Խոսելով սոցիալական փաթեթի հետ կապված փոփոխություններից՝ նշել էինք, որ 2015թ. հունվարի 1—ից հետո սոցփաթեթի շահառուների համար ներդրված է պարտադիր կանխարգելիչ բժշկական քննության բաղադրիչը։ Ինչ է ենթադրում այս փաթեթը։

Ըստ աշխատանքի եւ սոցիալական հարցերի նախարարության, փաթեթը ներառում է արտահիվանդանոցային պայմաններում իրականացվող որոշակի բժշկական ծառայություններ։

Միանգամից ասենք, որ խոսքը 13 ծառայությունների մասին է։ Դրանցից է, օրինակ, ընդհանուր պրակտիկայի բժշկի խորհրդատվությունը՝ առողջապահության նախարարության հաստատած կանխարգելիչ այցի ծավալներով, այդ թվում՝ զարկերակային ճնշման չափումը՝ հիպերտոնիայի վաղ հայտնաբերման նպատակով, կանանց կրծքագեղձերի զննումը՝ քաղցկեղի վաղ հայտնաբերման նպատակով, ժառանգական անամնեզում գլաուկոմա ունեցող 40 տարեկան եւ ավելի բարձր տարիքի անձանց տեսողության սրության եւ ակնահատակի զննումը՝ գլաուկոմայի վաղ հայտնաբերման նպատակով, եւ քաշի խանգարումների վաղ հայտնաբերման, ոչ վարակիչ հիվանդությունների կանխարգելման, վաղ հայտնաբերման նպատակով մարմնի զանգվածի ցուցանիշի որոշումը։

Երկրորդ ծառայությունը գինեկոլոգի խորհրդատվությունն է կանանց բոլոր տարիքային խմբերի համար, երրորդը՝ ուռոլոգի (բացակայության դեպքում՝ վիրաբույժի) խորհրդատվությունն է տղամարդկանց բոլոր տարիքային խմբերի համար։ Պարտադիր կանխարգելիչ ծառայություններից են նաեւ արյան ընդհանուր հետազոտությունը (լեյկոֆորմուլայով), մեզի ընդհանուր հետազոտությունը, արյան մեջ գլյուկոզայի եւ խոլեստերինի որոշումը, էլեկտրասրտագրությունը, որովայնի խոռոչի, փոքր կոնքի օրգանների եւ վահանաձեւ գեղձի ուլտրաձայնային հետազոտությունը, կանանց համար՝ նաեւ կրծքագեղձի ուլտրաձայնային հետազոտությունը։

Տեղեկացնենք, որ սոցփաթեթում ներառված է նաեւ պետության կողմից երաշխավորված անվճար բժշկական օգնության եւ սպասարկման ծառայությունների փաթեթը։ Ծրագրի շրջանակներում փոխհատուցման ենթակա է շահառուների հիվանդանոցային բժշկական օգնության եւ սպասարկման մասով վիրահատական ու թերապեւտիկ բուժումը (բացառությամբ, ասենք, նորագույն եւ թանկարժեք տեխնոլոգիաների կիրառմամբ մատուցվող բժշկական ծառայությունների)։ Սակայն փոխհատուցման ենթակա է նաեւ.

ա) նորագույն եւ թանկարժեք տեխնոլոգիաների կիրառմամբ մատուցվող բժշկական ծառայությունների չափորոշիչում ընդգրկված՝ նյարդավիրաբուժական, այդ թվում՝ գլխուղեղի անոթային հիվանդությունների էնդովասկուլյար բուժման (ներառյալ միկրոկաթետերի, միկրոպարույրի կամ օնիքսի) արժեքը։

բ) Սրտի վիրահատական եւ ներանոթային միջամտությունների իրականացման (ընդ որում, կորոնար անոթների ստենտավորման փոխհատուցումը ներառում է ինչպես դեղապատ, այնպես էլ՝ ոչ դեղապատ ստենտի) արժեքը, այդ թվում՝ սրտի փականների պրոթեզավորման, սրտի ռիթմը վարող սարքերի իմպլանտացիայի ծառայությունների մասով։

գ) Սիներակի ֆիլտրի տեղադրումը։

դ) Սկլեռոպլաստիկան եւ կեռատոպլաստիկան։

ե) Մետաղական կոնստրուկցիաների արժեքը՝ վնասվածքաբանական վիրահատությունների ժամանակ։

