«The Lancet» բժշկական ամսագիրը հրապարակել է «Երեխաների ծնվելու համար որո՞նք են աշխարհում ամենաանվտանգ երկրները» հետազոտության արդյունքները։ «The Guardian» պարբերականի փոխանցմամբ, ըստ հետազոտության տվյալների, ավելի քան 5.5 մլն երեխա տարեկան ծնվում ու մահանում է առանց մահվան կամ ծննդյան վկայականի։

Հետազոտությունն անց է կացվել 195 երկրներում։ Հետազոտության արդյունքներով առանձնացվել են ծնելիության համար ամենավտանգավոր եւ ամենաանվտանգ երկրները, ինչպես նաեւ այն երկրները, որտեղ քիչ հավանական է ծննդյան վկայական ստանալը։

Հայաստանը հայտնվել է «նախքան մեկ տարին լրանալը երեխային ծննդյան վկայական տվող երկրների» ցանկում՝ 100% ցուցանիշով, մանկաբարձների որակյալ աշխատանքով նույնպես Հայաստանն ունի 100% ցուցանիշ։ Ինչ վերաբերում է նորածինների մահացությանը, ապա 1000 նորածինների շրջանում Հայաստանը 10.1 ցուցանիշով 99—րդ տեղում է։

Ադրբեջանը «մինչեւ մեկ տարին լրանալը երեխային ծննդյան վկայական տվող» երկրների ցանկում ունի 88% ցուցանիշ, նույն արդյունքն ունի մանկաբարձների որակյալ աշխատանքով՝ 88%, իսկ 1000 նորածինների հաշվով Ադրբեջանը 10.9 ցուցանիշով 124—րդ տեղում է։

Թուրքիան մինչ երեխայի ծնունդը գրանցող երկրների ցանկում 91%, մանկաբարձների որակյալ աշխատանք ունեցող երկրների ցանկում 89%, իսկ 1000 նորածինների մակարդակում մահացության 8.5 ցուցանիշով 136—րդ տեղում է։

Սիերա—Լեոնեն ամենավտանգավոր երկիրն է ծնունդների համար, որտեղ նորածինների մահացությունը 2012թ. կազմել է 49.5 հազար։ Նրան հաջորդում են Սոմալին, Գվինեա—Բիսաուն, Անգոլան, Լեսոտոն եւ այլ երկրներ։
Նորածինների մահացության ամենաբարձր ցուցանիշն ունեն Հարավային Ասիան եւ Սահարայից հարավ ընկած Աֆրիկան։

Երեխայի ծննդյան համար ամենաանվտանգ երկրներն են Ճապոնիան, Սինգապուրը, Կիպրոսը, Էստոնիան, Ֆինլանդիան, Կորեան, Շվեդիան, Նորվեգիան եւ Պորտուգալիան։