Ուղեղի ալիքները «կարդալու» տեխնոլոգիան զարգացման նոր փուլ է թևակոխել: Հնդիկ գիտնականն իր ֆրանսիացի գործընկերոջը հաղորդագրություն է փոխանցել «մտքի ուժի» միջոցով: Ինչպես գրում է РИА Новости-ն՝ The Daily Mail-ին հղումով, սա առաջին դեպքն է, երբ մարդկանց հաջողվել է տեղեկություն փոխանակել անմիջապես ուղեղից ուղեղ:

Էլեկտրաէնցեֆալոգրաֆիայի (ЭЭГ) տեխնոլոգիայի շնորհիվ գիտնականներին հաջողվել է համեմատել մտքերն ուղեղի էլեկտրական ազդակների հետ: Եթե նախկին հետազոտությունների ժամանակ մարդու ուղեղում վերարտադրվող տեղեկատվությունը ազդակներ էր փոխանցում գաջեթին, ապա այս անգամ հաջողվել է տեղեկության փոխանցման գործընթացում ներգրավել մեկ այլ մարդու:

Փորձարկման ընթացքում կամավորականը՝ Հնդկաստանից, ողջույնի տեսքով «մտավոր հաղորդագրություն» է ուղարկել Ֆրանսիայում գտնվող մասնակցին: Այնտեղ համակարգիչը «թարգմանել է» ողջույնը, որից հետո էլեկտրական խթանիչների օգնությամբ հաղորդել է ստացված մտքերը երկրորդ մասնակցին, որի ուղեղում սենսոր է փոխպատվաստված եղել:

Ավելի ուշ այս փորձը կրկնել են՝ այս անգամ հաղորդագրություն ուղարկելով Իսպանիայից Ֆրանսիա, սակայն որի դեպքում որոշ սխալներ են արձանագրվել:

Ուղեղի ալիքները «կարդալու» տեխնոլոգիան մշակվել է Axilum Robotics, Starlab Barcelona ընկերությունների, Բարսելոնայի համալսարանի և Հարվարդի բժշկական դպրոցի համագործակցության շրջանակներում: