Հայաստանում էնտերովիրուսային վարակներով պայմանավորված հիվանդությունները թեթևակի ակտիվացել են, սակայն դա չի նշանակում, որ մենք գործ ունենք համաճարակի հետ: Այս մասին այսօր լրագրողների հետ հանդիպման ժամանակ ասաց Հիվանդությունների վերահսկման և կանխարգելման ազգային կենտրոնի գլխավոր տնօրենի խորհրդական, ՀՀ ԱՆ իմունականխարգելման ազգային ծրագրի ղեկավար Գայանե Սահակյանը:

Նրա խոսքերով` այս տարի արձանագրվել է էնտերովիրուսային վարակի 90 դեպք, ինչը նախորդ տարվա համեմատ 20-25-ով ավելի է: Դեպքերը գրանցվել են մինչև 18 տարեկանների շրջանում, գերազանցապես` 3-8 տարիքային խմբում: Հիվանդներն արագ ապաքինվում են` առավելագույնը հոսպիտալացվում են 10 օր: Հիվանդացման դեպքերը եզակի են, խմբակային դեպքեր չեն գրանցվել:

Գ.Սահակյանն ասաց, որ էնտերովիրուսային վարակների բռնկումները կանխելու և հիվանդացությունը վերահսկելու նպատակով առողջապահության նախարարությունն իրականացնում է յուրաքանչյուր կասկածելի դեպքի համաճարակաբանական հետազոտություն, կոնտակտավորների նկատմամբ սահմանվում է հսկողություն, օջախում իրականացվում է ախտահանում: Այն հիմնականում իրականացվում է մանկական նախադպրոցական, ամառային հանգստի կազմակերպություններում` կասկածելի դեպքերի վաղ հայտնաբերման նպատակով:

Ըստ նրա` էնտերովիրուսային վարակը նոր չէ Հայաստանում, էնտերովիրուսները վաղուց հայտնաբերված հարուցիչներ են և ﬕշտ էլ գոյություն են ունեցել: Սակայն այսօր, ըստ Գ.Սահակյանի, Հայաստանում լաբորատոր ախտորոշումը բարելավվել է, և առաջին իսկ դեպքերից սկսել են համապատասխան կանխարգելիչ ﬕջոցառուﬓեր իրականացնել:

Մասնագետի խոսքերով` հիվանդությունը սկսվում է բարձր ջերմությամբ, անտանելի գլխացավով, նկատվում է թուլություն, որովայնի հատվածում ցավեր, անզուսպ փսխումներ: Հիվանդությունը, հիմնականում փոխանցվում է բերանի խոռոչով, բայց կարող է փոխանցվել նաև շնչառական ուղիներով՝ օդակաթիլային եղանակով, ինչպես նաև կենցաղային ճանապարհով՝ ձեռքերի միջոցով:

«Այսինքն` հիվանդության ներթափանցման ուղիները շատ են, ուստի մենք չենք կարողանում հասկանալ, թե կոնկրետ ինչ ճանապարհով է մեր երկրում այն տարածում գտնում»,- ասաց Գ.Սահակյանը:

Նա նշեց, որ էնտերովիրուսները կայուն են արտաքին միջավայրում` մակերեսային ջրամբարների ջրերում և խոնավ հողում կարող են պահպանվել մինչև 2 ամիս: Տարիքային և սեզոնային որևէ օրինաչափություն չկա. հիվանդանում են բոլորը, տարվա բոլոր եղանակներին: Հիվանդության առանձնահատկությունը նաև այն է, որ մարդը կարող է վիրուսը կրել, բայց ոչ մի ախտանիշ չլինի նրա մոտ:

«Սա համաճարակաբանական տեսանկությունից վտանգավոր է, քանի որ որևէ ախտանիշ չկա, բայց մարդը վիրուսը արտազատում է միջավայրում, ինչը նպաստում է վարակի տարածմանը: Ուստի այն անկառավարելի հիվանդություն է և մենք չենք հասկանում, թե ինչի հետ գործ ունենք»,- ասաց Գ.Սահակյանը:

Նշվեց նաև, որ վիրուսի նկատմամբ ողջ աշխարհում չկա ստեղծված պատվաստանյութ:

Այդուհանդերձ, ըստ մասնագետի, Հայաստանում իրավիճակը վերահսկելի է, պետք չէ խուճապի մատնվել: Հայաստանում պիկի ժամանակահատվածը հունիսի կեսերն էր, արդեն հատել ենք այդ ժամանակահատվածը:

Նշենք, որ մի շարք երկրներում՝ Ռուսաստանում, Չինաստանում, Ճապոնիայում, ԱՄՆ-ում, Վրաստանում հիվանդությունների բավական մեծ թվով դեպքեր են արձանագրվել: Գ.Սահակյանը նկատեց, որ Վրաստանում համաճարակային իրավիճակը կայունացել է, դեպքերը աստիճանաբար նվազում են:

Մասնագետը խորհուրդ տվեց խիստ պահպանել ձեռքերի հիգիենան: Եթե տանը կա հիվանդ, ապա նրան չխնամել ողջ ընտանիքով, պետք է մեկը խնամի և հնարավորության դեպքում օգտագործել ախտահանիչներ: Ծնողներին էլ հորդորեց, որպեսզի իրենց երեխաներին թույլ չտան լողանալ ջրամբարներում:
panorama.am