Մարդու իրավունքների պաշտպանի գրասենյակը հոգեկան առողջական խնդիրներ ունեցող անձանցից ստացել է դիմում-բողոքներ, որտեղ հիվանդները դժգոհում են պետությունից անվճար հոգեմետ դեղերի որակի պատճառով: Այդ դեղորայքը պետությունը ձեռք է բերում գնումների գործընթացով և պարտավոր է անվճար տրամադրել հիվանդներին:

Tert.am-ի հետ զրույցում ՄԻՊ տեղակալ Տաթևիկ Խաչատրյանը հայտնեց.«Մեզ դիմում են հիվանդները, ովքեր ասում են, որ դեղերից իրենց մոտ սրացումներ են սկսվում, կամ դրանք իրենց վրա վատ ազդեցություն են ունենում: Առանձին դեպքերում փաստեր կան, որ նախկինում այդ դեղը խմելուց հետո անձը բավականին հանգիստ է եղել, իսկ այժմ իր մոտ սրացումներ են եղել, ոմանք նույնիսկ ստիպված են եղել հոսպիտալացվել հոգեբուժարան: Հիվանդների և մեր կողմից գրված դիմում բողոքներին ի պատասխան նախարարությունը չի ընդունում, որ դեղերի որակը զիջում է, փոխարենն ասում են, որ իրենք ստուգել են, և այդ դեղերը կենսահամարժեք են ավելի թանկ դեղերին»:


Օմբուդսեմենի տեղակալը նշեց, որ պետական գնումների գործընթացը կազմակերպված է այնպես, որ ով ավելի քիչ գնով հայտ ներկայացնի, նա էլ կշահի մրցույթը: «Այստեղ լուրջ խնդիրներ է առաջանում կենսահամարժեքության առումով: Ստացվում է, որ նախարարությունն ավելի հակված է հավատալու իր մատակարարի փորձաքննության թղթին, քան քաղաքացուն, ով ասում է, որ իր վրա զգում է, որ առողջությունն ավելի է վատացել»,-ասաց նա և ավելացրեց, որ այստեղ ամբողջ խնդիրն օրենքի մեջ է:

Հարցին, թե նախարարությունը լաբորատոր ստուգումներ չի անցկացնում կենսահամարժեքության առումով, նա պատասխանեց.«Իրենք իրենց մոտ գրանցում են, թե որքան է եղել բողոքների թիվը, և եթե նորմայից շատ է լինում, իրենք կարող են վարույթ սկսել և անհրաժեշտության դեպքում շրջանառությունից հանել դեղը, սակայն մինչ հիմա մեզ պատասխանել են, որ բողոքները նորմային չեն գերազանցում»:

Տաթևիկ Խաչատրյանն ասաց նաև, որ իրենք դիմումատուների կարծիքներն ունեն, ըստ որոնց նախկինում եղել է համարժեք ամերիկյան դեղ, որից շատ գոհ են եղել, իսկ հիմա այն փոխարինվել է հնդկական հումք ունեցող դեղով: «Ամբողջ հարցն այն է, որ սա ավելի էժան է և գործնականում պարզվում է, որ որակն ավելի վատն է»,-նշեց նա:


Դեղ արտադրողների և ներմուծողների միության նախագահ Սամվել Զաքարյանը Tert.am-ի հետ զրույցում նշեց, որ այդ դեղամիջոցները պետական գնումներով գնված դեղամիջոցներն են, և պետական գնումներում հաղթելու համար առաջնահերթն էժան գինն է: «Ես բազմիցս ասել եմ և կրկին ասում եմ, որ լավ որակով դեղը չի կարող էժան լինել, դրա համար դեղերի մասով գնումների օրենքի կարգը պետք է փոխվի: Մենք բավականին լուրջ խնդիրներ ունեցանք, որովհետև շուկայում անսպասելի հայտնվեցին տարօրինակ արտադրողների կասկածելի դեղեր Հնդկաստանից՝ տարօրինակ հասցեներում գտնվող տարօրինակ կազմակերպությունների անուններով: Դրանք Հնդկաստանից մեզ համար անհայտ հումքով արտադրած դեղեր են, շատ անսպասելի արագ գրանցվել են, և ներկայացրել են անհավատալի էժան գին, արդյունքում տեղական արտադրողներին հաղթել են, ինչը մեզ համար լուրջ անհանգստության ազդանշան է»,-ասաց նա:

Սամվել Զաքարյանը նշեց, որ թեև Հնդկաստանը բավական լուրջ դեղարտադրող երկիր է, սակայն այնտեղ էլ ամենավատ որակից մինչև ամենալավ որակի արտադրություն կա:

«Մենք ևս գիտենք, որ ցանկացած գնով կարելիէ դեղ բերել, որտեղ ազդող նյութը կամ օժանդակող նյութը նույնը լինեն, իսկ կենսահամարժեքությունը լինի թույլ կամ անորակ»,-ասաց Սամվել Զաքարյանը և հավելեց, որ իրենք ևս նման բողոքներ ստացել են:
Tert.am-ը փորձեց պարզաբանումներ ստանալ ԱՆ դեղերի փորձագիտական կենտրոնի տնօրեն Հակոբ Թոփչյանից: «Որակը իրենք չեն կարող գնահատել, որակի գնահատման համար կա նախարարի կողմից կազմված հանձնաժողով՝ հանրապետության գլխավոր հոգեբույժի ղեկավարությամբ: Իրենք ամեն ինչ կարող են ասել, դրա համար նախարարի կողմից հանձնաժողով է ստեղծվել, որտեղ լսում են հիվանդներին, եզրակացություն են տալիս»,-ասաց նա: