքնաբուժմամբ,
–հագնվե՛ք եղանակին համապատասխան,
–պահպանե՛ք հազի եւ փռշտալու վարվերակարգը,
–օգտագործե՛ք հնարավորինս շատ հեղուկներ,
–հաճախակի օդափոխե՛ք փակ տարածքները։