Հայաստանում առաջին անգամ քննարկվող «Դեղերի մասին» օրինագծում կետ է ներառված այն մասին, որ Առողջապահության նախարարությունը պիտի ունենա այն դեղերի ցանկը, որոնց արժեքը պետությունը կփոխհատուցի: Այդ մասին NEWS.am Medicine-ի թղթակցի հետ զրույցում ասել է Հայաստանի առողջապահության նախարարի տեղակալ Սերգեյ Խաչատրյանը:

Նրա խոսքով, այդ ցանկում ներառված կլինի 43 (ըստ ազդող նյութի) անվանում առաջին անհրաժեշտության դեղ։ Այդ դեղամիջոցները կգնի պետությունը եւ գնորոշման որոշակի մեխանիզմ կգործի: «Մենք պիտի ուսումնասիրենք մերի նման երկրներում այդ դեղամիջոցների գները, որոշենք դրանց առավելագույն եւ նվազագույն գները, պիտի ուսումնասիրենք դեղերի արժեքը հենց արտադրողի մոտ, հաշվարկենք առաքման ծախսերը եւ այլն, նաեւ հաշվարկենք այն շահույթը, որ ստանալու են մեծածախ վաճառողները: Այդ ամենի հիմքի վրա մենք պիտի որոշենք կոնկրետ դեղի գնման արժեքը», - ասել է Սերգեյ Խաչատրյանը:

Փոխնախարարի խոսքով, պետությունը դրանով լծակներ կստանա շուկայում գների վերահսկման համար: Ըստ նրա, մատակարարներն ու մեծածախ ընկերությունները կառաջնորդվեն արդեն այդ գներով, մաքսանենգությունն այլեւս ձեռնտու չլինի։ Ընդ որում դեղերի որակն ու անվտանգությունը եւս ապահովված կլինի։

Նա նշել է, որ աշխարհում գոյություն ունեն պետության կողմից գների կարգավորման նաեւ այլ մեխանիզմներ: Հայաստանն առայժմ առաջին քայլն է անում, բայց հետագայում, այդ մեխանիզմի ներդրումից եւ ամրապնդումից հետո, կարող են նաեւ այլ մեխանիզմներ կիրառվել: Մասնավորապես` այն, որն առաջարկում են Հայաստանի դեղագործական շուկայի որոշ խաղացողներ, երբ հիվանդը կարող է գնել ցուցակի մեջ ներառված դեղի ավելի թանկ տարբերակ, պետությունից փոխհատուցում ստանալ եւ ինքը վճարել հավելյալ գումարը:

Փոխնախարարի խոսքով, դա բավականին բարդ մեխանիզմ է եւ կարող է հաջողությամբ կիրառվել միայն լավ զարգացած էլեկտրոնային համակարգում: Նա նշել է, որ ներկայումս ընթացող զուգահեռ գործընթացները հիմք են տալիս ենթադրելու, որ եկող տարվա վերջին այդ մեխանիզմներն արդեն մշակված կլինեն եւ դրանք հնարավոր կլինի ներդնել:

Նշենք, որ «Դեղերի մասին» նոր օրենքը ներկայումս Ազգային ժողովում է, եւ առաջին ընթերցումը նախատեսվում է անցկացնել դեկտեմբերի կեսին: Այդ օրենքը վերջնականապես կընդունվի մինչեւ եկող տարվա հունիսը: