Հաշվված օրեր անց հանրապետության դպրոցներում կվերսկսվի ուսումնական գործընթացը։ Երկար արձակուրդից հետո հիմնովին կփոխվի դպրոցականների առօրյան։

«ՀՀ առողջապահության նախարարությունը՝ խիստ կարեւորելով դպրոցահասակ երեխաների առողջության պահպանումը, ծնողներին հորդորում է այնպես վարվել, որ երեխաները զերծ մնան որոշակի հիվանդություններից, տանը կամ դպրոցում այնպիսի վիճակներում չհայտնվեն, որոնք կարող են հանգեցնել առողջության խաթարմանը»,–ասուլիսի ընթացքում ասաց ՀՀ ԱՆ հիվանդությունների վերահսկման եւ կանխարգելման ազգային կենտրոնի գլխավոր տնօրենի տեղակալ Լիլիթ Ավետիսյանը։

Նա ծնողներին առաջին հերթին հորդորեց երեխաներին դպրոց ուղարկել համոզված, որ նրանք առողջական որեւէ խնդիր չունեն։ Իսկ եթե կան որոշակի խնդիրներ, ապա անհրաժեշտ է մինչեւ դասերի սկսվելը այցելեն բժշկին, խորհուրդներ ստանան եւ լիովին առողջացած հաճախեն դպրոց։ Այնուհետեւ բանախոսն անդրադարձավ բազմաթիվ այն գործոններին, որոնցով պայմանավորված է դպրոցականի առողջության պահպանումը։

«Առողջության համար խիստ կարեւոր են երեխայի հիգիենան, սնուցումը, ճիշտ կեցվածքը, երեխայի կեցության վայրի պայմանները եւ այլն»,–ասաց նա՝ շեշտելով, որ անբարենպաստ գործոնների ազդեցությունն աճող օրգանիզմի վրա կարող է հանգեցնել ողնաշարի եւ կեցվածքի շեղումների։ Ճիշտ կեցվածքը ձեռք է բերվում հիմնականում մինչեւ 18 տարեկանը։

Նշվեց, որ դպրոցականի օրգանիզմի, այդ թվում՝ հենաշարժիչ համակարգի բնականոն զարգացման համար կարեւոր նշանակություն ունի լիարժեք սննդի ընդունումը, դրանում հանքային աղերի, վիտամինների առկայությունը։
ՀՀ ԱՆ հիվանդությունների վերահսկման եւ կանխարգելման ազգային կենտրոնի շրջակա միջավայրի հիգիենայի բաժնի պետ Աիդա Պետիկյանն անդրադարձավ երեխայի օրգանիզմի զարգացման համար կարեւորագույն դեր ունեցող մի շարք այլ գործոններին՝ այդ թվում դպրոցական պարագաներին։ Նա կարեւորեց ճիշտ պայուսակի ընտրությունը՝ խորհուրդ տալով հատկապես ցածր դասարաններում օգտագործել ուսապայուսակներ եւ ոչ փափուկ ուսապարկեր։

«Դպրոցական պայուսակը պետք է այնպես կրել, որպեսզի ծանրությունը մարմնի վրա հավասարաչափ բաշխվի։ Իսկ եթե պայուսակը ձեռքին են կրում, ապա չի կարելի այն անընդհատ նույն ձեռքով բռնել»,–շեշտեց բանախոսը։
Ծնողներին հորդորեց հետեւել, որ երեխաները մարմնի ճիշտ դիրքով նստեն՝ սեղանին հենված նախաբազուկներ, ոտնաթաթերը՝ հենված հատակին։

Բանախոսները նշեցին, որ դպրոցական տարիքի երեխաների առողջության վրա բացասաբար կարող է անդրադառնալ նաեւ համակարգիչների եւ բջջային հեռախոսների, մասնավորապես՝ սմարթֆոնների երկարատեւ օգտագործումը, ինչը բերում է հոգնածության եւ աշխատունակության անկման, առաջանում է ուսային գոտու, բազկի եւ նախաբազկի մկանների լարվածություն, սիրտ—անոթային, նյարդային եւ շնչառական համակարգերում նկատվում են ֆունկցիոնալ փոփոխություններ, առաջացնում է աչքերի լարվածություն, ինչը ժամանակի ընթացքում կարղ է բերել տեսողության վատացման։ Հետեւաբար պետք է սահմանափակվի համակարգչից օգտվելու ժամանակահատվածը եւ ապահովվի համապատասխան լուսավորություն։ Տեսողության շեղումների կանխարգելման նպատակով աշխատանքային սեղանները պետք է ապահովվեն ձախակողմյան լուսավորությամբ։

Համակարգչի հետ աշխատանքը պետք է լինի սահմանափակ, ցանկալի է աշխատանքն ընդմիջել ամեն 20—30 րոպեն մեկ՝ մի քանի րոպե քայլել—մարզվելով։
Դպրոցականի առողջության պահպանման գործում կարեւորվեց ձեռքերի եւ մաշկի հիգիենան։ Ձեռքերի հիգիենայի պահպանումը կարող է զերծ պահել մի շարք վարակիչ հիվանդություններից։ Ճիշտ ֆիզիկական ակտիվությունը եւս կարող է կանխարգելել հետագայում մի շարք հիվանդությունների առաջացումը։