Հայկական դեղագործական ընկերություններն անցած 11 ամիսների ընթացքում արտադրել են շուրջ 5,5 մլն դոլարի դեղորայք։ Ընդ որում, հայրենական դեղարտադրողների արտադրանքի ավելի քան 50 տոկոսն արտահանվել է տարբեր երկրներ՝ հիմնականում ԱՊՀ տարածք։ NEWS.am-ի թղթակցի հետ զրույցում նման տվյալներ ներկայացրեց Հայաստանի դեղարտադրողների եւ ներմուծողների (ԴԱՆ ) միության տնօրեն Սամվել Զաքարյանը։

Նա թեպետ դժվարացավ նշել, թե կոնկրետ ինչ քանակությամբ դեղամիջոցներ են արտադրվել 2010-ի ընթացքում,սակայն հատկանշական համարեց այն, որ տեղական շուկայի դեղամիջոցների 10-12 տոկոսը հայկական արտադրության է։

«Դեղորայքի մնացած խմբաքանակը ներմուծվում է տարբեր երկրներից՝ ինչպես Եվրամիության անդամ հանդիսացող, այնպես էլ նախկին խորհրդային տարածքից։ Բայց լինում է նաեւ այնպես, որ նույն այդ երկրներից, բացի կոնկրետ դեղամիջոցներից, ներմուծվում են նաեւ որոշ պրեպարատների առանձին բաղադրիչներ»,- ասաց Սամվել Զաքարյանը։

Նա հատկանշական համարեց նաեւ այն հանգամանքը, որ մեր երկրում արտադրվող դեղերը, արտասահմանյանների հետ համեմատած, էժան են մինչեւ 5 անգամ, ընդ որում, չեն զիջում նաեւ իրենց որակով։

Ամփոփելով՝ Հայաստանի դեղարտադրողների եւ ներմուծողների միության տնօրենը հավաստիացրեց, որ հայկական դեղորայքի արդյունավետությունն ինքը զգացել է սեփական «մաշկի վրա»։ «Հենց հիմա հիվանդ եմ, արտասահմանյանների հետ զուգահեռ, հայկական դեղեր էլ եմ խմում. կարծես օգնում են»,- ասաց նա:

Նշենք, որ թե՛ տեղական, թե՛ ներմուծված դեղամիջոցներն անցնում են ՀՀ առողջապահության նախարարության՝ դեղերի որակի վերահսկման հատուկ գործակալության կողմից իրականացվող միեւնույն փորձաքննությունը։ Դեղորայքը շուկայում հայտնվում է միայն գործակալության կողմից տրվող հատուկ լիցենզիայի առկայության պարագայում։