Կառավարության երեկվա նիստից հետո առողջապահության նախարար Արմեն Մուրադյանը հերքեց այն լուրերը, թե մանկական մահացության թիվն ավելացել է։ Ընդհակառակը՝ վիճակագրական տվյալներով՝ մանկական մահացությունը նվազում է։ «Այսօր հակված ենք մեր ուժերն ուղղել դեպի միջազգային որակ։ Առավել եւս մեր կողմից այսօր չափագրման գործընթացն ընթանում է, որը արդիական է եւ օրվա պահանջն է»–ընդգծեց նախարարը։

Տեղեկացնենք, որ մանկական մահացության ցուցանիշը (ՄՄՑ) բնութագրում է մինչեւ 1 տարեկան երեխաների մահացությունը եւ հաշվարկվում 1000 կենդանածինի հաշվով։ Մինչեւ 2012թ. Հայաստանը բնորոշվել է մանկական մահացության միջին մակարդակով (ըստ ԱՀԿ դասակարգման), իսկ 2013թ. հետո գրանցվել է ցուցանիշի նվազում, ինչը, ըստ նույն դասակարգման, Հայաստանին դասում է ՄՄ ցածր մակարդակ ունեցող երկրների շարքում։

Հայաստանի ՄՄ ցուցանիշը զգալի բարենպաստ է ԱՊՀ շատ երկրների համեմատությամբ (զբաղեցնում է 4—րդ հորիզոնականը Ռուսաստանից, Ուկրաինայից եւ Բելառուսից հետո), սակայն գերազանցում է միջին եվրոպական մակարդակը։ 2012—2014թթ. միտումները վկայում են, որ ՄՄ միջին տարեկան ցուցանիշը նվազել է շուրջ 21% (2012թ.՝ 23.6%, 2013թ.՝ 21.5%, 2014թ.՝ 18,6%)։
Ըստ ՀՀ ԱՆ օպերատիվ ընթացակարգով հավաքագրված տվյալների, 2015թ. ընթացքում հանրապետության ծննդօգնության հիմնարկներում արձանագրվել է մայրական մահացության 5 դեպք (նույն թիվը՝ 2014թ. նույն ժամանակահատվածի համեմատությամբ)։

Անդրադառնալով մամուլում տարածված տեղեկությանը, թե Աբովյան քաղաքի հիվանդանոցի ծննդատանը մահացած երեխայի դին դրել են մոր կրծքին, Մուրադյանը հերքեց՝ բացառելով նման դեպքերը։ «Յուրաքանչյուր նման դեպքը հատում է բոլոր հնարավոր ցինիզմի սահմանները»,–եզրափակեց Արմեն Մուրադյանը։