2014 թ. առաջին կիսամյակի տվյալներով, Երեւանի «Շտապ օգնության» ծառայությունը ստացել եւ սպասարկել է շուրջ 113 հազար 272 կանչ, ինչը 898–ով ավելի է անցյալ տարվա համեմատ։ Արձանագրված կանչերի արդյունքում հոսպիտալացվել է 21 333 քաղաքացի, ինչը եւս 455–ով ավելի է նախորդ տարվա նույն ժամանակահատվածի համեմատ։ Մանկական կանչերի թիվը նվազել է 747—ով՝ կազմելով 10620 կանչ, որոնցից հոսպիտալացվել է 3656–ը։ Այս տվյալները, որոնք ամփոփվեցին երեկ, ներառում են հունվարի 1—ից մինչեւ հուլիսի 1—ն ընկած ժամանակահատվածը։

Երեւանի «Շտապ բուժօգնություն» ՓԲԸ—ի տնօրեն Թագուհի Ստեփանյանի տեղեկացմամբ, կանչերի թիվն օրական հասնում է մինչեւ 650—ի։ Դրանք հիմնականում արձանագրվում են կեսգիշերին։ Կանչերի ընդհանուր բնույթը շարունակում է մնալ նույնը, առավել գերակշռող են սրտանոթային հիվանդությունները, որոնց թիվը 30 658 է, ինչը 5 924—ով ավելի է նախորդ տարվա նույն ժամանակահատվածի համեմատ։ Արձանագրվել է սուր աղիքային ինֆեկցիաների 182 կանչ։ Շատ են եղել նաեւ սննդային թունավորումները, որոնք ընդհանուր առմամբ կազմել են 700 դեպք՝ նախորդ տարվա 638—ի փոխարեն։ Եղել են թունավորումներ նաեւ ալկոհոլային խմիչքից, ուտեստների անհամադրելիությունից եւ այլն։

Իսկ աղիքային ինֆեկցիաների պարագայում 199 դեպք եղել է մեծահասակների, իսկ 193 կանչ՝ երեխաների շրջանում, որոնցից 4—ը հոսպիտալացվել է համապատասխան սպասարկում անցնելուց հետո։ Սուր շնչառական ինֆեկցիաների շրջանակներում 209 զանգ հնչել է մեծահասակների, իսկ 339 կանչ՝ մանկահասակների շրջանում, որից 71 երեխա տեղափոխվել է հիվանդանոց։

Մարտ ամսից հունիսն ընկած ժամանակահատվածում կանչերի թիվն ավելի քիչ է եղել 2013թ. նույն ժամանակահատվածի համեմատ։ Իսկ ընդհանուր առմամբ, կանչերի թվի ավելացումը ըստ Թագուհի Ստեփանյանի՝ պայմանավորված է ե՛ւ բուժօգնության սպասարկման բարելավման, ե՛ւ բնակչության շրջանում վստահության բարձրացման գործոններով։ «Այսօր ունենք բավական լուրջ, տեխնիկապես հագեցած եւ կայացած ծառայություն։ Շտապօգնության մեքենաների հագեցված սարքավորումների շնորհիվ այսօր հնարավոր է ախտորոշել ցանկացած հիվանդություն եւ ճշգրիտ իրականացնել առաջին բուժօգնությունը»,–ասաց նա։

Անհետաձգելի կանչերի պարագայում ներկայումս շտապ բուժօգնություն է ցուցաբերվում առավելագույնը 7—15 րոպեների ընթացքում։ Այդ ժամանակահատվածը ընդունվել է որոշ չափորոշիչների համաձայն։ Սակայն կան նաեւ մեծաքանակ կանչեր, որոնք ըստ կարգավարի տարանջատվում են ըստ առաջնայնության։ Ըստ որակավորման, առաջնային են համարվում սրտի ինֆարկտներն ու կաթվածները, ուշագնացությունները, ճնշման կտրուկ տատանումները։ «Այս պատահարների ժամանակ շտապ բուժօգնություն ցուցաբերվում է անհապաղ, իսկ զուտ գանգատների դեպքում՝ ատամնացավերի, գլխացավերի կամ վնասվածքների պարագայում կանչերի ընթացքը կարող է մի փոքր երկարել»,–տեղեկացրեց ծառայության ղեկավարը։

Ինչ վերաբերում է «Շտապ բուժօգնության» ծառայության նկատմամբ հնչող բողոքներին, ապա Թ. Ստեփանյանը վստահեցրեց, որ դրանք քիչ են։ 6 ամսվա տվյալներով՝ թեժ գծով հնչել է հիմնականում 10—15 բողոք, որոնք կապված են եղել բուժանձնակազմի՝ հիվանդներին հատկացված սահմանափակ ժամանակի հետ։ «Շատ տարեցներ ցանկանում են, որ բուժաշխատողներն իրենց մոտ երկար մնան, սակայն բժիշկը հիվանդի մոտ պետք է անցկացնի շուրջ 20 րոպե։ Կամ բողոքներ են հնչում, թե տանն ինչու այլ բուժօգնության ծառայություններ չեն իրականացվում։ Մենք պետք է կարողանանք լսել եւ վերլուծել յուրաքանչյուր բողոք։ Եղել են հիմնավորված բողոքներ, որոնց ընթացքում բուժաշխատողներից ոմանք ենթարկվել են վարչական տույժի»,–նշեց Թ. Ստեփանյանը։

Նշենք, որ շտապ բուժօգնությունն իրականացվում է բացառապես անվճար, սակայն Թագուհի Ստեփանյանի տեղեկացմամբ, կան նաեւ ծառայություններ, որոնք պետպատվերի շրջանակներից դուրս են։ Վճարովի ծառայություններ են համարվում շտապ բուժօգնության ծառայության հերթապահությունը տարատեսակ միջոցառումներին, մարզերից հնչած կանչերը, մահացած մարդկանց տեղափոխումը, հիվանդանոցից հիվանդի տեղափոխումը տուն կամ այլ բուժհաստատություն եւ այլն։

Ծառայության համակարգում աշխատում է շուրջ 650 մարդ, իսկ միայն բուժական գործընթացներում ներգրավված է 550 աշխատակից։

Լուսինե ՆԱԶԱՐՅԱՆ