«Վագա Ֆարմ» դեղագործական ընկերությունը դատական կարգով վիճարկել է 100 000 դրամի չափով տուգանքի վճարման մասին որոշումը, որը կայացվել էր ընկերության նկատմամբ Ռուսաստանից «Էնտերոլ» դեղամիջոցը ներկրելու պատճառով։ Հիշեցնենք, որ Առողջապահության պետական տեսչությունը վարչական վարույթ է բացել «Վագա Ֆարմի» նկատմամբ, հայտարարելով, որ տեղի է ունեցել դեղամիջոցի ապօրինի ներկրում, մինչդեռ վերոհիշյալ ընկերության տնօրեն՝ Վահե Վարսանյանը, հավաստիացնում է, որ ներկրումն իրականացվել է Հայաստանի ու ԵՏՄ օրենսդրության համապատասխան։ «Մեր ներմուծումն օրինական է, բոլոր ինվոյսները փոխանցվել են Ֆինանսների նախարարությանը, ոչ մի խնդիր չկա, ու մենք հույս ունենք, որ դատարանն անկողմնակալ որոշում կկայացնի,- ասել է նա NEWS.am Medicine-–ի թղթակցի հետ զրույցում։

Ինչպես ավելի վաղ հայտնել էր ՀՀ Առողջապահության նախարարությունը, «Առողջապահական պետական տեսչության կողմից հուլիսի 7-ին հարուցված վարչական վարույթի արդյունքում պարզվել է, որ «Վագա Ֆարմ» ՍՊԸ-ն, խախտելով ՀՀ կառավարության 2000թ. սեպտեմբերի 20-ի թիվ 581 որոշմամբ հաստատված գործող կարգը, ԵԱՏՄ տարածքից` Ռուսաստանի Դաշնության «Բուկաեւ.ռու» ՍՊԸ-ից 2015թ. մայիսի 27-ին ՀՀ տարածք է ներմուծել մեծածախ քանակներով շուրջ 40 անվանում տարբեր դեղեր։ Այս մասին հայտնում է ՀՀ առողջապահության նախարարությունը։ Համաձայն հաղորդագրության, ընկերությունը նախարարությունից սահմանված կարգով չի ստացել համապատասխանության հավաստագիր (ազատ շրջանառության համար թույլտվություն):

Պարզվել է նաեւ, որ ներկրված դեղերից «Էնտերոլ» 250 մգ դեղապատիճ N10, (սերիա թիվ 1487, 1507)-ը գրանցված չէ ՀՀ-ում, բացակայում է ՀՀ տարածք դեղերի օրինական ներմուծված սերիաների ցանկից եւ փաթեթը չի համապատասխանում ՀՀ-ում գրանցված տարբերակին»:

ԻՆչպես պարզաբանեց Վահե Վարսանյանը՝ «Առողջապահության նախարարությունը ջրով բաժակում փոթորիկ է բարձրացրել»։ Նրա խոսքով, Biocodex ֆրանսիական ընկերությունը, որն արտադրում է «Էնտերոլ» դեղամիջոցը, հեռացել է հայկական շուկայից, սակայն հաշվի առնելով, որ դա կարեւոր դեղ է ու պահանջարկ ունի, «Վագա Ֆարմ» ընկերությունը դեռ տասը տարի առաջ ինքն էր գրանցել դեղամիջոցը եւ արդեն երկու անգամ հասցրել է վերագրանցել այն։

Նա նաեւ պարզաբանել է, որ քանի որ Ռուսաստանում դեղերի գները ռուբլով են ամրագրված ու շուկայի մեծության պատճառով արտադրողը Ռուսաստանին ավելի ցածր գնով է տրամադրում այս դեղորայքը, այնպես է ստացվել, որ ռուսական դիստրիբյուտերի գները շատ ավելի ցածր են, քան արտադրողն է առաջարկում Հայաստանին։ Օգտվելով դրանից՝ «Վագա Ֆարմ» ընկերությունը զուգահեռ ներմուծել է այս դեղամիջոցը։

Կազմակերպության տնօրենը հիշեցրեց, որ ըստ ԵՏՄ օրենսդրության՝ դեղերի ներմուծումը կատարվում է առանց մաքսային ընթացակարգերի, եւ ապրանքը անմիջապես մտնում է ներմուծողի պահեստ։ Ճիշտ է, կա Հայաստանի կառավարության որոշումն այն մասին, որ ԵՏՄ երկրներից դեղամիջոց ներկրելիս՝ այն պետք է ստանա Դեղերի փորձագիտական ազգային կենտրոնի եզրակացությունը, բայց տվյալ կետը չկատարելը ոչ մի իրավական հետեւանք չի ենթադրում։

Անդրադառնալով այն պնդումներին, որ ներկրված «Էնտերոլի» փաթեթավորումը չի համապատասխանում Հայաստանում գրանցված փաթեթավորմանը՝ «Վագա Ֆարմ» ընկերության ղեկավարը պարզաբանել է, որ Հայաստանում գրանցված փաթեթի վրա ռուսերեն գրառումից բացի նաեւ ղազախերեն գրառում է եղել, քանի որ այդ նույն խմբաքանակի դեղամիջոցները նաեւ Ղազախստան են մատակարարվել։Մինչդեռ Ռուսաստանից ներկրված փաթեթների վրա միայն ռուսերեն գրառում կա, քանի որ խմբաքանակը արտադրվել է ռուսական շուկայի համար։

Վահե Վարսանյանը կարդացել է մեկ հատված ՀՀ Կառավարության այդ նույն թիվ 581 որոշումից, որը վկայակոչում էր Առողջապահության նախարարությունը, ըստ որի «Հայաստանի Հանրապետություն կարող են ներմուծվել պետական գրանցում ունեցող դեղերը, որոնց փաթեթավորման փոփոխությունները չեն ազդում արտադրանքի անվտանգույան եւ որակի վրա, եւ երբ առկա է որակի հավաստագրի բնօրինակը կամ արտադրողի կողմից ներմուծման տրված հավաստագրի պատճենը»: Դեղագործական ընկերության ղեկավարի խոսքով իրենք բոլոր պահանջված փաստաթղթերն ունեն , իսկ այն փաստը, որ «ներկրված փաթեթների վրա ղազախերեն գրություն չկար, հաստատ չի ազդում դեղորայքի անվտանգության ու որակի վրա»։

Պարոն Վարսանյանի գնահատականով՝ պետությունը այնպես է արել, որ եթե իրավատերը հեռանա մեր երկրից, դեղամիջոցը հնարավոր լինի զուգահեռ ներկրել հարեւան շուկաներից։ Պետությունը այս որոշումն այնպես է ձեւակերպել, եթե նույնիսկ իրավատերը փորձի փակել շուկան, գրանցելով միայն մեկ տեսակի փաթեթավորում, շուկան միեւնույն է բաց, մրցունակ լինի ու գներն էլ չեն բարձրանա։

«Բայց փաստորեն իրավատերերը բարձրացնում են գները, ու Դեղերի Փորձագիտական կենտրոնի վնասակար քաղաքականության պատճառով մենք չենք կարողանում այդ նույն դեղամիջոցը ներմուծել հարեւան շուկայից։ Իրավատերն ինչ գին ուզում է դնում է, ու դրանից սպառողներն են տուժում»,- ասել է նա՝ հավելելով, որ իրենք բաց ու օրինական են աշխատում, բայց Առողջապահության նախարարության կողմից նման մոտեցումը կարող է այդ նույն Ռուսաստանից դեղամիջոցի ապօրինի ներկրում սադրել։