ՀՀ առողջապահության նախարարության դեղորայքային քաղաքականության և բժշկական տեխնոլոգիաների վարչության, Դեղերի փորձագիտական կենտրոնի, Առողջապահական պետական տեսչության, ինչպես նաև Տնտեսական մրցակցության պաշտպանության պետական հանձնաժողովի ներկայացուցիչների մասնագիտական խումբը շրջեց Երևանի հինգ («Լամբրոն», «Արֆորմացիա», «Ալֆաֆարմ», «Նատալի ֆարմ», «Լևոն և Լամարա») դեղատներում:

«Դեղորայքի գինը, տարադրամի փոփոխության հետ պայմանավորված, տատանման է ենթարկվել: Տնտեսական մրցակցության պաշտպանության պետական հանձնաժողովի հետ համատեղ ձեռնարկվել են միջոցառումներ, ձևավորվել շրջիկ խմբեր: Դեղերի գներն անհիմն բարձրացրած դեղատներում և կազմակերպություններում կսկսվեն վարույթներ»,- ամփոփելով շրջայցի արդյունքները լրագրողների հետ զրույցում նշեց ՀՀ առողջապահության նախարար Արմեն Մուրադյանը: Նա տեղեկացրեց, որ երեկ երեկոյան անձամբ է այցելել դեղատներ` տեղում ծանոթացել արտարժույթի տատանման հետևանքով դեղերի ոլորտում տիրող իրավիճակին:

«Մենք մշտադիտարկումներ ենք անցկացնում ՀՀ դեղերի հիմնական ցանկի առումով, որպեսզի դեղերի գները լինեն հնարավորինս զսպված: Խոշոր ներկրողների հետ այս ուղղությամբ բանակցություններ են տարվել: 10-20 տոկոսի շրջակայքում դեղերի գնի տատանումը կայունանում է և թանկացումը նվազագույնը կլինի»,- ասաց Արմեն Մուրադյանը, ընդգծելով, որ դեղերի ոլորտում սոցիալական պատասխանատվության գործոնն առաջնահերթ է:

ՀՀ առողջապահության նախարարի՝ դեղորայքային քաղաքականության հարցերով խորհրդական Ղուկաս Ուլիխանյանը և ՀՀ ԱՆ Դեղերի փորձագիտական կենտրոն կենտրոնի տնօրեն Հակոբ Թոփչյանը լրագրողների հետ զրույցում նշեցին, որ դրամի արժևորմանը զուգընթաց նվազում է նաև դեղերի գինը: Նրանց խոսքով` դեղերի գների տատանումները համարժեք են արտաժույթի փոխարժեքի տատանումներին: «Դեղերի շուկայում գների բարձրացման հիմնական խուճապը գրանցվել է դեկտեմբերի 17-ի երեկոյան: Հաջորդ առավոտյան իրավիճակն արդեն կարգավորվել էր: Դեղագործական որոշ ընկերություններ դեկտեմբերի 11-ից 5-10, իսկ առանձին դեպքում 18 տոկոսով բարձրացրել էին դեղերի գները: Նախարարի հորդորով` դեղատները մի քանի շաբաթ չբարձրացրին գները, սակայն հետո եղավ թանկացում: Այս պահին դեղերի գների իջեցում է դիտվում»,- ասաց Ղուկաս Ուլիխանյանը:

Ինչպես հայտնում է Հայաստանի Հանրապետության Առողջապահության նախարարության պաշտոնական կայքը, նախարարի խորհրդականի վստահեցմամբ` թանկացել են դոլարով և եվրոյով գնվող դեղերը, ռուբլիով գնված դեղորայքի գինը իջել է: Ընդհանուր թանկացել է դեղերի անվանացանկի 20 տոկոսը:

«Դրամը որքան գա իր նախկին դիրքերին, դեղերի գներն այդքան իջնելու են: Վստահեցնում եմ՝ ներմուծողների կողմից անհարկի թանկացումներ չեն եղել», - ասաց Ղուկաս Ուլիխանյանը` ավելացնելով, որ նախարարության համապատասխան ստորաբաժանումները մանրակրկիտ մշտադիտարկումներ են իրականացնում շուկայում: Հակամենաշնորհային դեպքերը ներակայացվում են ՏՄՊՊՀ-ին: