Այս տարվա ընթացքում Հայաստանում արձանագրվել է բուտուլիզմի 4 դեպք` վեց տուժածով: Մահ չի արձանագրվել: Նախորդ տարվա ընթացքում արձանագրվել է բուտուլիզմի 24 դեպք` 40 տուժածով, երեք մահվան դեպք: Ասուլիսում տվյալները ներկայացրեց ՀՀ առողջապահության նախարարության, առողջապահական պետական տեսչության հիգիենայի բաժնի պետ Մարգարիտա Բաբայանը:

Նա նշեց, որ այս տարի արդեն արձանագրվել է սնկային թունավորման 20 դեպք` 29 տուծաժով, նախորդ տարի՝ 16 դեպք 24 տուժածով: Սնկից թունավորումներ արձանագրվում են Լոռու, Կոտայքի, Արագածոտնի և Արարատի մարզերում:

Մ. Բաբայանի խոսքով, սննդային թունավորումներից զերծ մնալու համար պետք է կերակուր պատրաստելիս պահպանել հիգիենիկ պայմանները, անհրաժեշտ ջերմաստիճանը, հում և եթած սնունդը պահել առանձին:

Սննդային թունավորումների ախտանշաններն են՝ սրտխառնոց, փսխում, փորլուծություն, մարմնի ջերմաստիճանի բարձրացում, բուտուլիզմի դեպքում՝ փորկապություն, երկտեսություն, ձայնի խռպոտություն:

«Այս ախտանիշներն ունենալու դեպքում անմիջապես դիմել բժշկի: Անպայման պետք է բժշկին ասել, որ թունավորումը տնային պայմաններում պատրաստված պահածոյից է»:

Մ. Բաբայանը խորհուրդ չի տալիս պահածոյացնել՝ առաջարկելով սառեցման, աղադրման, չորացման եղանակները: Իսկ պահածոյացնելու դեպքում տարան բացելուց հետո անպայման պարունակությունը նախքան ուտելը եռացնել. «Անպայման եռացնել, ոչ թե ուղղակի տաքացնել»:

Նա խորհուրդ տվեց նաև չօգտվել կրպակներում պատրաստված արագ սնունդից. նախորդ տարի կրպակներից գնված սնունդից թունավորման դեպքեր են արձանագրվել, նաև կրեմով հրուշակեղենից:
panorama.am