Դեղերի դրոշմապիտակավորումից հետո թանկացում է սպասվում։ Դա է ցույց տալիս դրոշմապիտակավորման փորձը մեր երկրում։ Օրերս Հայաստանի դեղ արտադրողների եւ ներմուծողների միությունը նամակ էր հղել երկրի նախագահին եւ վարչապետին՝ խնդրելով հետաձգել կառավարության՝ հունիսի 12—ի նիստում հավանության արժանացած եւ ԱԺ հունիսի 21—ի արտահերթ նիստում ընդունված «Առեւտրի եւ ծառայությունների մասին» օրենքում լրացում կատարելու մասին օրենքը։

Դրանով վիտամինները, պատվաստանյութերը եւ դեղերը ներառվել են պարտադիր դրոշմավորման ենթակա ապրանքների ցանկում։ Միությունում համոզված են, որ ներմուծողների կողմից դեղերի դրոշմավորումը կպահանջի մեծ ծախսեր՝ դրոշմավորման տարածքներ ստեղծելու եւ այնտեղ համապատասխան պայմաններ ապահովելու, դրոշմավորման գործընթացը կազմակերպելու եւ աշխատավարձ վճարելու համար, ինչը կհանգեցնի դեղերի թանկացման։ Առողջապահության նախարարությունը մշակում է մեխանիզմներ, որոնք կզսպեն Հայաստանում դեղերի թանկացումն այն բանից հետո, երբ ուժի մեջ կմտնի դեղերի դրոշմապիտակավորման մասին որոշումը։ Երեկ այս մասին ասաց առողջապահության նախարար Արմեն Մուրադյանը. «Նախարարությունը մտահոգված է այդ հարցով եւ փորձում է լուծումներ գտնել»։

Ի դեպ, «Դեղերի մասին» օրինագիծը, որ քննարկման փուլում է, նպատակ ունի վերահսկելի դարձնել ոլորտը։ «Պետք է ամեն ինչ անել, որ պահպանվի մատչելիությունը քաղաքացների համար։ Թեեւ այստեղ հակասություն կա, քանի որ որքան վերահսկելի է ոլորտը, այնքան դժվարանում է գնագոյացումը, սակայն մեր ջանքերն այսօր ուղղված են նրան, որ դեղերի գները չբարձրանան եւ հատուկ մեխանիզմներ լինեն, որոնք կզսպեն գնաճը»,–նկատեց Արմեն Մուրադյանը։ Նա միաժամանակ նկատեց, որ դեղերի դրոշմապիտակավորման հետ կապված տեխնիկական խնդիրներ կան՝ ժամկետների տեսանելիության եւ պիտակավորման ժամանակ ջերմաստիճանի պահպանման առումներով. «Սրա համար էլ ենք լուծումներ մշակում»։

Հարց է ծագում՝ իսկ անհրաժե՞շտ էր դեղերի պիտակավորումը այն պարագայում, երբ մեր երկրում այդ շուկան թափանցիկ է։ «Թույլ տվեք չհամաձայնեմ, որ դեղերի շուկան ամենականոնակարգվածը եւ թափանցիկն է,–ասաց նախարարը,–մենք մտահոգված ենք դեղերի պահպանման եւ դրանց ժամկետների հարցով։ Տեխնիկական հարցերի շուրջ մենք ավելի առարկայական կխոսենք, երբ մեզ մոտ պատրաստ կլինի այդ ընթացակարգը, թե ինչպես պետք է իրականացնել պիտակավորումը»։

Անդրադառնալով հոգեբուժական հաստատություններում ՄԻՊ—ի հայտնաբերած խախտումների մասին հարցին, Ա. Մուրադյանը նշեց. «Շատ շնորհակալ եմ օմբուդսմենին եւ ՄԻՊ—ի գրասենյակի աշխատակիցներին՝ նախանձախնդիր աշխատանքի համար։ ՄԻՊ գրասենյակին շնորհակալ եմ առողջապահության նախարարությանը օգնելու համար։ Կարծում եմ՝ մենք բոլորս նույն գործն ենք անում։ Այսօր կլինեն նաեւ բացատրություններ հոգեբուժարանի տնօրենի կողմից ժամկետանց դեղորայքի մասին։ Սակայն նրա կողմից արդեն եղած բացատրությունները վկայում են, որ ոչ թե հայտնաբերված դեղորայքն է ժամկետանց եղել, ինչպես ՄԻՊ—ը նշել է իր հայտարարությունում, այլ՝ դեղորայքի տարան։ Ես խորհուրդ կտամ, որ եթե հիվանդանոցային դեղորայքի ժամկետն են նայում, նախ նայեն հիվանդանոցային դեղատան դեղերի ժամկետներին»։

Արմենուհի ՄԵԼՔՈՆՅԱՆ