Առողջապահության նախարար Արմեն Մուրադյանը երեկ կառավարության նիստից հետո լրագրողներին տեղեկացրեց, որ Կոտայքի մարզում բրուցելոզով հիվանդների թիվը հասել է 19—ի, եւ առողջապահության նախարարությունը կազմակերպել է նրանց անվճար բուժման գործընթացը։

«Հիվանդների թիվը հստակեցնելուց հետո բոլորի բուժումը կազմակերպվել է։ Այժմ բուժում է ստանում 19 մարդ, եթե նմուշառումների արդյունքում այլ դեպքեր եւս արձանագրվեն, անպայման բուժումը կկազմակերպի։

Բոլոր հիվանդների վիճակը ներկայումս գնահատվում է բավարար»,— նշեց առողջապահության նախարարը։

Անդրադառնալով հիվանդության վտանգավորության մասին հարցերին՝ նախարարը հստակեցրեց, որ «եթե համապատասխան միջոցները ժամանակին ձեռնարկվեն, ապա որեւէ խնդիր չի լինի»։

Արմենուհի ՄԵԼՔՈՆՅԱՆ