Կառավարությունը երեկվա նիստում հաստատեց դիաբետոն (գլիկլազիդ) 60 մգ դեղի մրցակցային կարգով ձեռքբերման արձանագրությունը։ Առողջապահության նախարար Արմեն Մուրադյանը որոշման ընդունումը պայմանավորեց շաքարային դիաբետով տառապող հիվանդների անվճար հակադիաբետիկ (դիաբետոն 60 մգ) դեղ ստանալու իրավունքի իրացումը պատշաճ մակարդակով ապահովելու անհրաժեշտությամբ։

2015թ. համար առողջապահության նախարարությունը շաքարային դիաբետով տառապող հիվանդների դեղապահովումն իրականացնելու նպատակով պլանավորել եւ ըստ ճշտված գնումների պլանի նախատեսել է 9.500.000 դեղահաբ, սակայն իրական պահանջը կազմում է 12.000.000 դեղահաբ։ Դիաբետոն 60 մգ դեղի պահանջարկը, կապված հիվանդների թվաքանակի ավելացման հետ, տարեկան աճում է 10 եւ ավելի տոկոսով։ 2019թ. անհրաժեշտ կլինի ապահովել 13.900.000 դեղահաբ, ինչը հնարավոր չէ ապահովել ներկայիս բյուջետային միջոցներով ու գնման ընթացակարգերով։

Առողջապահության նախարարության 2014թ. կարիքների համար իրականացված հակադիաբետիկ դեղի գնման գործընթացների արդյունքում ձեռք է բերվել հնդկական արտադրության գլիկլազիդ 60 մգ դեղը՝ միավոր դեղահաբը 44,7 ՀՀ դրամով։ «Հիմք ընդունելով երկրի նախագահի 2012թ. սեպտեմբերի հանձնարարականի հիման վրա ընդունված կառավարության 2012թ. հոկտեմբերի որոշումը, նախարարությունը հարցումներ է կատարել հակադիաբետիկ դեղ արտադրող մի շարք օտարերկրյա կազմակերպությունների եւ ստացել առաջարկներ։

Վերլուծելով դրանք՝ առաջարկվում է հավանություն տալ պետության կարիքների համար անհրաժեշտ դիաբետոն 60 մգ դեղը ֆրանսիական արտադրող կազմակերպությունից ձեռք բերելու համար 5 տարվա պայմանագիր կնքելուն»,—ասաց Արմեն Մուրադյանը։ Նա միաժամանակ հավելեց, թե խնդրի կարգավորման նպատակը պետական բյուջեից հատկացվող միջոցների շրջանակներում 2015—2019թթ. շաքարային դիաբետով տառապող հիվանդների դիաբետոն 60 մգ դեղի պահանջարկն անխափան ապահովելն է։

Հիշյալ որոշման ընդունմամբ 2015թ. գնման պլանով նախատեսված գումարի տնտեսումը կկազմի 79.610.000 դրամ՝ միաժամանակ ապահովելով մրցակցային գնման արդյունքում ձեռք բերվող դեղի դիմաց ծախս—որակ լավագույն արդյունքը։

Տեղեկացնենք նաեւ, որ մինչեւ 2019թ. նշված դեղի խմբաքանակների գնումները կիրականացվեն ֆրանսիական «Լե Լաբողատուաղ Սեղվիե» ընկերությունից՝ 1 հաբը 0,06 եվրո գնով՝ առանց ավելացված արժեքի հարկի։ Որոշումն ուժի մեջ կմտնի պաշտոնական հրապարակմանը հաջորդող օրվանից։

Հավելենք նաեւ, որ հիմք ընդունելով երկրի նախագահի վերոհիշյալ հանձնարարականը՝ նախարարության դեղորայքային քաղաքականության եւ բժշկական տեխնոլոգիաների վարչության կողմից գրություններ են ուղարկվել 53 դեղարտադրող կազմակերպություններին՝ ներկայացնելով պետության կողմից կենտրոնացված կարգով ձեռք բերվող 36 անվանում դեղերի ցանկը՝ անմիջապես դեղարտադրողի հետ հնգամյա պայմանագիր կնքելու նպատակով։ Սահմանված ժամկետում պատասխաններ են ստացվել 9 դեղարտադրող («Մեդոֆարմ», «Լե Լաբողատուաղ Սեղվիե», «Լիլի», «Բաքստեր», «Հոֆֆման Լա Ռոշ», «GSLԲեհրինգ», «Պերդաման», «Պոլֆա Տարխոմին» եւ «Գրինդեքս») կազմակերպություններից, որոնցից գնային առաջարկներ են ներկայացրել 5—ը եւ որոնցից էլ միայն «Լե Լաբողատուաղ Սեղվիե» կազմակերպությունն է գնային առաջարկ ներկայացրել «Գլիկլազիդ 60 մգ» դեղի համար՝ 0.06833 եվրո (կամ 42,33 ՀՀ դրամ) 1 դեղահաբի համար։
Այնուհետեւ, դեղորայքի ձեռք բերման նպատակով կրկին գնման ընթացակարգ է կազմակերպվել, որի արդյունքում «Գլիկլազիդ 60 մգ» դեղի համար գնային առաջարկներ են ներկայացրել միայն երեք կազմակերպություններ՝ համապատասխանաբար «Ռիխտեր Լամբրոն» ՍՊԸ՝ 71,0, «Նատալի Ֆարմ» ՍՊԸ՝ 76,5 եւ «Արմֆարմ» ՍՊԸ՝ 44,7 դրամի չափով։ Նվազագույն գին առաջարկած «Արմֆարմ» ՍՊԸ—ի գնային առաջարկը բարձր է եղել «Լե Լաբողատուաղ Սեղվիե» կազմակերպության գնային առաջարկից։ «Արմֆարմ» ՍՊԸ—ի կողմից առաջարկվում էր հնդկական արտադրության, իսկ «Լե Լաբողատուաղ Սեղվիե» կազմակերպության կողմից՝ ֆրանսիական արտադրության դեղ։

Հաշվի առնելով սա՝ առողջապահության նախարարությունը շարունակել է բանակցությունները «Լե Լաբողատուաղ Սեղվիե» կազմակերպության հետ։ Արդյունքում, 2015թ. հունվարի 19—ին վերջինս ներկայացրել է հինգ տարվա համար նոր իջեցված գնային առաջարկ՝ 1,8 եվրո մեկ տուփի համար կամ 0,06 եվրո մեկ հաբի համար՝ առանց ԱԱՀ։ Ինչպես նաեւ կազմակերպությունն առաջարկել է յուրաքանչյուր տարվա պահանջարկի 10 տոկոսը ՀՀ առողջապահության նախարարությանը տրամադրել անվճար՝ մարդասիրական օգնության հիմունքներով։

Մի խոսքով, մինչեւ 2019թ. շաքարային դիաբետով հիվանդները ապահովված կլինեն ֆրանսիական դեղով։

Արմենուհի ՄԵԼՔՈՆՅԱՆ