զ) Խոշոր հոդերի էնդոպրոթեզավորումը ռեկոնստրուկցիայով, առանց էնդոպրոթեզի արժեքի։

Տեղեկացնենք, որ պետության կողմից երաշխավորված անվճար բժշկական օգնության եւ սպասարկման ծառայությունների փաթեթի համաձայն, հստակ սահմանված է, որ հիվանդանոցային բժշկական օգնությունն ու սպասարկումը ներառում են բուժման համար անհրաժեշտ միջոցների ամբողջ ծավալը, այդ թվում՝ մասնագիտացված կոնսուլտացիաները, հիվանդանոցային բուժման ընթացքում իրականացվող լաբորատոր—գործիքային եւ առողջապահության նախարարի հրամանով հաստատված ցանկում ընդգրկված հատուկ եւ դժվարամատչելի ախտորոշիչ հետազոտությունները, ընդ որում՝ մագնիսական—ռեզոնանսային տոմոգրաֆիան, համակարգչային տոմոգրաֆիան, անգիոգրաֆիկ համակարգչային տոմոգրաֆիան, կորոնարոանգիոգրաֆիան (ստենտավորմամբ չավարտված), գլխուղեղի անգիոգրաֆիա հետազոտությունները փոխհատուցվում են լրացուցիչ՝ ամբողջությամբ։

Բուժման համար անհրաժեշտ միջոցների ամբողջ ծավալի թվում են նաեւ անհրաժեշտ դեղերով, բժշկական նշանակության ապրանքներով ապահովումը եւ բուժական միջամտությունները, հիվանդին հիվանդասենյակով ապահովելը (բացառությամբ հիվանդի կողմից նախընտրած առանձնահատուկ հարմարավետ հիվանդասենյակների արժեքի)։

Կան ծառայություններ էլ, որոնք ծրագրի շրջանակներում շահառուների համար փոխհատուցման ենթակա չեն։ Այս շարքում են արտահիվանդանոցային բժշկական օգնությունն ու սպասարկումը (այդ թվում՝ ստոմատոլոգիական ծառայությունները)։

Փոխհատուցման ենթակա չեն նաեւ տուբերկուլյոզի, հոգեկան եւ թմրաբանական հիվանդությունների, սեռական ճանապարհով փոխանցվող հիվանդությունների, նախազորակոչային եւ զորակոչային տարիքի անձանց հիվանդանոցային փորձաքննության, ուռուցքաբանական հիվանդությունների քիմիաթերապեւտիկ, վերականգնողական (այդ թվում՝ առողջարանային), երիկամային քրոնիկ անբավարարության դեպքում կատարվող հեմոդիալեզի, մանկաբարձական (ծննդօգնություն եւ հղիության ախտաբանություն), ՄԻԱՎ/ՁԻԱՀ—ի բժշկական օգնության եւ սպասարկման ծառայությունները։

Վերջույթների եւ դրանց առանձին սեգմենտների պրոթեզավորումն էլ փոխհատուցման ենթակա չէ։ Պրոթեզները, էնդոպրոթեզները, բժշկական սարքավորումները, իմպլանտները, տեսողական եւ լսողական սարքերը, ինչպես նաեւ այլ կարգավորիչ բժշկական հարմարանքները նույնպես փոխհատուցման ենթակա չեն։ Այս կետում նշված բացառությունները չեն վերաբերում սրտի վիրահատական միջամտություններին, ներանոթային միջամտություններին։

Փոխհատուցման ենթակա չէ նաեւ քրոնիկ հիվանդությունների բուժումը։ Այն հիվանդությունների, որոնք պահանջում են մշտական ոչ վիրահատական, պահպանողական բուժում եւ դինամիկ հսկողություն (բացառությամբ դրանց կյանքին վտանգ սպառնացող անհետաձգելի հիվանդանոցային բուժում պահանջող սրացումների եւ բարդությունների), այդ թվում՝ բնածին անոմալիաները, զարգացման արատները, պարբերական հիվանդությունը, էպիլեպսիան, շաքարային դիաբետը, թոքերի էմֆիզեման, պնեւմոսկլերոզը, ողնաշարի միջողային սկավառակների ախտահարումները, լյարդային անբավարարությունը, քրոնիկական վիրուսակրությունը (այդ թվում՝ վիրուսային հեպատիտները), քրոնիկական բացիլակրությունը եւ պարազիտակրությունը։

Սոցփաթեթի շահառուի ընտանիքի անդամն էլ կարող է օգտվել առողջության ապահովագրության նվազագույն բազային փաթեթից։ Այս մասին կխոսենք։

Արմենուհի ՄԵԼՔՈՆՅԱՆ