«Դեղերի մասին» ՀՀ նոր օրենքը դաշտն ամբողջովին կհամապատասխանեցնի եվրոպական ստանդարտներին: Այս մասին ասուլիսում հայտարարեց Հայաստանի դեղարտադրողների և ներմուծողների միության նախագահ Սամվել Զաքարյանը:

Նա նշեց, որ «Դեղերի մասին» ՀՀ օրենքն ընդունվել էր 1998 թվականին ու վաղուց նոր օրենքի կարիքը կար, այդ ուղղությամբ աշխատում էին դեղարտադրողների միությունը, պետական կառույցներ, վերջին երկու տարիների ընթացքում կազմակերպվել են մի շարք հանդիպումներ:

Ըստ նրա, այժմ նախնական տարբերակը մշակված է ու շրջանառության մեջ է մի շարք նախարարություններում: Այս ամսվա վերջին կամ դեկտեմբերի սկզբին ներկայացվելու է կառավարությանը:

«Նոր օրենքը ժամանակակից է, մոդեռն` հիմնված եվրոպական ստանդարտների, պահանջների հիման վրա »,- ասաց Ս. Զաքարյանը:

Նա նշեց, որ հունվարի 1-ից կառավարության որոշմամբ պետք է տեղական դեղ արտադրողներն JMP («Արտադրության պատշաճ պրակտիկա») համապատասխանության հավաստագիր ունենան: Ըստ Ս. Զաքարյանի, նոր օրենքը նաև այդ հավաստագրերի գործընթացն է համապատասխանեցնելու եվրոպական չափանիշներին: