Երեւանում երեկ մեկնարկեց «Պտղի սեռի խտրական ընտրության դեմ պայքար» ծրագրի խորհրդատվական հանձնաժողովի նիստը, որի շրջանակներում ծրագրի խորհրդատվական հանձնաժողովին եւ գործընկեր կազմակերպություններին ներկայացվեց պտղի սեռով պայմանավորված հղիության արհեստական ընդհատումների իրավիճակը Հաաստանում, ինչպես նաեւ նախորդ ժամանակահատվածում իրականացված ծրագրային գործողությունները, արձանագրված ձեռքբերումները, աշխատանքների իրականացման ընթացքում քաղված դասերը։

Նիստի բացմանը ՀՀ առողջապահության նախարարի տեղակալ Սերգեյ Խաչատրյանը կոչ արեց կնոջ դերի բարձրացմանն ամենօրյա ուղղորդված աշխատանք իրականացնել։

«Բավական երկար ժամանակ է, մենք խոսում ենք սեռով պայմանավորված հղիության ընդհատման մասին, այսօր, իսկապես, առաջին անգամ է, որ որոշակի արդյունքներ պետք է ամփոփենք, կարողանանք հասկանալ՝ որքանով էր արդյունավետ մեր աշխատանքը։ Ազգային վիճակագրության հրապարակած թվերը ցույց են տալիս, որ այս հարցում կա որոշակի ստաբիլացում։ Նույնիսկ այն ծանր թվերը, որ մենք ունեինք երրորդ երեխայի շրջանակներում, նվազել են, ինչը ուրախալի փաստ է»,–նշեց Սերգեյ Խաչատրյանը՝ հավելելով, որ նախատեսվում են օրենսդրական որոշակի փոփոխություններ, որոնք միտված են նվազեցնել հղիության սեռով պայմանավորված ընդհատումները։

«Կլինեն փոփոխություններ, որով դեկլարատիվ արդեն կարգելվի սեռով պայմանավորված արհեստական ընդհատումը, ինչպես նաեւ ուզում ենք ամրագրել սպասելու ժամանակը, երբ հղիության ընդատման համար կնոջ կողմից գրավոր ցանկությունից հետո կտրվի երեք աշխատանքային օր՝ սպասելու համար, որպեսզի կինը մտածելու ժամանակ ունենա մինչեւ վերջնական որոշում կայացնելը»,–ընդգծեց փոխնախարարը։

ՀՀ աշխատանքի եւ սոցիալական հարցերի փոխնախարար Ֆիլարետ Բերիկյանն էլ հայտնեց, որ քաղաքացիական հասարակության եւ պետական կառույցների ջանքերի համադրմամբ հաջողվել է հասարակական ընկալման մեջ բավական լուրջ փոփոխություն մտցնել՝ սեռով պայմանավորված ընդհատումների հարցում։
«Համոզիչ փաստարկներով հնարավոր է ներկայացնել խնդիրը, մարդիկ հասկանում են։ Սեռով պայմանավորված աբորտները ես համարում եմ գենդերային բռնության տեսակ»,–ասաց նա՝ հավելելով, որ այս բոլոր հարցերը կստանան նաեւ տարբեր օրենսդարական լուծումներ։

«Առողջ հասարակությունում պտղի սեռով պայմանավորված խտրական ընտրության խնդիրը ընկած է ցածր վիճակագրության մակարդակներում, իսկ Հայաստանն այս առումով խնդրահարույց է, քանի որ ունի բարձր վիճակագրական ցուցանիշ»,–հայտարարեց ՀՀ—ում Եվրամիության պատվիրակության ղեկավար Պյոտր Սվիտալսկին։

Նրա խոսքերով՝ Հայաստանում պտղի սեռով պայմանավորված հղիության արհեստական ընդատումներն ազդում են Հայաստանի համբավի վրա։
«Դա լավ չէ երկրի համբավի համար։ Հայաստանը խնդրահարույց է այս առումով։ Ես ինքս վաղուց եմ լսել այս մասին, դեռ այն ժամանակներից, երբ գաղափար չունեի, որ Հայաստանում պետք է աշխատեմ։ Եվրախորհրդում քննարկում էինք ժողովրդագրական խնդիրներ եւ իմացա, որ Հայաստանն այս առումով խնդիրներ ունի։ Հետեւաբար, այս առումով երկրի համբավն անկում է ապրում, բացի այդ, հասարակությունն է առաջին հերթին տառապում, քանի որ Հայաստանը կորցնում է ավելի քան 1400 աղջիկ։ Դա վատ է երկարաժամկետ ժողովրդագրական միտումներից ելնելով։ Այն թուլացնում է առողջ հավասարակշռությունը, որը պետք է լինի սեռերի տեսանկյունից»,–ընդգծեց Պյոտր Սվիտալսկին։
Ըստ նրա՝ այս հարցում Եվրամիությունը պատրաստակամ է օգնել Հայաստանին, ՀՀ կառավարությանը, հասարակությանը՝ արդիականացման գործընթացում, նպաստելու խնդրի լուծմանը։

Պյոտր Սվիտալսկին հայտնեց նաեւ, որ ԵՄ—ն 750 հազար եվրո է հատկացրել հարցի լուծման համար։
«Մենք հավատացած ենք, որ սա անում ենք պատշաճ նպատակներով։ Խնդիրը չի կարող լուծվել վարչական միջոցներով միայն, դրա համար պետք է բարձրացնել նաեւ իրազեկվածությունը»,–ասաց նա՝ հավելելով, որ ըստ հաշվարկների՝ հասարակության 50 տոկոսի իրազեկվածության բարձրացումը կարող է 10 տոկոսով նվազեցնել այս բացասական երեւույթի առկայությունը։ Եզրափակելով խոսքը՝ Պյոտր Սվիտալսկին նշեց, որ չպետք է հույսը կորցնել, պետք է ամեն ինչ անել, որ հարցը լուծվի. «Մենք հանձնառու են այս աջակցության տրամադրմանը»։

Ծրագրի ազդեցությունը կամրապնդվի երեք հիմնական արդյունքների շնորհիվ՝ քաղաքացիական հասարակության տեղական կառույցները, համայնքային գործիչները եւ իշխանությունները կստանան անհրաժեշտ գիտելիքներ եւ հմտություններ, ինչպես նաեւ ամբողջական ընկալում՝ երեխայի սեռի կանխակալ ընտրության բացասական հետեւանքների վերաբերյալ, երեւույթի հանդեպ բնակչության ընկալումներն ու վերաբերմունքը դրական փոփոխություններ կկրեն, եւ երեխայի սեռի կանխակալ ընտրության կանխարգելմանն ուղղված քաղաքականության շրջանակների արդյունավետությունը կբարձրանա։