Սովորաբար ամռան այս ժամանակահատվածում առավելապես կարեւորվում է հիգիենայի պատճաշ կազմակերպումը, ջրային եւ հանգստի գոտիներից օգտվելու եւ սննդի օգտագործման առաջնահերթ նորմերի պահպանումը։ Նախորդ տարվա համեմատ, ԱՆ տվյալների համաձայն, բոտուլիզմով ախտահարվելու դեպքերի աճ է գրանցվել։ Եթե նախորդ տարի 9 բոտուլիզմի դեպք է գրանցվել՝ 11 տուժածով, ապա այս տարվա կիսամյակային տվյալներով՝ արդեն 11 նման դեպք է արձանագրվել՝ 16 տուժածով։ Անցյալ տարի արձանագրվել է սննդից թունավորման 27 դեպք՝ 36 տուժածով, ընդ որում՝ 7–ը երեխաներ էին, այս տարի թունավորման 8 դեպք է արձանագրվել՝ 10 տուժածով։

Այս տարի 2 մանկապարտեզներում գրանցվել էին աղիքային վարակիչ հիվանդությունների տեղային բռնկումներ, իսկ վերջերս արձանագրվել էին թունավորման դեպքեր նաեւ թթից։

ՀՀ ԱՆ առողջապահական պետական տեսչության հիգիենայի բաժի պետ Մարգարիտա Բաբայանը երեկ լրագրողների հետ հանդիպմանը անդրադարձավ հիգիենայի պահպանման նորմերին, հետեւապես դրանցով պայմանավորված՝ թունավորման դեպքերից զերծ մնալու գործոններին։ Նախ եւ առաջ, տիկին Բաբայանը մատնանշեց նախորդ տարի տնային պայմաններում պատրաստված կրեմային հրուշակեղենից արձանագրված թունավորման դեպքը, որի պատճառ էր հանդիսացել չլվացած հավկիթը։

Նա հորդորեց բոլոր կանանց՝ ձու օգտագործելուց առաջ անպայման լվանալ, սակայն խորհուրդ չտվեց սառնարանում պահպանել արդեն լվացած հավկիթները։ Թունավորման առիթ կարող են հանդիսանալ նաեւ թթվասերով եւ մայոնեզով պատրաստված աղցանները, սունկը, չլվացած ձմերուկը։ Տաք ջերմաստիճանը, մասնագետի մեկնաբանմամբ, մանրէների զարգացման համար նպաստավոր պայմաններ են ստեղծում, ուստի նա առաջարկում է աղցանները չպահպանել երկար եւ օգտագործել միայն թարմ վիճակում՝ նվազեցնելով մայոնեզի գործածումը։ Այս ժամանակահատվածում խորհուրդ է տրվում ավելի շատ նախապատվություն տալ բանջարեղենով պատրաստված կերակրատեսակների, կանաչեղենի եւ մրգերի օգտագործմանը։

Սննդային թունավորումներից խուսափելու համար տիկին Բաբայանը խորհուրդ տվեց պահպանել սննդի անվտանգության կանոնները։ «Պետք է լավ լվանալ սննդամթերքը եւ այն պարագաները, որոնք օգտագործվում են կերակուր պատրաստելիս, բացի այդ հաճախակի լվանալ նաեւ ձեռքերը, իսկ հում սննդամթերքը մշակել առանձին տարաներում։

Ապուրները խորհուրդ չի տրվում պահպանել սենյակային ջերմաստիճանում, երկու ժամ հետո այն պետք է պահպանել սառնարանում, որտեղ եւս պետք է մթերքի պահպանման նորմերին հետեւել»,–նշեց տիկին Բաբայանը։

Թթի հետ կապված աղիքային վարակիչ հիվանդության պատճառը, ըստ Մարգարիտա Բաբայանի թթի հավաքման, տեղափոխման եւ վաճառքի արդյունքում ի հայտ եկած ախտոտվածությունն է եղել, որն ուտելուց առաջ չի լվացվել։ «Ծառի վրայից թութը քաղելու եւ ուտելու պարագայում այն անվելի անվտանգ է»,–ասաց մասնագետը։ Թունավորման ռիսկեր պարունակում է նաեւ պաղպաղակը, եւ թունավորման դեպքերը հաճախ լինում են փողոցում տեղադրված լցոնված պաղպաղակների պարագայում, որոնք ի հայտ են գալիս երկրորդային ախտոտվածության պատճառով։ «Սննդային թունավորման առաջացման նախադրյալներ ստեղծվում են նաեւ բացօթյա սննդի կազմակերպման վայրերում, որովհետեւ հստակեցված չէ, թե ինչ հիգիենիկ պայմաններում են պատրաստվել, բացի այդ, մարդիկ գնում են սնունդը շատ անգամ առանց լվացվելու։ Աղացած միսը եւս վտանգավոր է պատրաստի վիճակում գնելը, ցանկալի է, որ կանայք միսն աղան հենց տնային պայմաններում, քանի որ մսաղացը պետք է անընդհատ լվանալ, որը, ցավոք, շատ սննդի կետերում չի պահպանվում»,–նշեց հիգիենայի պահպանման բաժնի պետը։

Տապին սովորաբար ուլտրամանուշակագույն ճառագայթները բացասական ազդեցություն են թողնում մաշկի լորձաթաղանթի վրա, ուստի անհրաժեշտ է խուսափել արեւահարվելուց եւ հնարավորինս գտնվել ստվերում՝ 12.00—18.00 ընկած ժամականահատվածում։ Իսկ քրտնարտադրության դեպքում՝ ընդունել մեծաքանակ հեղուկներ, բայց ոչ գազավորված եւ քաղցր, նախընտրելի է բավարարվել միայն ջրով կամ թարմ մրգերից պատրաստված հյութերով։ Արեւի ճառագայթներից կարելի է պաշտպանվել նաեւ արեւային ակնոցներ եւ գլխարկներ կրելով։ Խորհուրդ է տրվում հաճախակիացնել ցնցուղի ընդունումը, իսկ ձեռքերը լվանալը հասցնել առավելագույնի։

Ինչ վերաբերում է դեկորատիվ լողավազաններում մանկահասակ երեխաների լողանալուն, ապա, ԱՆ ներկայացուցչի հավաստիացմամբ, դրանց արդյունքում աղիքային հիվանդություններով ախտահարվելու վտանգը մեծ է։ Այդ ջրերը պարունակում են տարաբնույթ մանրէներ, որոնք հետագայում կարող են հանգեցնել մաշկային եւ սնկային տարբեր հիվանդությունների։ Եթե մանուկները ցանկանում են զովանալ, ապա մասնագետը խորհուրդ է տալիս դա կազմակերպել միայն նախատեսված լողավազաններում, որտեղ ջուրը մշտապես ախտահանվում է եւ տեղադրված սարքավորումների միջոցով՝ մաքրվում։

«ԱՆ մասնագետների կողմից լայն քարոզչական աշխատանքներ են իրականացվում բոլոր մարզերում եւ մայրաքաղաքում, ինչ արդյունքում նվազել են թունավորման դեպքերը։ Բնակչությունը դարձել է ավելի իրազեկ»,–նշեց Մարգարիտա Բաբայանը։

Լուսինե ՆԱԶԱՐՅԱՆ