Կառավարությունը երեկ «Ալյանս» ազատ տնտեսական գոտու «ՌԱՕ Մարս» տարածքում երեք տարի ժամկետով դեղագործական գործունեության իրականացման համար շահագործողի թույլտվություն տվեց «Ֆարմատեք» ընկերությանը։ Ըստ էկոնոմիկայի նախարար Կարեն Ճշմարիտյանի, շահագործողի թույլտվության գործողության ժամկետը սահմանվեց 3 տարի՝ երկարաձգելու հնարավորությամբ։
Նկատենք, որ արդեն մշակվել եւ արդեն ընդունվել է ազատ տնտեսական գոտիների գործունեությունը ապահովող օրենսդրական դաշտը, շահագործողին ներկայացվող պահանջները, շահագործողներին թույլտվության տրամադրման եւ դադարեցման կարգը։

Կառավարության 2003թ. որոշմամբ «ՌԱՕ ՄԱՐՍ» ՓԲԸ եւ «ԵրՄՄԳՀԻ» ՓԲԸ տարածքներում ստեղծվել է ազատ տնտեսական գոտին, 2013թ. օգոստոսի 1—ին գործարկվել է «Ալյանս» ազատ տնտեսական գոտին, 2013թ. օգոստոսի 14—ին էկոնոմիկայի նախարարության եւ «Սիտրոնիկս Արմենիա» ընկերության միջեւ կնքվել է վերոնշյալ ազատ տնտեսական գոտու կազմակերպման մասին պայմանագիրը, ինչը հնարավորություն է տալիս սկսելու ազատ տնտեսական գոտում շահագործման թույլտվություն ստանալու համար հայտերի ընդունման գործընթացը։ Ներկա դրությամբ «Ալյանս» ազատ տնտեսական գոտում կա արդեն 2 շահագործող։

Կարեն Ճշմարիտյանը համոզմունք հայտնեց, որ «Ալյանս» ազատ տնտեսական գոտում շահագործողների գործունեությունը հնարավորություն կընձեռի ներգրավելու ներդրումներ, նպաստել տվյալ հատվածում հայկական ապրանքանիշի ճանաչմանն ու տարածմանը։

«Ֆարմատեքի» թիրախային ոլորտներն են դեղորայքի արտադրությունը, դեղագործության մեջ կիրառվող պարագաների արտադրությունը, դեղագործական սարքավորումների մոդելավորումն ու հավաքումը։ Ընկերությունն ուզում է ընդլայնել սեփական ապրանքատեսականին՝ ներառելով նոր դեղաձեւեր։ Ազատ տնտեսական գոտում գործունեության առաջին 5 տարիների ընթացքում ընկերության հաստիքացուցակը կավելանա՝ հասնելով 94 աշխատակցի, իսկ պլանավորված աշխատավարձի մակարդակը կլինի շարունակական միջինից բարձր։

Ընկերությունը կատարել է մոտ 1,2 մլն եվրոյի ներդրում սարքավորումների եւ «մաքուր տարածքների» մեջ՝ նպատակ ունենալով ընդլայնելու ներկայիս ապրանքատեսականին՝ ներառելով աչքի կաթիլներ եւ հաբեր։ Նախատեսվում է կատարել 4,5 մլն եվրոյի ներդրում՝ ներարկման դեղամիջոցների արտադրության համար։ Ընկերությանը որոշվել է թույլտվություն տալ այն բանից հետո, երբ գործարար ծրագիրը գնահատվել է 90 միջին միավոր (անցողիկ շեմ՝ 60 միավոր)։ «Ուստի նպատակահարմար ենք գտնում թույլատրել «Ֆարմատեք»—ին «Ալյանս» ազատ տնտեսական գոտում շահագործողի կարգավիճակով գործունեություն ծավալելը»,—ասաց էկոնոմիկայի նախարարը։
Արմենուհի ՄԵԼՔՈՆՅԱՆ