Հայաստանում ոսկրածուծի փոխպատվաստման կենտրոն է բացվելու: Այս մասին այսօր ասաց Արյունաբանական կենտրոնի տնօրեն, պրոֆեսոր Սմբատ Դաղբաշյանը` կենտրոն այցելած տարբեր երկրների մասնագետների հետ հանդիպման ժամանակ:

Հանդիպման ընթացքում TEMPUS «Կենսական գիտությունների և բժշկության բնագավառներում հեմատոլոգիայի ուսումնական ծրագրերի մշակում և տարածաշրջանային ուսուցողական հարթակի ստեղծում» ծրագրի համալսարանների կոնսորցիումի մասնակիցները ծանոթացան hիվանդանոցի պայմաններին, ինչպես նաև հետևեցին կենտրոնի արյունաբանների աշխատանքին:

«Նախատեսվում է, որ 2 տարի հետո Արյունաբանական կենտրոնում բացվելու է ոսկրածուծի փոխպատվաստման և բարձր դեղաչափային քիմիոթերապիայի բաժանմունք, ուստի անհրաժեշտություն կա կրթել այն մասնագետներին, ովքեր իրականացնելու են ոսկրածուծի փոխպատվաստում»,- ասաց Ս.Դաղբաշյանը` հավելելով, որ կենտրոնի բացումը հնարավորություն կտա, որպեսզի ոսկրածուծի փոխպատվաստման կարիք ունեցող մարդիկ կարողանան հնարավորինս շուտ իրենց անհրաժեշտ բուժումը ստանալ Հայաստանում:

Պրոֆեսոր Գուգլիեմո Մարիանին, որ եկել է Ւտալիայի «Ֆերարա» (Ferrara) համալսարանից, արդեն 15 տարի Տեմպուս ծրագրով ամբողջ աշխարհում ուսուցանում է արյունաբանության ոլորտի իր գիտելիքները: Հիմա հայկական կրթական ծրագրերում ու բժշկական պրակտիկայում փոփոխություններ կլինեն նաև իտալացի մասնագետի խորհրդով:

«Մենք ցանկանում ենք Հայաստանում ներդնել այն ծրագրերն ու բուժական մեթոդները, որոնք կիրառվում են եվրոպական առաջատար երկրներում»,- ասաց նա:

Նինո Պոռակաշվիլին, ով Հայաստան է ժամանել Մեծ Բրիտանիայից, նշեց, որ, Հայաստան այցի նպատակն է արյունաբանության բնագավառում նոր ծրագրեր մշակել: «Մեր խմբում կան այնպիսի մասնագետներ, ովքեր հենց տարբեր երկրներում հիմնադրել են ոսկրածուծի փոխպատվաստման կենտրոններ: Հուսով եմ, որ նրանք կօգնեն արյունաբանական կենտրոնի տնօրենին` իրականացնել կարևոր այս քայլը նաև Հայաստանում»,- նշեց նա:

Սմբատ Դաղբաշյանն էլ նկատեց, որ Արյունաբանական կենտրոնում բժիշկների վերապատրաստման ծրագրերը շարունակական են լինելու:

«Արտասահմանցի արյունաբանները նրանց կուսուցանեն այստեղ կամ` իրենց երկրների բուժկենտրոններում: Բժշկական համալսարանի ուսանողներն էլ արյունաբանության գաղտնիքները կսովորեն նաև եվրոպական չափանիշներով»,- ասաց նա:

Քիմիաթերապիա, դեղորայք, դոնորական արյուն. այսպիսին է Հայաստանում բուժման մեթոդը, երբ բժշկական ախտորոշումը լեյկոզ է կամ` արյան չարորակ այլ հիվանդություն:

«Եթե այս տարբերակներն արդյունք չեն տալիս, վերջին հնարավորությունը ոսկրածուծի կամ ցողունային բջիջների փոխպատվաստումն է, ինչը մեր երկրում մինչ օրս չի իրականացվել, իսկ արտասահմանում բավականին թանկ միջամտությունը ոչ բոլորի համար է հասանելի: Այսօր արդեն կարող ենք ասել, որ երկու տարի հետո մեր հիվանդների համար կենսատու բջիջները հնարավոր կլինի փոխպատվաստել հենց այստեղ ու հենց մեր բժիշկների ձեռքով»,- ասաց Ս.Դաղբաշյանը:

Նշենք, որ TEMPUS ծրագիրը կոչված է Եվրոմիության անդամ երկրներում բարելավել բարձրագույն կրթական համակարգը: Ծրագրի նպատակն է բարելավել արյունաբանության ուսուցումը՝ գործող ուսումնական ծրագրերի բարելավման, նոր ուսումնական ծրագրերի մշակման, տեխնիկական վերազինման, հեմատոլոգիայում գործող բուժման պրոտոկոլների և ստանդարտների արդիականացման և Եվրամիության բուհերում մասնագետների վերապատրաստման միջոցով:
Panorama.am