Հոգեմետ դեղերի նկատմամբ պահանջարկն ավելացել է՝ NEWS.am-ի հետ զրույցում հաստատեց «Արփիմեդ» ընկերության մարկետինգի ղեկավար Խաչիկ Հակոբյանը։ Ընկերությունը Հայաստանում միակն է, որ զբաղվում է հոգեմետ դեղերի արտադրությամբ։ Ըստ Հակոբյանի՝ իրենց արտադրած հոգեմետ դեղերը պետպատվերի շրջանակներում տրամադրվում են հիվանդներին։ Մեծ պահանջարկ են վայելում բենզոնալը, կարբոմազետինը։ Շնորհիվ տեղական արտադրության ընդլայնման՝ արտասահմանյան հոգեմետ դեղերի ներկրումը նվազել է։ Բացի այդ՝ «Արփիմեդը» շահել է մի քանի մրցույթներ Ղազախստանում, Բելառուսում, Ուկրաինայում։

Խ. Հակոբյանը հավաստիացրեց, որ դեղերի գների աճ առաջիկայում չի նախատեսվում, թեեւ արտասահմանից ներկրվող որոշ դեղեր շատ թանկ են։ Օրինակ՝ ներկրվող «Օլան Զեփին» դեղամիջոցն արժե մոտ 100 հազ. դրամ (մոտ 280 դոլար), այնինչ ուսումնասիրությունները ցույց են տվել, որ այդ դեղամիջոցի ակտիվ նյութը կարել է ստանալ 10 անգամ էժան։ Սակայն որպեսզի դրա տեղական արտադրություն չկազմակերպվի՝ մտավոր սեփականության գործակալությունում դեղամիջոցը պատենտավորված է առնվազն 3 տարով։