Մաշկի խնամքը, պայմանավորված տարվա եղանակների հետ, փոփոխվում է: Այդ իսկ պատճառով մաշկը գարնանը հատուկ խնամքի կարիք ունի: Panorama.am-ի թղթակցի հետ զրույցում կոսմետոլոգ Լուսինե Դավթյանը նշեց, որ, ձմռանից հետո դեմքի մաշկը միշտ վատ տեսք է ունենում, պատճառն այն է, որ ձմռանը քայքայվում է մաշկի ջրաճարպային պաշտպանիչ թաղանթը:

Արդյունքում, ըստ նրա, ջրազրկման հետևանքով մաշկը հեշտությամբ վնասվում է, դառնում չոր ու գրգռված, թեփոտվում, հայտնվում են նաև կորյակներ: Խոնավության պակասի հետևանքով չոր և նորմալ մաշկը գունատվում է, իսկ ճարպոտ մաշկը` լայնացած ծակոտիներ է ունենում, փայլը կորցնում է, ինչպես նաև` թեփոտվում:

Բացի դրանից, մաշկի հետ կապված խնդիրներն առաջանում են վիտամինների պակասից: Ուստի, ըստ կոսմետոլոգի, բացի մաշկի արտաքին խնամքից, պետք է հետևել նաև սննդին` լրացնելով օրգանիզմի համար խիստ անհրաժեշտ վիտամիններն ու միկրոտարրերը: Դրա համար անհրաժեշտ է ավելի շատ մրգեր ու բանջարեղեն ուտել:

Լ.Դավթյանը խորհուրդ է տալիս մաշկը պարբերաբար մաքրել` քսուքների և լվացումների միջոցով. չոր և նորմալ մաշկի դեպքում շաբաթը մեկ, իսկ ճարպոտի` շաբաթական երկու անգամ, որից հետո սնուցող և սպիտակեցնող դիմակներ դնել:

Կոսմետոլոգը առաջարկում է հետևյալ սնուցող դիմակը.

-Բանանի կեսը, մեկ ձվի դեղնուցը, մեկ թեյի գդալ ձիթապտղի յուղը խառնել իրար, քսել դեմքին, 15 րոպե հետո գոլ ջրով լվացվել:

Սնուցող դիմակ` չոր մաշկի համար.

-Մեկական ճաշի գդալ մեղրը և թթվասերը խառնեք, ավելացրեք մի քանի կաթիլ ձիթապտղի յուղ։ Քսեք դեմքին, 20 րոպե անց լվացեք տաք ջրով, իսկ հետո դեմքը ցայեք սառը ջրով:

Նորմալ յուղայնությամբ և խոնավությամբ մաշկով կանանց կոսմետոլոգը խորհուրդ է տալիս պարզապես պահպանել մաշկի առողջ հավասարակշռությունը: Նման մաշկի համար օգտակար են բանջարեղենի կամ մրգի հասարակ դիմակները: Տրորած ձվի դեղնուցի մեջ ավելացրեք մեկ թեյի գդալ ցանկացած թարմ քամած հյութ և տարածեք մաշկի վրա: Սկզբում այն դեմքից հեռացրեք գոլ, այնուհետև սառը ջրով:

Մաշկը վաղաժամ ծերացումից պաշտպանում և սնուցում են լոլիկով դիմակները: Այսպես, վերցրեք 1 հատ լոլիկ, 1 հատ ձվի դեղնուց, 1 ճաշի գդալ օսլա և խառնեք մինչև համասեռ խառնուրդ ստանալը: Այնուհետև քսեք այն դեմքին: 20 րոպե անց դեմքը սկզբում լվացեք գոլ, այնուհետև սառը ջրով:

Լ.Դավթյանը նշեց նաև, որ ուշ գարնանն արդեն կարելի է նոր հայտնված ցանկացած միրգը կամ հատապտուղը կտրել և քսել դեմքին, 15 րոպե անց սառը ջրով լվացվել:
Panorama.am