Դեղերի նկարագրություն
Մարիխուանա օգտագործող՝ աշխարհի ամենափոքր հիվանդը
ԱՄՆ Օրեգոն նահանգի 7-ամյա բնակչուհին, ով տառապում է սպիտակարյունությամբ (լեյկեմիա), դարձել է մարիխուանա ընդունող՝ աշխարհի ամենափոքր հիվանդը։Միշել Կոմստոկի մոր խոսքով՝ հատուկ հաբերը, որոնք պարունակում են թմրանյութեր, օգնում են թեթևացնել քիմիաթերապիայի ծանր հետևանքները։ Սակայն երեխայի հայրը, ով ապրում է Հյուսիսային Դակոտայում, մտահոգված է, քանի որ թմրադեղն ազդում է երեխայի ուղեղի վրա։
Փոքրիկին սարսափելի ախտորոշումը նշանակել են անցած տարվա գարնանը։ Արդեն մի քանի ամիս է մայրն ամեն օր նրան տալիս է կանաբիսի յուղ պարունակող հաբեր։ Նրա կարծիքով՝ դրանք կարգավորում են երեխայի վիճակը՝ նվազեցնելով ծանր պրոցեդուրաների ազդեցությունը։
Երեխայի խոսքով՝ դեղը լավացնում է նրա քունն ու ախորժակը, սակայն ամենակարևորը՝ «բարձրացնում է տրամադրությունը՝ ստիպելով ծիծաղել»։
«Որպես մայր՝ ես փորձում եմ ինչ-որ կերպ թեթևացնել նրա տանջանքները»,- խոստովանել է 25-ամյա Իռեն Պարչեյսը, ով իր նոր ամուսնու հետ հետևում է, որպեսզի երեխան կանոնավոր կերպով ընդունի հաբերը։
Երեխայի հայրը, սակայն, այնքան է անհանգստացած բուժման մեթոդներով, որ կապվել է պաշտոնյաների, ոստիկանների և բժիշկների հետ։ Մասնավոր լաբորատորիայում կատարված անալիզները երեխայի մոտ ցույց են տվել միևնույն թունավորման մակարդակը, ինչը և մեծ մարդու մոտ, ով ամեն օր թմրադեղեր է ընդունում։
Սակայն Օրեգոն նահանգի իրավապահները չեն կարող ոչինչ անել. օրենքը չի նախատեսում վերահսկողություն անչափահասների նկատմամբ մարիխուանայի բժշկական նպատակներով օգտագործման համար։ Այդ հարցերը մնում են բժիշկների և ծնողների հայեցողությանը։
