Քո «կյանքի ծաղիկը» քեզ է սպասում, որպեսզի նա իր «կյանքի ծաղիկն» ունենա։ Դրա համար հարկավոր է մուտք գործել «flowersoflife.am» կայք ու ընդամենը 500 դրամով գնել խորհրդանշական ծաղիկը։ Հավաքված գումարով բազմաթիվ զույգեր երեխա ունենալու հնարավորություն կստանան։

Դա իրականացվում է «Արագիլ» վերարտադրողական բժշկության աջակցության հիմնադրամի «Կյանքի ծաղիկ» բարեգործական ակցիայի շրջանակում։

Կոմիտասի անվան թանգարան—ինստիտուտում երեկ տրվեց նախաձեռնության պաշտոնական մեկնարկը։ Դրա նպատակը անպտղությամբ տառապող հայ ընտանիքներին օգնելու համար դրամական միջոցներ հայթայթելն է, որոնց համար երեխա ունենալու միակ ելքը արտամարմնային բեղմնավորումն է։ 15 000 000 «Կյանքի ծաղիկ»—ների միջոցով բժշկական օգնության հնարավորություն կստանա վերարտադրողական խնդիր ունեցող 6000 հայ ընտանիք։

Այսօր ավելի քան 9000 հայ ընտանիքի համար սերնդի շարունակելիությունը ամենացավոտ հարցերից է։ Նրանք կարող են երեխա ունենալ բացառապես վերարտադրողական բժշկության շնորհիվ։ Բայց արտամարմնային բեղմնավորման գործընթացի արժեքը շատ թանկ է, հատկապես, երբ դրական արդյունք ունենալու համար անհրաժեշտ է փորձել մի քանի անգամ։ Այդ իսկ պատճառով էլ ընտանիքների մեծ մասը չի համարձակվում այդ եղանակով ունենալ երեխա։ Մինչդեռ այդ երեխան սպասված է ոչ միայն ծնողների, այլեւ ողջ ազգի համար՝ եղեռնի հետեւանքով ունեցած մարդկային կորուստը պետք է լրացնել։

Եվ բոլորովին պատահական չէ, որ 15 մլն անմոռուկ է սահմանվել. Հայոց ցեղասպանության զոհերի տասնապատկված թիվն է։ Այսպիսով, ծրագրի միջոցով գործնականում պայքար է տարվում ցեղասպանության հետեւանքների դեմ։
Ակցիայի հեղինակ—ղեկավար Քրիստինա Հարությունյանը երեկ հրավիրված ասուլիսի ժամանակ պատմեց, որ Թբիլիսիսում է ծնվել՝ եղեռնի հետեւանքով գաղթած ընտանիքում։ Ասում է, որ իրենց ընտանիքում հայապահպանության հարցը շատ խիստ է դրված եղել։ Եվ, բացի այդ, ինքը քաջատեղյակ է երեխա չունենալու ցավին։

«Ես զգացել եմ այդ դժվար պահը, երբ հոգու եւ սրտի դատարկությունը հնարավոր չէր ոչ մի բանով լրացնել։ Բարեբախտաբար, այսօր ունեմ երեք զավակ։ Շնորհակալ եմ Աստծուն դրա համար։ Ինձ մոտ միտք հղացավ իրականացնելու ծրագիր, որը կօգնի, երեխա ունենալու բերկրանք կպարգեւի վերարտադրողական խնդիրներ ունեցող անապահով ընտանիքներին»,—ասաց նա։

«Արագիլ» վերարտադրողական բժշկության աջակցության հիմնադրամի տնօրեն Սուսաննա Գաբրիելյանը շնորհակալություն հայտնեց ՀՀ առաջին տիկին Ռիտա Սարգսյանին, քանի որ առանց նրա աջակցության հնարավոր չէր լինի ծրագիրը կյանքի կոչել։

Նրա տեղեկացմամբ՝ 1242 զույգ դիմել է ծրագրին մասնակցելու համար։ Նրանցից 442—ը ստացել է համապատասխան ուղեգիր, 224—ի մոտ բժշկական միջամտությունն արդեն ավարտվել է։ 112 հղիություն է գրանցվել։ Ծննդաբերել է 61 կին, որի արդյունքում լույս աշխարհ է եկել 82 երեխա։ Այս պահին 26 զույգ երեխայի է սպասում։ Ցավոք սրտի, 25—ի մոտ ձախողում է գրանցվել։

«Արագիլ» բարեգործական հիմնադրամի բժշկական փորձագետ, հոգաբարձուների խորհրդի անդամ Կարինե Թոխունցի խոսքերով, գլխավոր խնդիրն է նպաստել յուրաքանչյուր երեխայի ծննդին. «Հերթագրված բազմաթիվ զույգեր ունենք։ Բայց հիմնադրամում բավականաչափ գումար չկա։ Ուստի յուրաքանչյուր հայի պարտքն է մասնակցել ակցիային»։

«Այսօր երեխա ունենալու հնարավորություն ունեն բոլոր այն զույգերը, որոնք նախկինում անգամ երազում չէին կարող տեսնել այդ հնարավորությունը»,—նշեց Մոր եւ մանկան առողջության պահպանման գիտահետազոտական կենտրոնի տնօրեն, պրոֆեսոր Գեորգի Օկոեւը։

Ներկայացնելով մոտավորապես մեկ տարի առաջ լույս աշխարհ եկած եռյակին, պրոֆեսորը վստահություն հայտնեց, որ երեք քույրերը հետագայում առողջ մայրեր են լինելու. «Իհարկե, ծնվելիս փոքրիկ էին։ Բայց հիմա տեսեք՝ ինչ աշխույժ, լավ երեխաներ են»։

Էլեն, Աննա, Դիանա. ծնողներն իրենց սիրելի անուններով են անվանակոչել փոքրիկներին։ Նրանց երկար են սպասել՝ շուրջ 5 տարի։ Ի վերջո, հաջողվել է միանգամից երեք շիկահեր գեղեցկուհիների ծնող դառնալ։ Երիտասարդ մայրիկը խոստովանում է՝ սկզբում նրանց պահելը դժվար է եղել, բայց հիմա ամեն ինչ համեմատաբար հեշտացել է։

Այսպիսով, այդ հաճելի «դժվարությունների» մասին շատերի երազանքներն իրականություն կդառնան, եթե ամեն մեկս առաջնորդվի «Կյանքի ծաղիկ» բարեգործական ակցիայի նշանաբանով՝ «Կյանք տուր նոր հայի»։

Թամարա ՄՈՒՐԱԴՅԱՆ