Այս պահին Եղվարդի թիվ մեկ մանկապարտեզում թունավորման հետեւանքով հիվանդանոցային բուժում է ստանում 4 երեխա եւ 1 մեծահասակ։ Երեխաներից երկուսը գտնվում են Երեւանի «Նորք» ինֆեկցիոն հիվանդանոցում, եւս 2—ը՝ Եղվարդի հիվանդանոցում։ Կառավարության երեկվա նիստից հետո հրավիրված մամլո ասուլիսում առողջապահության նախարար Արմեն Մուրադյանը նշեց, որ վարակված երեխաների մեծ մասն արդեն դուրս է գրվել հիվանդանոցից։

«Մեզ հաջողվեց լոկալիզացնել վարակի օջախն ու կանխել դիզինտերիայի զարգացումը»,–հստակեցրեց նախարարը՝ հավելելով, որ ուսումնասիրությունը պարզել է, որ թունավորման պատճառը դիզինտերիան է, որը հաճախ կարող է առաջանալ կենցաղում սանիտարահիգիենիկ որոշակի պայմանները չպահպանելու պատճառով։ «Ընդհանրապես դիզինտերիան համարվում է կեղտոտ ձեռքերի հիվանդություն։ Եվ այս դեպքը արտառոց էր թվաքանակի իմաստով»,–նշեց նախարարը։

Հիմա ո՞րն է երեխաների թունավորման պատճառը՝ սննդամթե՞րքը, թե՞ այլ բան։ «Հարցին կպատասխանեն իրավապահ մարմինները»,–համառոտեց Արմեն Մուրադյանը՝ միաժամանակ հստակեցնելով, որ հաստատ է մի բան. վարակը ջրի միջոցով չի տարածվել։

Հնարավո՞ր է, որ պատճառը այն նրբերշիկն է, որ դեպքի նախօրեին տրվել է մանկապարտեզում։ Սա էլ, ըստ նախարարի, դեռ պարզ չէ։ Բայց կա առողջապահության նախարարի 2013 թվականի հրամանը, որը կանոնակարգում է, թե ինչ սնունդ կարող է ստանալ նախադպրոցական երեխան, իսկ երշիկեղենի օգտագործումը մանկապարտեզների ճաշացանկում ընդհանրապես արգելված է։

Հետաքրքիր է, իսկ ինչու է երշիկեղենն արգելված, արդյոք ա՞յն պատճառով, որ նախարարությունն ինքը քաջատեղյակ է, թե ինչպես է երշիկ արտադրվում, կամ՝ նախարարությունն ինքը կասկածներ ունի երշիկեղենի արտադրական գործընթացների հետ կապված։

Զարգացած երկրներում ինչպե՞ս է այս խնդիրը կարգավորվում, այնտե՞ղ էլ են «հակված», որ մանկահասակ երեխաները կթունավորվեն երշիկեղենից, եւ արգելում են դրա գործածումը նախադպրոցական կրթական հաստատություններում։ «ՀՀ»—ի այս հարցադրումներին ի պատասխան նախարարն ասաց, թե դիետոլոգները եւ սննդի մասնագետներն են որոշում, թե ինչ է ցանկալի, որ ուտեն մինչեւ 5 տարեկան երեխաները, կամ՝ ինչն է նրանց համար օգտակար, ինչ կալորիականությամբ սնունդ ընդունելը եւն։ Եվ երշիկեղենը այս ցանկում չկա, ցանկալի չէ, որ լինի։ Ու այս նորմը համապատասխանում է միջազգային չափանիշներին։

Լրագրողներից մեկի այն մտահոգությանը, թե հնարավո՞ր է, որ գործը ծածկադմբոց անեն եւ չպատժեն իրական մեղավորներին, նախարարը վստահ պատասխանեց. «Գործը ծածկադմբոց չի արվի, քրեական գործի հարուցումը խոսում է նաեւ այն մասին, որ հարցի պատասխանները լինելու են լիարժեք»։

Արմենուհի ՄԵԼՔՈՆՅԱՆ