«Հայկական ժամանակ» թերթի հոկտեմբերի 20-ի համարում տպագրված «Հիվանդներն առանց դեղի» հրապարակման առնչությամբ տեղեկացնում ենք, որ «Քսելոդա» 500 մգ N120 թաղանթապատ դեղահատեր դեղը ՀՀ-ում վերագրանցվել է 2015թ օգոստոսի 8-ին` գրանցման հավաստագրի իրավատիրոջ հայտի հիման վրա` երեք տարի պիտանիության ժամկետով:

Ինչպես հայտնում է Հայաստանի Հանրապետության Առողջապահության նախարարության պաշտոնական կայքը, նյութում հիշատակված ներմուծման փորձաքննության հայտը ստացվել է 2015թ. սեպտեմբերի 11-ին: Փորձաքննության արդյունքում պարզվել է, որ վերագրանցումից հետո առաջին անգամ ներմուծվող դեղի պիտանիության ժամկետը չի համապատասխանում գրանցված դեղի պիտանիության ժամկետին։ Սահմանված ընթացակարգերին և ժամկետներին համապատասխան սեպտեմբերի 19-ին տրամադրվել է փորձագիտական եզրակացություն, որի հիման վրա տրվել է ներմուծման մերժման հրաման: Հաշվի առնելով, որ դեղի անվտանգության և արդյունավետության գնահատումը բարդ ու պատասխանատու գործընթաց է, առողջապահության նախարարությունը չէր կարող շուտափույթ որոշումներ ընդունել` առանց բավարար հիմքերի: Քանի որ դեղի գրանցման, որակի, անվտանգության և արդյունավետության, ներառյալ` պիտանիության ժամկետի որոշման պատասխանատուն հավաստագրի իրավատերն է, հետևաբար գրություն է ուղարկվել` պարզաբանումներ ստանալու նպատակով: Պատասխան գրությունից պարզվում է, որ դեղի բաղադրությունը և արտադրական գործընթացը անփոփոխ են, սակայն մատակարարված արտադրանքը նախատեսված է կլիմայական այլ գոտու երկրների համար:

Տեղին է հեշեցնել, որ հիվանդների համար սրտացավ կեցվածքով ներկրողի ղեկավարած կազմակերպության կողմից արդեն իսկ կատարվել են դեղերի անօրինական ներմուծումներ, որին անդրադարձել է ՀՀ առողջապահության նախարարությունը։

Նշենք, որ Հայաստանի Հանրապետությունում դեղերի գները դեռևս չեն կարգավորվում և չկան ինչպես գրանցման հավաստագրի իրավատերերի, այնպես էլ մեծածախ ու մանրածախ գների զսպան իրավական լծակներ: Սակայն, տարիներ շարունակ ՀՀ ներմուծվող «Քսելոդա» դեղի և ներմուծվող վերջին խմբաքանակի գներն էականորեն տարբերվում են, որը գրանցման հավաստագրի իրավատերերի հետ առողջապահության նախարարի անմիջական բանակացությունների արդյունք է: