ՀՀ կառավարության կողմից 2013 թվականի վերջին ընդունված որոշման համաձայն` սոցիալական փաթեթի առողջապահական բաղադրիչը փոխանցվել է ՀՀ առողջապահության նախարարությանը:

Լրատվամիջոցների հետ հանդիպման ժամանակ, ներկայացնելով սոցիալական փաթեթի շահառուների պետության կողմից երաշխավորված անվճար բժշկական օգնության ու սպասարկման կազմակերպման մանրամասները, ՀՀ ԱՆ աշխատակազմի Պետական առողջապահական գործակալության պետ Սարո Ծատուրյանը հայտնեց, որ սոցիալական փաթեթի շահառուները շարունակելու են օգտվել նույն ծառայություններից, նույն սոցիալական փաթեթի շրջանակում, սակայն այդ գործընթացի կազմակերպումը և հետագա ծախսերի փոխհատուցումը իրականացվելու է առողջապահության նախարարության միջոցով:

2014-ն անցումային տարի է սոցիալական փաթեթի համար: Ներկա փուլում կան բազմաթիվ շահառուներ, ովքեր պայմանագրեր ունեն ապահովագրական ընկերությունների հետ և որոնք շարունակելու են գործել մինչև ժամկետի ավարտը: Այն պահից սկսած, երբ շահառուն դադարում է ունանալ գործող պայմանագիր, այսինքն` լրանում է տվյալ պայմանագրի ժամկետը` բուժօգնության կազմակերպման ընթացքը կիրականացնի առողջապահության նախարարությունը»,- պարզաբանեց Ծատուրյանը:

Նրա խոսքով` արդեն 2015 թվականից բոլոր շահառուների սոցիալական փաթեթի առողջապահական բաղադրիչի իրականացումն իր վրա կվերցնի առողջապահության նախարարությունը:

«Սոցփաթեթը չի փոխվում, ծառայությունները նույնն են, սակայն անցումով ավելի ընդլայնվում է շահառուների կողմից ընտրվող բժշկական կազմակերպությունների ցանկը»,- ընդգծեց ՊԱԳ-ի տնօրենը:

Ի տարբերություն մասնավոր ապահովագրական ընկերությունների միջոցով նախկինում ծրագրի իրականացման, երբ շահառուները, որպես կանոն, ուղղորդվում էին սահմանափակ թվով բժշկական կազմակերպություններ՝ առողջապահության նախարարությունը ծրագրի շրջանակներում պայմանագրեր է կնքել պետական պատվեր իրականացնող շուրջ 100 հիվանդանոցի հետ՝ ինչպես Երևանում, այնպես էլ Հայաստանի բոլոր մարզերում, ինչը զգալիորեն ընդլայնում է սոցփաթեթի շահառուների ընտրության հնարավորությունը:

Համաձայն «Բնակչության բժշկական օգնության և սպասարկման մասին» ՀՀ օրենքի 5-րդ հոդվածի՝ յուրաքանչյուր ոք իրավունք ունի ընտրել բժշկական օգնություն և սպասարկում իրականացնողին, և այդ իրավունքը երաշխավորվելու է նաև սոցփաթեթի շահառուներին ուղեգրեր տրամադրելու ընթացքում: Բացի այդ, սոցփաթեթի առողջապահական փաթեթի տրամադրման, ցուցաբերված ծառայությունների որակի վերահսկողության նպատակով առողջապահության նախարարության պետական առողջապահական գործակալությունում ստեղծվել է նոր բաժին՝ բժշկական օգնության մշտադիտարկման և փորձագիտական գնահատման համար:

Ինչպես հայտնում է Հայաստանի Հանրապետության Առողջապահության նախարարության պաշտոնական կայքը, մինչ հավաստագրերի տպագրությունը և լիարժեք բաշխումը շահառուն անհրաժեշտության դեպքում կարող է դիմել բժշկական կազմակերպություն` ներկայացնելով աշխատավայրից տեղեկանք սոցիալական փաթեթի շահառու լինելու վերաբերյալ: Ծրագրի շրջանակներում պետության կողմից երաշխավորված անվճար բժշկական օգնություն ու սպասարկում ստանալու համար շահառուները պետք է բժշկական կազմակերպություն ներկայացնեն նաև ուղեգիր՝ համաձայն որոշման հավելված 1-ով հաստատված N 1 ձևի (որը տրվում է տվյալ շահառուին սպասարկող առողջության առաջնային պահպանում իրականացնող բժշկական կազմակերպության կողմից):

«Քաղաքացին կարող է դիմել իրեն սպասարկող տարածքային բուժհաստատություն և ստանալ ուղեգիր: Ուղեգրման մեխանիզմի կարգը երաշխիք է, որ տվյալ մարդը չի կարող բուժում ստանալ ամբուլատոր պոլիկլինիկական պայմաններում»,- հավելեց Ծատուրյանը: