Կենսաթոշակային հաշվում առկա միջոցները մասնակիցները կարող են ամբողջությամբ ստանալու պահանջ ներկայացնել այն դեպքում, եթե որոշ հիվանդություններ ունեն։ Այսպես հաստատվել է կառավարության երեկվա նիստում ընդունված որոշմամբ։ Աշխատանքի եւ սոցիալական հարցերի եւ առողջապահության նախարարները որոշումն ուժի մեջ մտնելուց հետո 3 ամսվա ընթացքում պետք է հաստատեն այդ ցանկում ներառված հիվանդություններով հիվանդանալու դեպքում առողջապահության նախարարության կողմից եզրակացության տրամադրման կարգը։

Ըստ աշխատանքի եւ սոցիալական հարցերի նախարար Արտեմ Ասատրյանի, այդ հիվանդություններից են արյան շրջանառության համակարգի հիվանդությունները, ներզատական եւ նյարդային համակարգի հիվանդություններն ու նորագոյացությունները։

Ընդ որում, մասնավորեցվում է, որ արյան շրջանառության համակարգի հիվանդություններից խոսքը, ասենք, զարկերակային գերճնշման մասին է՝ բարդացված նյարդային կենտրոնական համակարգի, սրտամկանի, ակնահատակի, երիկամների ախտահարումով, խիստ արտահայտված ֆունկցիաների խանգարումով։ Նաեւ՝ սրտային անբավարարությունը։ Կամ՝ լյարդի ցիրոզը՝ 4—րդ շրջան, 4—րդ աստիճանի դռներակային գերճնշումով, կերակրափողի երակների վարիկոզ լայնացմամբ, ինտոքսիկացիայով, ասցիտով, հյուծումով։ Կուտակայինի գումարները մասնակիցները կարող են հետ պահանջել, եթե տուբերկուլոզ ունեն։ Խոսքը տուբերկուլոզի խրոնիկական ընթացող պրոգրիսվող ձեւերի մասին է՝ պոլիօրգանական ախտահարումով, հյուծումով (կախեքսիայով), խիստ արտահայտված օրգանիզմի ֆունկցիաների խանգարումով։ Եվ երիկամների քրոնիկական հիվանդությունների կամ այլ հիվանդությունների հետեւանքով արտահայտված երիկամային ախտահարումների դեպքում՝ բարդացված խրոնիկ երիկամային անբավարարությամբ, տերմինալ փուլում, ծրագրային հեմոդիալիզի կամ փոխպատվաստման անարդյունավետությամբ։
Նաեւ շաքարային դիաբետի դեպքում՝ երիկամների ախտահարումով։

Նյարդային համակարգի հիվանդություններն էլ կառավարության հաստատած ցանկում են։ Եվ երկու դեպքում կարող են գումարները հետ ստանալ՝ 1. կենտրոնական նյարդային համակարգի խրոնիկ պրոգրիսվող հիվանդությունների՝ արյան շրջանառության սուր եւ խրոնիկ խանգարումներով, խիստ արտահայտված թուլամտությամբ, կոնքի օրգանների ֆունկցիայի արտահայտված խանգարումներով, պառկելախոցերով, երկրորդային ինտոքսիկացիայով եւ 2. կողմնային ամիոտրոֆիկ սկլերոզի դեպքում՝ շարժողական ֆունկցիայի խիստ արտահայտված խանգարումով, հյուծումով։

Ինչ վերաբերում է նորագոյացություններին, ապա խոսքը չարորակ նորագոյացությունների (մետաստատիկ քայքայումով, հյուծումով), միելոմային հիվանդության (տարածուն պաթոլոգիկ կոտրվածքներով, հյուծումով), արյան չարորակ հիվանդությունների (4—րդ փուլում, բուժման ոչ ենթակա ձեւերով, արյունաստեղծ ֆունկցիայի խիստ արտահայտված խանգարումով) մասին է։

Նկատենք, որ «Կուտակային կենսաթոշակների մասին» օրենքի 56—րդ հոդվածի համաձայն՝ մասնակիցն իրավունք ունի ցանկացած ժամանակ, ներառյալ՝ նախքան կենսաթոշակային տարիքը լրանալը, ներկայացնելու իր կենսաթոշակային հաշվում առկա միջոցները, անկախ դրանց չափից, ամբողջությամբ ստանալու պահանջ՝ որոշ հիվանդություններով հիվանդանալու դեպքում։ Ցանկում ներառվել են այն հիվանդությունները, որոնցով հիվանդանալու եւ նկարագրված ծայրահեղ վիճակներում գտնվելու դեպքերում անձի կյանքին անմիջական վտանգ է սպառնում՝ նա ունի ամոքիչ (պալիատիվ) օգնության կարիք (ամոքիչ օգնության հարցին մենք անդրադարձել ենք առիթով)։

Արմենուհի ՄԵԼՔՈՆՅԱՆ