«Բոլորս արձանագրեցինք, որ դեղերի ոլորտում իսկապես լուրջ խնդիրներ կան, որոնք պետք է կանոնակարգվեն։ Այդ ուղղությամբ սա ամենակարեւոր քայլն է՝ դեղերի ոլորտում մայր օրենքի մշակումն ու ընդունումը, որին պետք է հաջորդի բազմաթիվ ենթաօրենսդրական ակտերի մշակումը։ Այս նախագծում ամրագրված դրույթներով դեղերի շրջանառության ոլորտում պետական քաղաքականության հիմնական ուղղություններն են որակյալ եւ անվտանգ դեղերով բնակչության ապահովումը, դեղերի ֆիզիկական եւ տնտեսական մատչելիությունը, դեղերով ապահովման սոցիալական արդարության սկզբունքների ամրագրումը, դեղերի տեղական արտադրության խթանումը եւ այլն։
Վերջին երկու ամսվա ընթացքում նախագիծը քննարկվել է դեղ ներմուծող բազմաթիվ ընկերությունների ներկայացուցիչների, դեղ արտադրողների, ինչպես նաեւ դեղագործական ֆիրմաների հայաստանյան ներկայացուցչությունների հետ։ Քննարկումների արդյունքում արված առաջարկությունների հիմնական մասն արդեն ներառված է այսօր ներկայացվող նախագծում»,– ասաց Դերենիկ Դումանյանը, բացելով ՀՀ առողջապահության նախարարին կից կոլեգիայի երեկ տեղի ունեցած նիստը, որտեղ քննարկվեց «Դեղերի մասին» ՀՀ օրենքի նախագիծը։
ՀՀ ԱՆ Դեղերի եւ բժշկական տեխնոլոգիաների փորձագիտական կենտրոնի փոխտնօրեն Լիլիթ Ղազարյանը, կոլեգիայի անդամներին ներկայացնելով օրենքի նախագիծը, ընդգծեց, որ դեղը յուրահատուկ ապրանք է եւ այն գնահատելու համար սովորական զգայական ընկալումները բավարար չեն։
Խիստ կարեւոր է, որ դեղն անվտանգ եւ որակյալ լինելուց բացի լինի արդյունավետ։ Դեղը պահանջում է արտադրության, տեղափոխման, պահպանման եւ անգամ ոչնչացման հատուկ պայմաններ։
Տարեցտարի դեղի արտադրության եւ դրա կիրառության ընդլայնումը մեծացնում է դեղարտադրողների գայթակղությունը կեղծման եւ անօրինական ճանապարհով գերշահույթներ ստանալու ուղղությամբ։ Արդի միջպետական հակամարտության պայմաններում դեղը կարող է օգտագործվել որպես կենսաահաբեկչության միջոց։ Այս եւ այլ հանգամանքների պարտադրանքով մշակվել է դեղերի մասին նոր օրենքի նախագիծ, որի ընդունմամբ պայմանավորված՝ գործող մի շարք օրենքներում փոփոխություններ կատարելու անհրաժեշտություն եւս կառաջանա։
Նախագծում ամրագրված դրույթներով՝ արտացոլվում են դեղերի կենսաշրջանառության ողջ շղթայում պետական քաղաքականության հիմնական ուղղությունները։ Դրանք են՝ շրջանառության տարբեր մակարդակներում դեղերի նկատմամբ միջազգայնորեն ընդունված որակի պահանջների ապահովումը, դեղերի գների պետական կարգավորումը եւ հսկման ուժեղացումը, բնակչության խոցելի խմբերին արտոնյալ պայմաններով դեղերի հատկացումը, դեղերի գրանցման եւ վերագրանցման ընթացակարգերի պարզեցումը եւ արդիականացումը, նոր դեղերի ստեղծման էթիկական մոտեցումների սահմանումը, դեղերի ներմուծման, պահպանման եւ տեղական արտադրության արտահանման սկզբունքները, դեղերի մեծածախ եւ մանրածախ իրացման պայմանների եւ պահանջների սահմանումը, դեղերի վերաբերյալ ամբողջական, անկողմնակալ եւ բացառապես հավաստի տեղեկատվության ապահովումը, դեղերի շրջանառության ոլորտում պետության կողմից իրականացվող համապարփակ հսկողության մեխանիզմների արդիականացումը, ինչպես նաեւ սահմանված կանոնների խախտումների նկատմամբ պատասխանատվության միջոցների ապահովումը։
Կոլեգիայի անդամներ Արա Բաբլոյանը, Վիլեն Հակոբյանը, Աստղիկ Միրզախանյանը հանդես եկան կարծիքներով եւ առաջարկներով։ Արա Բաբլոյանը, նշելով, որ լուրջ աշխատանքի արդյունքում հաջողված նախագիծ է պատրաստվել, առաջարկեց, որպեսզի Ազգային ժողովի առողջապահության հանձնաժողովի գալիք քննարկմանն աշխատանքային խմբի 2—3 անդամ մասնակցի։
«Այս օրենքի ընդունումը խիստ արդիական է եւ, կարելի է ասել, նույնիսկ՝ ուշացած։ Այսօր կայացած նիստի ընթացքում արված բոլոր առաջարկությունները կքննարկվեն իրավաբանների ու փորձագետների հետ, եւ ընդունելի առաջարկները կընդգրկվեն նախագծում։ Մենք այլեւս ժամանակ կորցնելու իրավունք չունենք եւ կառավարությունում եւ Ազգային ժողովում քննարկումներին զուգահեռ կշարունակենք աշխատել ենթաօրենսդրական ակտերի վրա։ Իսկ մինչ այդ նախագիծը կուղարկվի պատկան բոլոր մարմիններին, մարզերի մեր գործընկերներին՝ նրանց կարծիքներն ու առաջարկությունները եւս ստանալու նպատակով։ Նախագիծը նաեւ կտեղադրվի նախարարության պաշտոնական կայքում։ Պատրաստ ենք լսելու բոլորի կարծիքը։ Մենք շատ կարեւոր մի գործի հիմնաքարն ենք դնում»,–ամփոփելով կոլեգիայի նիստը, ասաց նախարար Դումանյանը։
Կոլեգիան հավանության արժանացրեց ներկայացված «Դեղերի մասին» ՀՀ օրենքի նախագիծը եւ որոշեց նիստի ընթացքում կատարված առաջարկությունների ու դիտողությունների հիման վրա փաստաթուղթը լրամշակելուց հետո ներկայացնել ՀՀ կառավարություն։