Երեւանում ե՞րբ կբացվի ռադիոիզոտոպների արտադրության կենտրոնը։ Ամենայն հավանականությամբ՝ դա կլինի ամռանը։ Երեկ կառավարության նիստից հետո լրագրողների հետ զրույցում առողջապահության նախարար Արմեն Մուրադյանը պատասխանեց վերջիններիս այդքան հուզող հարցին։ «Այսօր կահույքի, բարեկարգման, պահպանման ծախսերի հետ կապված կառավարության որոշում եղավ, եւ կարծում եմ, որ երկու—երեք ամսվա ընթացքում կկարողանանք ավարտին հասցնել աշխատանքները»,—ասաց նա։

Նախարարը նկատեց, որ, առհասարակ, այս տարվա ամռանը՝ հուլիս—օգոստոսին, պետք է բացվեն երեք խոշոր առողջապահական հիմնարկներ։ Դրանցից մեկը արյունաբանության կենտրոնն է, որ փոխպատվաստման հատուկ բաժանմունք կունենա։ Երկրորդը հենց ռադիոիզոտոպների արտադրության կենտրոնն է։ Իսկ երրորդը հիվանդությունների կանխարգելման կենտրոնական մասնաշենք է լինելու։
Խոսելով ուռուցքաբանության գերազանցության կենտրոնից՝ Արմեն Մուրադյանը նկատեց, թե նախատեսված է, որ այս կենտրոնը կկարողանա ապահովել տարեկան 500—ից մինչեւ 1000 մարդ։ Նրա կարծիքով, այդ հզորությունները կլինեն մեկնարկային։

Ի դեպ, նախարարի խոսքերով, երկրորդ փուլով էլ 12.5 միլիոն դոլարանոց մեծ նախագիծ է իրագործվում (Համաշխարհային բանկի կողմից)։ Խոսքը ճառագայթային բուժման մասնաշենքի մասին է։

Նախարարին երեկ հարցեր ուղղվեցին նաեւ դեղերի ձեռքբերման գների վերաբյալ։ Արմեն Մուրադյանը նախ նկատեց, որ այդ հարցի շուրջ բոլոր մեկնաբանությունները տրված են եւ կարծում է՝ լուրջ խնդիրներ չկան այլեւս։ Այնուհետեւ բանախոսը հավելեց. «Առհասարակ սկզբունքը հետեւյալն է՝ գնել արտադրողից եւ երկարամյա։ Փորձը ցույց է տալիս, որ նման սկզբունքի դեպքում մենք կարողանում ենք անգամներով ավելի էժան եւ անգամներով ավելի որակյալ դեղորայք ձեռք բերել»։

Նախարարը հավելեց, թե գործադիրի որոշմամբ սննդի բոլոր հնարավոր տեսակները, փոխարինիչները եւ համապատասխանաբար դրանց վերաբերյալ ուսուցողական եւ լրատվական բոլոր նյութերը այսուհետեւ կարգավորվելու են առողջապահության նախարարության կողմից, որն արդեն կբացառի որեւիցե տեսակի ոչ մասնագիտական պարզաբանումներ։
Նախարարության գործունեությանը վերաբերող տարբեր ակնարկներին ի պատասխան էլ փաստարկեց, որ նախարարությունը անցյալ տարվա ընթացքում թեժ գծով 10 հազարից ավելի զանգեր է ստացել, իսկ այս տարի արդեն շուրջ 3000—ից ավելի զանգեր կան, որոնց արագ արձագանքում են։ Իսկ զանգերի ավելացումը, ըստ նախարարի, ապացուցում է, որ իրենք կարողանում են շատ արագ արձագանքել եւ բավարարել քաղաքացիներին։

Աստղինե ՄԵԼՔՈՆՅԱՆ