Հաշմանդամության ճանաչման գործընթացում կա կոռուպցիոն ռիսկերի նվազում, նախկին 47-50 տոկոսի փոխարեն այն հասել է 20-ի: Այսօր լրագրողների հետ հանդիպման ժամանակ այս մասին հայտնեց «Լիարժեք կյանք» ՀԿ նախագահ Սուրեն Մաղաքյանը:

Այս տվյալները հայտնի են դարձել «Լիարժեք կյանք» հասարակական կազմակերպությանը Լոռու, Շիրակի, Արագածոտնի, Գեղարքունիքի մարզերում առաջին կիսամյակում ՀՀ բժշկասոցիալական փորձաքննական հանձնաժողովների կողմից անցկացվող փորձաքննությունների մոնիթորինգի արդյունքում:

Սուրեն Մաղաքյանն ադրադառնալով ոլորտի խնդիրներին՝ նշեց, որ դեռևս կան հաշմանդամության կարգ ստանալու ոչ ենթակա մարդիկ, ովքեր փոձում են հաշմանդամության խմբերում ներառվել՝ պետությունից գումար ստանալու համար:

«Հաշմանդամության ճանաչման գործընթացն ավելի արդյունավետ դարձնելու համար անհրաժեշտ է դյուրացնել բողոքարկման և տեղեկատվություն ստանալու գործընթացները», -ասաց «Լիարժեք կյանք» ՀԿ հանրային հարաբերութությունների պատասխանատու Լուսինե Սարգսյանն՝ ավելացնելով շատ մարդիկ կան, որ տեղյակ չեն, որ ունեն բողոքարկման հնարավորություն:

Հանդիպմանը ներկա աշխատանքի ու սոցիալական հարցերի նախարարության ներկայացուցիչ Անուշ Սիմոնյանը նշեց, որ այժմ հաշմանդամության կարգի համար դիմած անձիք կարող են գործընթացին ներգրավել նաև իրենց բուժող բժշկին կամ ցանկացած այլ մասնագետի:
Panorama.am