Էլեկտրոնային լրատվամիջոցներում տեղ են գտել հրապարակումներ, որոնցում նշվում է, որ «ՆՕԿԻ» ՍՊԸ-ի սեփականատեր և տնօրեն Հրայր Խոսրավյանի կողմից նշվել է, թե իբր քաղաքացի Հ.Հովհաննիսյանի կողմից ՀՀ առողջապահության նախարարություն տրամադրված անորակ Ասպիրինը «ՆՕԿԻ» ՍՊԸ-ի արտադրանքը չի եղել։ Նշենք, որ տեղամասային պոլիկլինիկայի կողմից անվճար հատկացված դեղի որակի հետ կապված քաղաքացու նախարարություն ուղարկված բողոքի հիման վրա ՀՀ առողջապահության նախարարի համապատասխան հրամաններով հարուցվել են վարչական վարույթներ` դեղն արտադրող դեղագործական կազմակերպությունում և դեղը հիվանդին տրամադրող բժշկական հաստատությունում:

Ինչպես հայտնում է Հայաստանի Հանրապետության Առողջապահության նախարարության պաշտոնական կայքը, «ՆՕԿԻ» ՍՊԸ-ի և քաղաքացի Հ.Հովհաննիսյանի կողմից տրամադրված «Կարդիո ԱՍ» դեղի լաբորատոր փորձաքննության արդյունքում պարզվել է, որ դեղահատերն արտադրվել են «ՆՕԿԻ» ՍՊԸ-ի կողմից և չեն համապատասխանում չափիչ տեխնիկական փաստաթղթերի պահանջներին «սալիցիլաթթվի քանակ» և «մագնեզիում ստեարատի իսկություն» կետերով: ՀՀ առողջապահության նախարարի 2013 թվականի մայիսի 20-ի «Դեղերի արտադրության ընթացքում Հայաստանի Հանրապետության օրենսդրությամբ սահմանված դեղերի որակին չհամապատասխանող արտադրանքի որակի անհամապատասխանության հայտնաբերումից հետո, հետ հավաքման և ոչնչացման կարգը հաստատելու մասին» թիվ 18-Ն հրամանի համաձայն` ՀՀ առողջապահության նախարարի 2014 թվականի հուլիսի 11-ի ««ՆՕԿԻ» Հայ-Ամերիկա-Գերմանական համաատեղ դեղագործական ձեռնարկություն» սահմանափակ պատասխանատվությամբ ընկերության արտադրության «Կարդիո ԱՍ 100 մգ դեղահատեր N20» (շուկայում առկա խմբաքանակ) դեղի Հայաստանի Հանրապետության օրենսդրությամբ սահմանված պահանջներին չհամապատասխանելու դեպքում թերությունների գնահատման և հետհավաքման աշխատանքները կազմակերպելու մասին» թիվ 1694-Ա հրամանով դադարեցվել է նշված դեղի շրջանառությունը և հիվանդներին հատկացումը բժշկական հաստատությունների կողմից: Ուստի, «ՆՕԿԻ» ՍՊԸ հայ-ամերիկա-գերմանական համատեղ դեղագործական ձեռնարկության կողմից իրականացվել է «Կարդիո ԱՍ 100 մգ» դեղի խմբաքանակների հետհավաք ՀՀ դեղատներից, դեղատնային կրպակներից և դեղերի մեծածախ վաճառք իրականացնող կազմակերպությունների պահեստներից: 2014 թվականի օգոստոսի 15-ի դրությամբ «ՆՕԿԻ» ՍՊԸ հայ-ամերիկա-գերմանական համատեղ դեղագործական ձեռնարկության կողմից արդեն իսկ հետ է հավաքվել «Կարդիո ԱՍ 100 մգ» դեղի` 12400 սպառողական փաթեթ:

Հիմք ընդունելով լաբորատոր փորձաքննության արդյունքները` ՀՀ առողջապահության նախարարությունը սահմանված կարգով իրականացրել է տվյալ դեղի շրջանառության դադարեցումը Հայաստանի Հանրապետությունում:

