ՀՀ առողջապահության նախարարությանը եւ բժշկական հանրությանը մտահոգում է երեխաների շրջանում կենցաղային սուր թունավորումների աճի միտումը։
Միայն Երեւանի Մ. Հերացու անվան պետական բժշկական համալսարանի մանկական թունաբանական կենտրոնում 2014թ. գրանցվել է թունավորման 588 դեպք՝ նախորդ տարվա 470—ի փոխարեն։ Ընթացիկ տարում երեխաների շրջանում արդեն իսկ սուր թունավորումների 415 դեպք է արձանագրվել։

Ցավալին այն է, որ փոքրիկները հիմնականում թունավորվում են ծնողների, մեծահասակների անուշադրության, անփութության հետեւանքով։ Իսկ թունավորումների պատճառ են դառնում կենցաղում օգտագործվող քիմիական նյութերը, ինչպես նաեւ զանազան դեղամիջոցները։ Առավել վտանգավոր է, երբ քիմիական նյութը պահվում է կերակրի կամ ըմպելիքի համար նախատեսված տարաներում, շշերում։
Երեխաների շրջանում թունավորումները հիմնականում զարգանում են շատ արագ, ունենում ծանր ընթացք եւ պահանջում ոչ միայն անհապաղ բժշկական օգնություն, այլեւ երկարատեւ բուժում։

ՀՀ առողջապահության նախարարությունը կոչ է անում ծնողներին՝ կենցաղային վտանգավոր քիմիական նյութերը, ինչպես նաեւ դեղորայքը պահել փակվող պահարաններում կամ երեխաներին անհասանելի այլ վայրերում։ Չափազանց ուշադիր լինել վտանգավոր քիմիական նյութերն օգտագործելիս, քանի որ հենց այդ ընթացքում դրանք կարող են երեխաներին հասանելի դառնալ։ Թունավոր նյութերը պահել գործարանային սրվակների եւ տուփերի մեջ՝ պահպանելով նախազգուշացնող պիտակները՝ շփոթությունից խուսափելու համար։

ՀՀ առողջապահության նախարարությունն այսպիսի կոչով հանդես է գալիս՝ հաշվի առնելով վիճակագրությունը։ 2014թ. Երեւանի Մ. Հերացու անվան պետական բժշկական համալսարանի «Մուրացան» հիվանդանոցային համալիրի մանկական թունաբանության եւ մանկական վերակենդանացման կլինիկայում գրանցվել է սուր թունավորումների 588 դեպք՝ նախորդ տարվա 470—ի փոխարեն։ Ընթացիկ տարում երեխաների շրջանում արդեն իսկ 415 նման դեպք է արձանագրվել։
2014թ. տվյալներով՝ ընդհանուր թունավորումներից դեղորայքային թունավորում է եղել 220—ը (36%), այրող—քայքայող նյութերից՝ 109—ը (36%), կալիումի պերմանագնատից 26—ը (5%), ալկոհոլից 34—ը (6%), շմոլ գազից՝ 34—ը (6%), թունաքիմիկատներից՝ 22—ը (4%)։

«Եթե ընտանիքի անդամների տեսադաշտից երեխաները դուրս չմնան, ապա մենք կարող ենք խուսափել նման տխուր դեպքերից»,–լրագրողների հետ հենց կլինիկայում կազմակերպված հանդիպման ժամանակ ասաց ՀՀ ԱՆ մոր եւ մանկան առողջության պահպանման վարչության պետ Կարինե Սարիբեկյանը՝ հավելելով, որ մանկական մահացության կառուցվածքում դրանք հինգ պատճառներից մեկն են։ Մինչեւ 1 տարեկան երեխաների մահացության պատճառներից դժբախտ պատահարները 0.8 տոկոս են կազմում։ Սակայն 1—5 տարեկան երեխաների շրջանում այդ նույն ցուցանիշը մեծանում է մինչեւ 20 անգամ։

«Մինչեւ մեկ տարեկան երեխան մայրիկի, ընտանիքի մյուս անդամների գրկում է մեծանում։ Խնդիրներն առաջանում են, երբ նա սկսում է ակտիվ տեղաշարժվել»,–հավելում է մանկաբույժը։ Նրա խոսքով, կարեւորելով խնդիրը՝ նախարարությունը Երեխայի առողջության անձնագրում հատուկ էջ է հատկացրել, որտեղ խորհուրդներ են տրվում երեխայի անվտանգության, այդ թվում՝ թունավորումներից խուսափելու վերաբերյալ։

Ցավոք սրտի, թունավորումների դեպքերն ավելանում են։ Երեւանի Մ. Հերացու անվան պետական բժշկական համալսարանի «Մուրացան» հիվանդանոցային համալիրի մանկական թունաբանության եւ մանկական վերակենդանացման կլինիկայի ղեկավար Մարինե Գրիգորյանը ներկայացրեց, որ տանը պահվող քիմիական նյութերից հատկապես վտանգավոր են քայքայող քիմիական նյութերը, օրինակ՝ ամոնիակը, կաուստիկ սոդան (հիմք), թթուները (քացախաթթվային էսենցիան), կրային նստվածք քայքայող որոշ նյութերը, մաքրող, լվացող որոշ հեղուկները, որոնք պարունակում են հիմքեր ու թթուներ եւ կարող են շատ ծանր վնասվածքներ առաջացնել։ Այլ վտանգավոր նյութերից նշվեցին լուծիչներն ու նավթամթերքները, օրինակ՝ լաքերը, նավթալամպերի վառելիքը, բենզինը, կերոսինը։

Կարող են չափազանց վտանգավոր լինել նաեւ դեղորայքային թունավորումները։ Խիստ վտանգավոր են սրտային եւ ճնշում կարգավորող դեղերը, քնաբերները, հակադեպրեսանտները, հոգեմետ դեղերը, ցավազրկողները, հակադիաբետիկ դեղերը, կոլխիցինը եւ այլն։ Երեխաները հիմնականում հակված են ուտելու քաղցրացված դրաժեները կամ օշարակները եւ դրանք կարող են ընդունել մեծ քանակներով, որը չափազանց վտանգավոր է։

Մասնագետները խորհուրդ տվեցին երեխաների նման թունավորումների դեպքում 82—82 հեռախոսահամարով արագ դիմել մասնագիտացված միակ կլինիկա, որտեղ կարող են ախտորոշել թունավորումը, գնահատել վտանգի աստիճանը եւ անհրաժեշտ բուժում իրականացնել։

ՀՀ առողջապահության նախարարության պետական նպատակային ծրագրի շրջանակում գործում է նաեւ երեխաների անհետաձգելի արտագնա բուժօգնություն, որի շրջանակում Երեւանի Մ. Հերացու անվան պետական բժշկական համալսարանի «Մուրացան» հիվանդանոցային համալիրի մանկական թունաբանության եւ մանկական վերակենդանացման կլինիկան իրականացնում է անհրաժեշտ ծառայություն։ Կլինիկան այդ նպատակների համար ունի նաեւ ռեանիմոբիլ։

Հիշենք, որ բարեհաջող ելքը մեծապես պայմանավորված է ժամանակին դիմելով եւ մասնագիտական օգնություն ցուցաբերելով։