«Մուրացան» համալսարանական հիվանդանոցի դուռն Ամանորը մի քանի օր շուտ թակեց։ Երեկ այդ հիվանդանոցում բուժում ստացող երեխաներին անակնկալ մատուցեց ՀՀ առաջին տիկին Ռիտա Սարգսյանը։

Ռիտա Սարգսյանը երեկ այցելել է նաեւ Հ. Յոլյանի անվան արյունաբանական կենտրոն, ՀՀ առողջապահության նախարարության Վ. Ֆանարջյանի անվան ուռուցքաբանության ազգային կենտրոն։

Առաջին տիկնոջ հետ երեխաներին հյուրընկալվել էր նաեւ Ամանորի խորհրդանիշը՝ Ձմեռ պապը։ Իսկ «Կոմպաս» բենդը նոր երգ ներկայացրեց հանդիսատեսին՝ ուրախ օրվա եւ ժպտացող դեմքերի մասին։ «Մանկական Եվրատեսիլ—2014» միջազգային մրցույթում Հայաստանը ներկայացրած Բեթին էլ կատարեց եվրատեսիլյան երգը։

Համերգային մասի ավարտին բոլոր երեխաները միասին մեծ «արեւ» դարձան՝ շրջան կազմելով եւ կատարելով ՀՀ առաջին տիկնոջ հեղինակած «Արեւ ենք միասին» երգը։ Իսկ երբ արդեն տրամադրությունն ամենաբարձր մակարդակի վրա էր, միաձայն կանչեցին՝ Ձը՛—մե՛ռ պա՛—պի՛կ։ Ձմեռ պապի պարկն էլ, ինչպես միշտ, լի էր նվերներով։

Միլենան նրան նամակ չէր գրել. «Մի անգամ հեռախոսով զանգեց ինձ, ասացի, որ քայլող տիկնիկ բերի։ Բայց ասաց, որ քայլող տիկնիկ չի լինի»։ Ներկայացնելով իր եւ Ձմեռ պապի հեռախոսային զրույցը՝ կենսախինդ աղջիկը շտապեց չքայլող տիկնիկը ստանալու։

Միլենայի կողքին կանգնած շիկահեր գեղեցկուհին էլ «մտքերի մեջ էր ընկել»։ Երբ խնդրեցի ներկայանալ, ասաց՝ Հակոբյան Ռուզաննա Արթուրի։ Այնուհետեւ ասաց, որ նամակ չի գրել, բայց նվեր է ստացել։ Իսկ թե Ձմեռ պապը որտեղի՞ց է իմացել, որ նրան պետք է նվեր տա՝ չգիտի։ Բայց հասկանալով, որ մտածելու փոխարեն ավելի լավ է տեսնել՝ ի՞նչ է ստացել, անցավ գործի. «Կակա, կուկու...»։ Տիկնիկին անուն չի դնելու, որովհետեւ, ինչպես ինքն ասաց սաստող ձայնով՝ տիկնիկներին անուն չեն դնում։

Մի բան էլ՝ Ռուզաննա Արթուրի Հակոբյանը «իսկական» համակարգիչ է երազում։
Ստեփանն էլ, քանի որ մեծ տղա է (արդեն 12 տարեկան է), Ձմեռ պապիկին չի հավատում։ Եվ բացի այդ, մի տեսակ մեծական էլ չի նրա ձեռքը բռնել, շրջան կազմել... Բայց, արի ու տես, որ, չնայած դրան, նվեր ստանալուց չի հրաժարվում։ Այդ դեպքում մեծակա՛նը որն է, մանկակա՛նը որն է, կարեւորն անակնկալն է։

Իսկ Արենի ստացած նվերի մասին ոչինչ չիմացանք։ Միայն տեղեկացանք, որ նեթբուք էր ուզում, ամենայն հավանականությամբ, ապագա մասնագիտության համար։ Դրանով նոր բաղադրատոմսեր կարող է որոնել համացանցում։ Խոհարար է ուզում դառնալ։ «Պատրաստելու եմ այն, ինչ խոհարարներն են պատրաստում»,–ասաց Արենը։ Նա հայտնի դառնալու ճանապարհի կեսն արդեն անցել է՝ ՀՀ առաջին տիկնոջ հետ լուսանկար ունի։

Այդ հիվանդանոցում բուժում ստացող երեխաների ձեռքին մատիտներն ու գույները վարպետորեն են «ներկայանում»։ Իսկ արդյունքը ցուցադրված էր հիվանդանոցի նախասրահում։ Երեխաների աշխատանքների ցուցահանդեսին ծանոթացավ նաեւ Ռիտա Սարգսյանը։

Օրվա ընթացքում եղան նաեւ պարգեւատրումներ։ «Նվիրիր կյանք» հիմնադրամի հոգաբարձուների խորհրդի պատվավոր նախագահ, ՀՀ առաջին տիկին Ռիտա Սարգսյանին շնորհվեց Երեւանի պետական բժշկական համալսարանի ոսկե մեդալ՝ առողջապահության ոլորտում մանկական արյունաբանության եւ ուռուցքաբանության զարգացման մեջ մեծ ներդրում ունենալու համար։

Արմինե ՀԱՅՐԱՊԵՏՅԱՆ