Քաղցկեղի դեմ պայքարի միջազգային օրվան նվիրված միջոցառումը ՀՀ ԱՆ Վ. Ա. Ֆանարջյանի անվան ուռուցքաբանության ազգային կենտրոնում համախմբել էր ոչ միայն ոլորտի բուժաշխատողներին, այլեւ հիվանդներին եւ հասարակական կազմակերպությունների, մասնագիտական միավորումների ներկայացուցիչներին։

«Մենք կարող ենք, ես կարող եմ» խորագրով միջոցառմանը ներկա էր նաեւ ՀՀ առողջապահության նախարար Արմեն Մուրադյանը։ Այս մասին տեղեկացնում են ԱՆ լրատվական ծառայությունից։
«Օրը խորհրդանշում է, որ բոլորս պետք է ընդհանուր պայքար մղենք այս ծանր հիվանդության դեմ։ Միասին հիվանդությունն առավել հաղթահարելի է»,–ընդգծել է նախարարը։

Նա անդրադարձել է նաեւ հիվանդությունների առավել վաղ փուլերում հայտնաբերմանն ու ախտորոշմանն ուղղված 2015թ. մեկնարկած ծրագրերին՝ մասնավորապես սոցիալական փաթեթի շահառուների համար ներդրված կանխարգելիչ բժշկական զննությանը, ինչպես նաեւ «Հիվանդությունների կանխարգելում եւ վերահսկում» ծրագրի շրջանակում 2015թ. սկզբից իրականացվող սկրինինգային ծրագրերին։ Սկրինինգային ծրագրի շրջանակում հանրապետությունում 30—60 տարեկան բոլոր կանայք կարող են անցնել նաեւ պարանոցի նախաքաղցկեղային վիճակի հայտնաբերման եւ քաղցկեղի կանխարգելման անվճար հետազոտություն։

Արմեն Մուրադյանի գնահատմամբ՝ ուռուցքաբանության ազգային կենտրոնում վերջին շրջանում իրականացված աշխատանքները մեծ հեռանկարներ եւ զարգացման նոր ուղիներ են նախանշում, ինչը կնպաստի մեր երկրում հիվանդացության եւ մահացության ցուցանիշների բարելավմանը։

Քաղցկեղի դեմ պայքարի գործում նախարարը մեծապես կարեւորել է նաեւ հասարակական կազմակերպությունների աշխատանքը՝ որպես վառ օրինակ մատնանշելով նաեւ «Նվիրիր կյանք» բարեգործական հասարակական կազմակերպությունը, որը գործուն աջակցությամբ Հայաստանում կարողացել է փրկել ավելի քան 500 երեխայի կյանք։

Ուռուցքաբանության ազգային կենտրոնի տնօրեն Արմեն Տանանյանը նշել է, որ քաղցկեղի դեմ պայքարի միջազգային օրը ոչ միայն առիթ է եւս մեկ անգամ բարձրաձայնել առկա խնդիրները, այլեւ խոսել արձանագրված հաջողությունների մասին, շարունակել իրազեկման աշխատանքները։
Նա շեշտել է, որ տարիներ առաջ որդեգրած «Քաղցկեղը դատավճիռ չէ» կարգախոսն արդիական է նաեւ այսօր։

Տանանյանի խոսքով՝ կենտրոնում աշխատանքներ են իրականացվում հիվանդներին առավել որակյալ բուժօգնության տրամադրման ուղղությամբ։
Միջոցառման ընթացքում ելույթ են ունեցել նաեւ Խաչատրյանի անվան եռյակը, ինչպես նաեւ երգահան, «Օգնեմ» բարեգործական հիմնադրամի հոգաբարձուների խորհրդի նախագահ Էդգար Գյանջումյանը, ով ներկայացրել է նաեւ իր անձնական օրինակը, ապաքինվելու երկար եւ դժվարին ուղին։ Էդգար Գյանջումյանը հաստատել է այն ճշմարտությունը, որ քաղցկեղը ոչ թե դատավճիռ է, այլ կյանքը նորովի վերարժեւորելու, վերաիմաստավորելու ժամանակահատված։

Անդրադարձ է կատարվել նաեւ Հոգեուռուցքաբանության հայկական ասոցիացիայի գործունեությանը։

Միջոցառումից հետո ՀՀ առողջապահության նախարարը ծանոթացել է ճառագայթային ուռուցքաբանության եւ միջուկային բժշկության բաժանմունքում իրականացվող շինարարական աշխատանքների ընթացքին։