Էլեկտրոնային տեխնոլոգիաներն արագորեն զարգանում են ու գնալով ավելի շատ տեղ են զբաղեցնում մարդու առօրյայում։ Ռոբոտներն այսօր արդեն շատ բնագավառներում հուսալի օգնական են մարդու համար, սակայն ապագայում դրանք կդառնան է՛լ ավելի խելացի ու կյուրացնեն մի շարք մասնագիտություններ՝ գործազուրկ դարձնելով բազմաթիվ մարդկանց։ Չի բացառվում, որ տասնամյակներ անց հենց մարդիկ դառնան ռոբոտների օգնականները։

The Telegraph պարբերականը ներկայացրել է մասնագիտությունների ցանկ, որում ներառված աշխատանքները մոտ ապագայում կստանձնեն մեր Android «բարեկամները»։ Ըստ բրիտանական պարբերականի՝ ապագայում տեխնոլոգիաների զարգացման հետևանքով ռոբոտները կկարողանան գնացք վարել, տաքսու վարորդ աշխատել, ստանձնել դռնապանի գործը, դառնալ տիեզերագնաց, հավաքարար, ուսուցիչ կամ դասախոս, լաբորատորիայի աշխատակից, դեղագործ, անվտանգության աշխատակից և օդաչու։

The Telegraph-ը հավելում է, որ ռոբոտների չափազանց զարգացումը լուրջ սպառնալիք է մարդու համար, քանի որ, երբ նրանք մեզնից առավել խելացի դառնան, ապա մենք կարող ենք հայտնվել ենթարկվողի դերում։

Աղբյուրն ընդգծում է նաև, որ անչափ կարևոր է, որ միայն ժողովրդավար պետությունները տեխնիկապես զարգանան և թույլ չտան բռնապետությւոններին առաջընթաց ունենալ այդ ասպարեզում։ Եթե նման բան տեղի ունենա, ապա չի բացառվում, որ բռնապետները ստեղծեն մարդասպան ռոբոտների բանակ, որը միայն չարիք կբերի մարդկությանը։
tert.am