Դեղերի նկարագրություն
Նախագիծը էականորեն բարելավվել է
«Դեղերի մասին» նոր օրենքը կօգնի նվազեցնել ինքնաբուժության ռիսկերը, կկարգավորի դեղերի շրջանառության ողջ շղթան։ Այդ մասին կառավարության նիստից հետո լրագրողների հետ զրույցում նշել է ՀՀ առողջապահության նախարար Արմեն Մուրադյանը։ Նրա խոսքով՝ ԱԺ—ում առաջին ընթերցում անցնելուց հետո պատգամավորների կողմից ստացվել են 44 գրավոր առաջարկություններ։«Արդյունքում՝ նախագիծը էականորեն բարելավվել է։ Ընդունման դեպքում կկարգավորի դեղերի շրջանառության ողջ շղթան, դեղերի գների կարգավորման միջոցով կապահովվի փոխհատուցվող դեղերի գների կանխատեսելիությունը, դեղատոմսերի ներդրմամբ կնվազեն ինքնաբուժությունները, դրա բացասական հետեւանքները։ Զուգահեռ ներմուծմամբ կխթանվի դեղերի գների նվազումը, պատշաճ կանոնների եւ մեծածախ իրացման լիցենզավորման պահանջի ներդրմամբ կբարձրացվի դեղի որակի, անվտանգության եւ արդյունավետության մակարդակը»,–ասել է Մուրադյանը։
Կառավարության նիստում նախարարը հայտարարել էր, որ հանրապետությունում լայն սպառում ունեցող դեղերի գները նվազել են 1.4 տոկոսով։
Արմեն Մուրադյանը, անդրադառնալով ՄԱԿ—ի գործակալությունների զեկույցին, ըստ որի՝ բազմաթիվ այլ տնային տնտեսություններ ունեն սնուցման լուրջ խնդիրներ՝ ի դեմս թերաճություն եւ գերքաշություն ունցող երեխաների մեծ թվի, ասել է. «Առհասարակ, սննդի հետ կապված խնդիրներն առողջությունն ապահովելու ու հիվանդությունները կանխարգելելու համար շատ խորը վերլուծում ենք, եւ այդ առումով համապատասխան նախագծեր են պատրաստվում»։
Հարցին, թե արդյոք այս խնդիրն իրենց չի մտահոգում, Արմեն Մուրադյանը նշել է, որ ոչ միայն մտահոգում է, այլ ամբողջովին այս աշխատանքները խորացած հետազոտության հիմքեր ունեն. «Նաեւ կառավարության որոշումներ կան այս առումով, կան համապատասխան ծրագրեր, օրենքի նախագծեր, այսինքն՝ սա ոչ միան բանավոր դաշտում է, այլ նաեւ բավականին լուրջ նորմատիվային դաշտում»։
Մեկնաբանելով Երեւանի Սիրահարների այգում շտապօգնության բժշկի վարքագիծը, ով տարեց մարդուն օգնություն ցուցաբերելիս անհարգալից էր խոսել նրա հետ, նախարարը նշել է. «Բժշկի ընդհանուր կեցվածքը համապատասխանել է բժշկի վարքագծին, չհաշված վերջին արտահայտությունը, ինչի համար էլ ենթարկվել է վարչական տույժի։ Չեմ կարծում, որ որեւէ ավելի միջոց պետք է կիրառվեր բժշկի նկատմամբ։ Նա եկել էր օգնության եւ պատրաստ էր օգնել հիվանդին։ Ուղղակի էմոցիոնալ արտահայտություն է արել, ինչի համար ենթարկվել է վարչական տույժի»։
