Դեղերի նկարագրություն
Դեղերի ոլորտում անկարեւոր հարցեր չկան
ՀՀ առողջապահության նախարար Արմեն Մուրադյանը երեկ ընդունեց Ազգային անվտանգության խորհրդի աշխատակազմի դիտարկման հանձնաժողովի անդամներին։ Հայաստանի Հանրապետության նախագահի կողմից հաստատված Ազգային անվտանգության խորհրդի 2014թ. գործունեության ծրագրով սեպտեմբերի 8—ից մեկնարկվում է ՀՀ առողջապահության նախարարության դեղամիջոցներով ապահովման համակարգի գործունեության արդյունավետության մեկշաբաթյա դիտարկումը։«Ուրախալի է, որ մեզ համար ամենաարդիական եւ նաեւ խոցելի այս ոլորտը Ազգային անվտանգության խորհրդի ուշադրության կենտրոնում է։ Մենք պատրաստ ենք աջակցելու ցանկացած հարցում, քանի որ ինքներս ենք շահագրգռված առկա թերությունները բացահայտելու եւ դրանց լուծում տալու գործում»,—ասաց նախարարը։
Արմեն Մուրադյանը ներկայացրեց, որ օրենսդրական դաշտում առկա բազմաթիվ խնդիրներին լուծում տալու ճիշտ ճանապարհը նոր օրենքի ընդունումն էր, որի նախագիծն արդեն կառավարության քննարկմանն է ներկայացվել։ Նախագծի հիմնարար սկզբունքներով կկանոնակարգվի դեղի ողջ կենսաշղթան՝ արտադրությունից, ներկրումից մինչեւ սպառողին հասնելը, դեղերի ներմուծման եւ գրանցման դյուրացումը, դրանց փորձաքննությունը միջազգային պահանջներին համապատասխանեցնելը եւ այլն։ Նոր օրենքը միտված է բնակչությանն անվտանգ, արդյունավետ, որակյալ, մատչելի դեղերով եւ դրանց մասին հավաստի տեղեկատվությամբ ապահովմանը։ Տարբեր երկրների փորձը հաշվի առնելով առաջին անգամ օրենքով կսահմանվի, որ պետությունը կարող է կարգավորել հիմնական դեղերի գները։
Նախարարը կարեւորեց նաեւ կեղծ դեղերի դեմ պայքարը, որում մեծ անելիքներ ունի Առողջապահական պետական տեսչությունը։ Այդ խնդրի լուծմանը կնպաստի նաեւ «Առեւտրի եւ ծառայությունների մասին» ՀՀ օրենքում լրացում կատարելու մասին» ՀՀ օրենքի պահանջով դեղերի պարտադիր դրոշմապիտակավորման նորմի կիրարկումը։ Այն կնպաստի նաեւ դեղերի որակի ապահովմանը եւ ստվերային շրջանառության նվազեցմանը, ինչպես նաեւ տեղական արտադրանքի ծավալների վերահսկմանը։
Արմեն Մուրադյանը նշեց, որ նախարարությանը հաջողվեց ՀՀ կառավարությունում կայացած քննարկման ժամանակ համոզիչ փաստարկներով հիմնավորել, որ դրոշմապիտակավորման գործընթացը չի կարող դեղերի գների աճի հանգեցնել, ինչպես պնդում էին դեղագործական գործունեություն ծավալող որոշ կազմակերպություններ։
Նա ներկայացրեց նաեւ նախարարության մոտեցումը կենտրոնացված կարգով ոչ միայն առավել մատչելի, այլեւ առավել արդյունավետ դեղեր ձեռք բերելու վերաբերյալ։ Այդ նպատակով, գործող օրենքի շրջանակում, դեղերի գնման մրցույթներում դեղերի ընտրության տեխնիկական բնութագրերի նոր չափորոշիչներ կհաստատվեն։
Արմեն Մուրադյանն ԱԱԽ դիտարկման հանձնաժողովի անդամներին առաջարկեց այցելել նաեւ Մարդասիրական օգնութան հանրապետական կենտրոն։
«Դեղերի ոլորտում մեզ համար անկարեւոր հարցեր չկան։ Ցանկացած հարցի շուրջ պատրաստ ենք համագործակցել, խոր վերլուծություններ կատարել եւ համատեղ լուծումներ գտնել»,—ասաց նախարարը։
