«Հոֆման Լա Ռոշ» ընկերությունը Հայաստանում վերագրանցել է «Քսելոդա» դեղամիջոցը, այս անգամ՝ 24-ամսյա պիտանելիության ժամկետով, եւ «Վագա ֆարմ» ներկրող ընկերությունը կարող է մոտ ժամանակներս շուկա հանել դեղամիջոցի ներկրած քանակը։ Այս մասին NEWS.am Medicine-ի թղթակցին հայտնել է «Հոֆման Լա Ռոշի» հայկական ներկայացուցչության ղեկավար Աննա Հովհաննիսյանը։

Նրա խոսքով՝ նա Դեղերի փորձագիտական կենտրոնից հաստատում է ստացել, որ դեղամիջոցի գրանցումը ավարտվել է, եւ մի քանի օրից այն կհայտնվի դեղատներում։

Աննա Հովհաննիսյանը նշեց, որ խնդիրը Առողջապահության նախարար Արմեն Մուրադյանի ուշադրության կենտրոնում է, եւ նա անձամբ կարգադրել է կարճ ժամկետում լուծել գրանցման հարցը։

Պատասխանելով հարցին, թե ինչու է ստեղծվել նման իրավիճակ, հայկական ներկայացուցչության ղեկավարը նշել է, որ ժամանակին «Հոֆման Լա Ռոշը» Հայաստանի համար նախատեսված փասթաթղթերում գրանցել էր «Քսելոդա» դեղամիջոցը, որի պահպանման ժամկետը 36 ամիս էր: Քանի որ Հայաստանը գտնվում է երկրորդ կլիմայական գոտում, դեղամիջոցը ներկրվում էր 24-ամսյա պահպանման ժամկետով, սակայն ոչ ոք դրան ուշադրություն չէր դարձնում։ «Եթե, օրինակ, ներկրվեր 48-ամսյա պիտանելիության ժամկետով դեղամիջոց, դա կարող էր խնդիր առաջացնել, բայց քանի որ միշտ ներկրվել է ավելի քիչ պիտանելիության ժամկետով դեղամիջոց, դա խնդիրներ չի առաջացրել։ Այս անգամ ավելի խիստ մոնիտորինգ է իրականացվել, եւ դեղամիջոցի ներկրումը արգելվել է»,- ասել է Աննա Հովհաննիսյանը՝ հավելելով, որ այնուամենայնիվ պետք է արժանին մատուցել Առողջապահության նախարարությանը եւ Դեղերի փորձագիտական կենտրոնին, որոնք արել են ամենը հարցն արագ լուծելու համար։

Եկող տարի «Հոֆման Լա Ռոշ» ընկերությունը Հայաստանում կներկայացնի «Քսելոդա» դեղամիջոցը՝ Հայաստանի համար հատուկ փաթեթավորմամբ եւ 36-ամսյա պահպանման ժամկետով։ Այլեւս նման խնդիրներ չեն առաջանա, հավաստիացրել է ներկայացուցչության ղեկավարը։

Հիշեցնենք, որ Դեղերի փորձագիտական կենտրոնը սեպտեմբերի վերջին արգելել էր «Վագա ֆարմ» ընկերությանը Հայաստան ներկրել «Քսելոդա» դեղամիջոցը՝ ներկրված դեղորայքի եւ Հայաստանում գրանցված դեղորայքի պիտանելիության ժամկետների անհամապատասխանության պատճառով։ Խմբաքանակը մինչ այսօր գտնվում է մաքսային պահեստում։

Ընկերության ղեկավար Վահե Վարսանյանը պատրաստ էր դատարան դիմել։ NEWS.am Medicine-ի թղթակցի հետ զրույցում նա ասել էր, որ օրենքը չի պարտադրում վերագրանցել դեղամիջոցը դրա պահպանման ժամկետի փոփոխման, անգամ երկարաձգման ժամանակ։

NEWS.am Medicine-ի անցկացրած հարցմանը մասնակցած բժիշկներն ու հիվանդները նշել են, որ այդ դեղամիջոցն այլընտրանք չունի, եւ դրա բացակայությունը էապես նկատելի է։ Միաժամանակ, Առողջապահության նախարարությունը օրերս հայտնել է, որ հայաստանյան շուկայում կա մեկ այլ գրանցված դեղամիջոց, որը պարունակում է նույն ակտիվ նյութը՝ «Կապեցիտաբինը»։