Իրականությանը չի համապատասխանում նաև «ՆՕԿԻ» ՍՊԸ-ի սեփականատեր և տնօրեն Հրայր Խոսրավյանի կողմից նշված այն միտքը, թե իբր Դեղերի փորձագիտական կենտրոնը շահադիտական նպատակներով չի վերագրանցել «ՆՕԿԻ» ՍՊԸ-ի կողմից արտադրված դեղերը։ ՀՀ առողջապահության նախարարության Դեղերի փորձագիտական կենտրոնում ներկայումս փորձաքննության մեջ են գտնվում «ՆՕԿԻ» ՍՊԸ-ի կողմից ներկայացված Նևրալգին, Ալբենդազոլ, Կարդիո ԱՍ և Իբունոկ դեղերը, իսկ Բետադինոկ դեղը գրանցվել է 2014թ.-ին: Նշված դեղերից Ալբենդազոլ և Նևրալգին դեղերի գրանցման փորձաքննությունը սկսվել է 2013թ. դեկտեմբերի 27-ին: Գրանցման փորձաքննության իրականացման շրջանակում 2014թ. մարտի 17-ին ընկերության արտադրատարածքում իրականացվել է նշված դեղերի նախագրանցումային դիտարկում, որի ընթացքում հայտնաբերված թերությունների, ինչպես նաև գրանցման դոսյեում բացակայող փաստաթղթերի մասին արտադրողին տեղեկացվել է 2014թ. մարտի 5-ին և ապրիլի 4-ին: Ի պատասխան այդ գրությունների` ընկերությունը 2014թ. հունիսի 10-ին հայտնել է իր անհամաձայնությունը հարցման մի քանի կետերի վերաբերյալ, որոնց հստակեցման նպատակով 2014թ. հունիսի 27-ին տեղի է ունեցել քննարկում ընկերության արտադրատարածքում։ Այնուհետև` 2014թ. հուլիսի 7-ին ընկերությանը հարցում է կատարվել դիտարկման ընթացքում հայտնաբերված և քննարկումից հետո առկա թերությունների վերացման աշխատանքների ժամանակացույցի տրամադրման վերաբերյալ: 2014 թվականի սեպտեմբերի 29-ին ընկերությունը տեղեկացրել է որոշ թերությունների վերացմանն ուղղված աշխատանքների ավարտի մասին: Կատարված աշխատանքների վերաբերյալ տեղեկությունը ստանալուց և գնահատելուց հետո 2014թ. հոկտեմբերի 21-ին ընկերությանն ուղարկվել է գրություն, որ Ալբենդազոլ և Նևրալգին դեղերի գրանցման պետական փորձաքննությունը շարունակելու նպատակով անհրաժեշտ է վերացնել մնացած թերությունները ևս, որին ընկերությունը մինչ օրս չի արձագանքել:

Ինչ վերաբերում է Կարդիո ԱՍ և Իբունոկ դեղերին, ապա դրանց գրանցման փորձաքննությունը սկսվել է 2014թ. հոկտեմբերի 21-ին: 2015թ. հունվարի 29-ին ընկերությանն ուղարկվել է գրություն` դոսյեում բացակայող փաստաթղթերի տրամադրման վերաբերյալ, որին մինչ օրս չի արձագանքվել:

Ինչ վերաբերում է «Տերաֆլյու» դեղի շրջանառության դադարեցմանը, ապա այն կատարվել է արտադրողի գրության հիման վրա` հիմք ընդունելով ՀՀ կառավարության 2001թ. ապրիլի 25-ի թիվ 347 որոշման 4-րդ հոդվածի` «դեղերի գրանցումը անվավեր ճանարելը», 30-րդ կետի` «ՀՀ առողջապահության նախարարությունը դեղի գրանցումը կարող է անվավեր ճանաչել և դադարեցնել դրա շրջանառությունը», «ա» ենթակետը` «եթե դիմում է ստացվել արտադրող կազմակերպությունից»: