Հակաբիոտիկները ոչնչացնում են բակտերիաները, բայց ոչ վիրուսները: Անգինայի 10 դեպքից 9-ի և գրիպի 10 դեպքից 10-ի առաջացման պատճառներն են հենց վիրուսները, որոնց վրա հակաբիոտիկները չեն ազդում: Հակաբիոտիկների չհիմնավորված ընդունումը թուլացնում է վարակների դեմ պայքարելու դրանց ունակությունը, քանի որ թույլ է տալիս բակտերիաներին կայունություն ձեռք բերել հակաբիոտիկների նկատմամբ:

Նոյեմբերի 18-ը հակաբիոտիկների մասին իրազեկման համաեվրոպական օրն է: Այս կապակցությամբ Առողջապահության համաշխարհային կազմակերպության եվրոպական տարածաշրջանի հայաստանյան գրասենյակը, ՀՀ առողջապահության նախարարության և ՀՀ դեղերի և բժշկական տեխնոլոգիաների փորձագիտական կենտրոնի հետ համատեղ այսօր կազմակերպել էր քննարկում, որի հիմնական նպատակն էր իրազեկել ազգաբնակչությանը, թե որ դեպքերում կարելի է օգտագործել հակաբիոտիկներ, որ դեպքերում է հակացուցված:

Հակաբիոտիկներով ինքնաբուժումը նպաստում է դեղակայուն մանրէներով պայմանավորված համաճարակի տարածմանը եվրոպական տարածաշրջանում:
ԱՀԿ հայաստանյան գրասենյակի ղեկավարի ժամանակավոր պաշտոնակատար Տատյանա Կոլպակովան Panorama.am-ի հետ զրույցում ասաց, որ պետք է ազգաբնակչությանը իրազեկվի, թե երբ է նպատակահարմար օգտագործել հակաբիոտիկներ, երբ ոչ, պետք է անպայման դիմել բժշկի խորհրդատվությանը` ինչ օգտագործել, որքան ժամանակ:

ԱՀԿ-ն էլ կոչ է անում հանրությանը հակաբիոտիկները կիրառել միայն բժշկի նշանակմամբ և միայն բժշկի կողմից սահմանված ձևով: Ըստ Տ. Կոլպակովայի, պետք է հստակ պատկերացում կազմել, թե որ դեպքերում է հակաբիոտիկներ ցուցված, այլապես հակացուցված դեպքերում օգտագործելու պարագայում այն արդեն կարող է ազդեցություն չունենալ: