Ինչպես նախորդ տարիներին, այնպես էլ 2014–ին շտապ բուժօգնության ծառայությունը բավական լարված է աշխատել, իսկ տոնական օրերին էլ ավելի կրկնապատկել աշխատանքային գործունեությունը։ Այս օրերին ծառայությունը շուրջօրյա գրաֆիկով աշխատել է առանց հանգստի եւ կարողացել է առանց արտակարգ միջադեպերի ճանապարհել ու դիմավորել նոր տարին։

Հունվարի 1—ից մինչեւ 11–ը ընկած ժամանակահատվածում ծառայությունը ստացել է 8275 կանչ, որը շուրջ 100–ով պակաս է եղել 2013թ. ցուցանիշից։ Հիվանդանոց է տեղափոխվել դիմածներից 750—ը։ Կանչերը հիմնականում կապված են եղել սուր շնչառական հիվանդությունների եւ տարբեր բնույթի վնասվածքների հետ։ Սննդային եւ ալկոհոլային թունավորումներ մայրաքաղաքում այս տարի չեն արձանագրվել։

Այս մասին երեկ լրագրողների հետ հանդիպմանը հաղորդեց «Շտապ բուժօգնություն» ընկերության տնօրեն Թագուհի Ստեփանյանը։ Իսկ մանկական կանչերի թիվը այդ նույն ժամանակահատվածում եղել է 1446, հիվանդանոց է տեղափոխվել 203 երեխա։ Ծառայության տնօրենի գնահատմամբ, թեեւ կանչերի թիվը պակասել են, սակայն ավելացել է հիվանդների՝ բուժհաստատություն տեղափոխելու դեպքերը։ Տոնական օրերին ամենաշատ կանչերը արձանագրվել են հունվարի 5—ին, եւ ծառայությունը մեկ օրվա ընթացքում կարողացել է սպասարկել շուրջ 831 կանչի։

«Մեր աշխատանքը բավական դժվարացել էր, րոպեն մեկ կանչ էր արձանագրվում։ Թեպետ բոլոր պոլիկլինիկաները ունեին հերթապահության ժամեր, բուժաշխատողները տեղում էին եւ պատրաստ էին իրենց օգնությունը ցուցաբերելու, սակայն, քանի որ կանչերի թիվը հիմնականում շատանում էր երեկոյան ժամերին, երբ առաջնային բուժօղակները չէին աշխատում, ստիպված էինք տարանջատել կանչերի կարեւորությունները, որոնք առավելապես վտանգավոր էին մարդու կյանքի համար»,–նշեց Թագուհի Ստեփանյանը՝ հավելելով, որ շտապ օգնության մեքենաների ուշացումներ եղել են, բայց ոչ ծառայության մեղքով։

«Հիմնականում մենք ուշացել ենք ծանրաբեռնված օրերին։ Շտապ օգնության մեքենաները հիվանդի մոտ հիմնականում հասնում են 5—7 րոպեից, սակայն դեպքեր են եղել, երբ հասել են 20—25 րոպեից հետո։ Սակայն մեզ ուրախացնում է այն փաստը, որ քաղաքացիները շատ ըմբռնումով են մոտենում ուշացումներին»,–նշեց «Շտապ բուժօգնություն» ընկերության տնօրենը։

Ամփոփելով նաեւ 2014թ. ծառայության աշխատանքներն ու կանչերի վիճակագրությունը, նա նշեց, որ նախորդ տարի արձանագրվել է 226 357 կանչ, ինչը 2013թ. համեմատ 7778 կանչով ավելի է։ Նախորդ տարի շտապ օգնության միջոցով հիվանդանոց է տեղափոխվել 43 415 մարդ, ինչը 2013թ. համեմատ 3196—ով ավելի է։ 2014—ին 2231 կանչով պակաս են եղել սուր շնչառական հիվանդություններով ահազանգերը 2013—ի համեմատ։

Անդրադառնալով մանկական կանչերին՝ Թ.Ստեփանյանն ասաց, որ նախորդ տարի գրանցվել է 23 379 կանչ, որը 2013թ. համեմատ ավելի էր 1543–ով։ Հիվանդանոց է տեղափոխվել 8324 երեխա, ինչը 2013թ. համեմատ ավելացել է 1023—ով։ Ինչ վերաբերում է կանչերի թվի ավելացմանը, Թ. Ստեփանյանը նշեց, որ դա պայմանավորված է ոչ թե հիվանդությունների աճով, այլ ծառայության նկատմամբ բնակչության վստահության ավելացմամբ եւ ոլորտում կատարված բարեփոխումներով։

Նշենք, որ մայրաքաղաքում շտապ օգնության ծառայությունն ավճար է, եւ ոլորտի գործունեությունը ամբողջությամբ վերահսկվում է։ Ծառայության գործունեությունը ավելի արդյունավետ դարձնելու համար Թ. Ստեփանյանը կոչ է անում բնակչությանը շտապ օգնության ծառայություն զանգ կատարելու ժամանակ հստակ հաղորդել հիվանդի մասին տեղեկություններ, ինչը կարեւոր պայման է բուժաշխատողների համար կանչին արձագանքելու տեսանկյունից։ «Բուժաշխատողները կանչին արձագանքելուց առաջ պետք է հստակ իմանան հիվանդի վիճակը։ Սա ուղղակի պայմանականություն չէ, այլ կարեւոր նախադրյալ է արդյունավետ աշխատանքի իրականացման համար»,–նշեց ծառայության տնօրենը։

Հավելենք, որ գործում է նաեւ 103 էլեկտրոնային կայքը, որի միջոցով քաղաքացիները կարող են իրենց հուզող հարցերի պատասխաններն իմանալ օնլայն տարբերակով կամ օգտվել շտապ օգնության ծառայություններից։

Լուսինե ՆԱԶԱՐՅԱՆ