Կանադայի առողջապահության նախարար Ռոնա Ամբրոզը հայտնել է, որ երկիրն Աֆրիկա կուղարկի մինչև 1000 բաժին Էբոլա վիրուսի դեմ փորձնական պատվաստանյութ: Դեղամիջոցը կփոխանցվի Առողջապահության համաշխարհային կազմակերպությանը (ԱՀԿ), հայտնում է Lenta.ru ռուսական լրատվական կայքը՝ հղում անելով Associated Press միջազգային լրատվական գործակալությանը:

Դեղամիջոցը, ինչպես հայտնել է նախարարը, մշակվել է մանրէաբանության պետական ազգային լաբորատորիայում: Բացի այդ, Ամբրոզն ընդգծել է, որ Կանադայի իշխանությունները պատրաստ են ամեն ինչ անելու համաճարակի դեմն առնելու համար՝ տրամադրելով նաև բժիշկների խումբ և ֆինանսական միջոցներ:

Դեղամիջոցի օգտագործման մասին որոշումն ընդունվել է այն բանից հետո, երբ ԱՀԿ-ի փորձագիտական հանձնաժողովը հաստատել է, որ Էբոլա վիրուսի դեմ փորձնական դեղամիջոցի կիրառումը չի հակասում էթիկայի նորմերին:

ԱՀԿ-ի ղեկավարի օգնական Մարի-Պոլ Կինին պատմել է, որ այսօրվա դրությամբ ուսումնասիրվում է դեղամիջոցների 3 տեսակ, որոնք ընդունակ են օգնել Էբոլա վիրուսի դեմ պայքարում, որը դեռ համարվում է անբուժելի:

Հիշեցնենք, որ համաճարակի բռնկումը սկսվել է այս տարվա փետրվար ամսին՝ Գվինեայում, ավելի ուշ այն տարածվել է հարևան Սիերա Լեոնեում և Լիբերիայում: Առողջապահության համաշխարհային կազմակերպության վերջին տվյալներով՝ վիրուսը խլել է 1.013 մարդու կյանք, իսկ ընդհանուր առմամբ գրանցվել է վարակակիրների 1.800 դեպք:
tert.am